Read chopi Ekleziyaste 3 Bible Online

Ekleziyaste 3 - chopi bible

Ekleziyaste 3

¹Sotshe si ni mbimo ya sona, yi si nga emiselwa yona, se ku ni mbimo ya sotshe si si ku hahatshi ka nzuma:

²Ku ni mbimo ya kuvelekwa, ni mbimo ya kufa; mbimo ya kuphaya, ni mbimo yo dulela sile si nga phawa;

³mbimo ya kudaya, ni mbimo ya kuhanyisa; mbimo ya kuhaxula, ni mbimo ya kuaka;

⁴mbimo ya kudila, ni mbimo ya kuseka; mbimo ya xomulo, ni mbimo ya kusinya;

⁵mbimo ya kuhangalisela marigwi, ni mbimo ya kusengeletela marigwi; mbimo ya kusingarela, ni mbimo yo leka kusingarela;

⁶mbimo ya kulava, ni mbimo ya ku mwalalelwa; mbimo ya kuveka, ni mbimo ya kutshotsha;

⁷mbimo ya kuvharula, ni mbimo ya kurunga; mbimo ya kumalala, ni mbimo ya kuwombawomba;

⁸mbimo ya kuranda, ni mbimo ya kuvenga; mbimo ya yimbi, ni mbimo ya kudikha.

⁹A wuyelwa ngu txani mthumi, ka tile a thumako kani?

¹⁰Na tolovela kuwona mthumo wule Txizimu txi nga ninga vanana va vathu, kasi kuva txi karateka ngu wona.

¹¹Txi mahile sotshe si di tshurile ngutu, ngu mbimo ya sona; kambe txi vekile timbiluni kwawe kualakanya ka yotshe mbimo; hambi keto, kha ku na m'thu wule a zivako mthumo wu Txizimu txi nga wu maha, kukhukhela makhatoni, kala magwito.

¹²Se na tiziva ti to txi walo txa txhuko kwawe, kupinda kutitsakela ni ku ti mahela ta tinene kuhanyani kwawe;

¹³ni kungako m'thu a txi dya, e sela, e tsaka, ngu mthumo wakwe wotshe. Etxo njiningo txota ngu ka Txizimu.

¹⁴Ani na tiziva to sotshe si Txizimu txi si mahako, si na simama kala kupinduka; kha ku dingani kuengetelwa txilo, hambi kuthaviswa txilo. Se eto Txizimu txi mahela ti to ku va ni txithavo masoni ka txona.

¹⁵Atxi txi kuho txi ti tiho; ni txi txi no vaho, txi ti tiho; kambe Txizimu txi lava bhindulo ya sile si nga pinda.

¹⁶Ni to wona kambe hahatshi ka ditambo tito: Ha wukhaloni ka wulamuli, ku ni wubihi; ni ka wukhalo wa wululamo, ku ni wubihi ni kona.

¹⁷Ani ni to khani mbiluni kwangu: Txizimu txi na lamula wo lulama ni wo biha; nguko ku ni mbimo ya wotshe wubihi, ni mbimo ya wotshe mthumo.

¹⁸Ani ni to khani mbiluni kwangu: I mhaka ya vanana va vathu, kasi ku Txizimu txi na va duka, ni ti to ve ti wona vapune taku va fana ni sihari.

¹⁹Nguko ati ti mahekako ka vanana va vathu, toneto kambe ta maheka ni ka sihari; kumaheka toneto tatimweto: A ti a fisako tona m'thu, ni txona txihari txi fisa toneto, sotshe si ni m'hefumulo wumwewo; kambe m'thu kha pali txihari ngu txilo, nguko sotshe mbukanganyisi.

²⁰Sotshe siya wukhaloni kumweko; sotshe lithulu, kambe sotshe si na tshumela si ya lithuluni.

²¹I mani a ku khene moya wa vanana va vathu wu ya txitimwi, ni ti to moya wa sihari wu relela hahatshi ka mafu kani?

²²Ngu toneto, ani ni to wona tito, kha ku na txa txhuko kupinda ku m'thu e tsakela mthumo wakwe, nguko etxo ngu txona txiningo txakwe; nguko i mani a no muwuyisa, kasi ku ta wona ti ti no humelela msana kwakwe kani?