Read chopi Ekleziyaste 12 Bible Online

Ekleziyaste 12 - chopi bible

Ekleziyaste 12

¹Alakanya M'vangi wako, ka masiku a wuphya wako, ma sanzi kuhoka masiku a makhombo, ma txi hoka malembe awa u no khawe: “Kha ni tsakiswi ngu ona”;

²kusanzi kuphuma ditambo, ni kuwonekela, ni mtxima, ni tinyeleti, ni kutshumela meta marefu msana ka kuwa ka mati;

³ditshiku di vawoneleli va nyumba va no dhudhumela, ni vavamna va mtamo va no nama, ni vagayi va no ema ngu kuva i di vadotho, ni liphume la vale va solelako ngu mu ka mafasitela;

⁴se matimba amambidi a ha txidingeni ma no sekwa, ngu mhaka ya diguwa da hahatshi da txigayo, ku txi guleka dipswi da sinyana, ni otshe mapswi a kuembelela ma txi relela;

⁵ni ku ngako makhalo o guleka ma txi zinginika, kuva ni kuthava hanzila, kuthunga mkhungu, ni humbi yi maha yo nemela, ufa ngu kunavela; nguko m'thu wa tsula ka nyumba[4] yo gwita, se vale vo saluka, va na tsimbila-tsimbila mtendelani;

⁶kusanzi kubhenuka txhini ya silivhela, ni kufayeka digombe da nzalama, ni kufayeka ka lidhuwa hafuhi ni txisima, ni kufayeka ka likasa la txisima,

⁷ni lithulu li txi tshumela liya mafuni, nga ti li ngadi ngu tona, ni moya wu tshumela wu tsula ka Txizimu, txi txi nga mninga.

⁸Wukanganyisi wa wukanganyisi, kuwomba M'gondisi, sotshe mbukanganyisi.

⁹Se mbimo yi M'gondisi a nga ti ni wutxhari ngutu, a to gondisa wutxhari wawungi ka vathu; kambe a to pfisisa, e pima, se e maha mavingu amangi.

¹⁰M'gondisi a to lava kumana mapswi o tsakisa; se mibhalo nja yinene, mapswi a ditshuri.

¹¹Mapswi a titxhari ma fana ni mindombo, ni ku nga sipikiri sile si nga tsaniswa ngu vagondisi va misengeletano, hi nga ningwa ngu M'dyisi mmweyo dwe.

¹²Se kuleka eto, mwanangu, pfisisa: Kha ku nga ni muhingano[5] kubhala mabhuku, kugonda ngutu, ngu xanisa nyama.

¹³Ka totshe ti u nga tipfa, magwito a tona ngu awa: Thava Txizimu, u xayisa milayo ya txona; nguko ayiya ngu yona fanelo ya votshe vathu.

¹⁴Nguko Txizimu txi na yisa mithumo yotshe kulamulwani, ni yotshe yi yi ku kusisalani, mwendo ya yinene, mwendo njo biha.