Read chopi Ekleziyaste 5 Bible Online

Ekleziyaste 5 - chopi bible

Ekleziyaste 5

¹Xayisa mkondo wako, u txi wulela Nyumbani ka Txizimu; se ti namise ngutu u engisa kupinda kuningela miphaxo ya siphukuphuku, nguko kha si ti zivi ti to si maha wubihi.

²U nga kuluvetise txisofu txako, hambi mbilu yako yi nga kuluvete kuwomba dipswi dokari masoni ka Txizimu; nguko Txizimu txi nzumani, awe u txitimwi ka mafu; ngu toneto, mapswi ako ma nave amadotho.

³Nguko miloro yita ngu mu ka mithumo yayingi, ni dipswi da txiphukuphuku, di huma ka mapswi o tala ngutu.

⁴Ngako u txi maha txixambanyo txokari ka Txizimu, u nga swele ku txi maha; nguko Txizimu kha txi tsakiswi ngu siphukuphuku; ati u xambanyako, ti mahe.

⁵I txhuko kwa mbi xambanya, kupinda kuxambanya u si gwiti u maha.

⁶U nga tumele taku txisofu txako txi onhisa mmidi wako, hambi kuwomba masoni ka ngelozi taku i phazamo; ngu kutxani Txizimu txi no henyela dipswi dako, txi khundumusela mithumo ya manza ako kani?

⁷Nguko nga kule amu ka miloro yayingi ku ku ni wukanganyisi, ngu toneto, ni mu ka mapswi o tala; aniko awe, thava Txizimu.

⁸Ngako u txi wona kuxaniswa ka sisiwana sa ditiko dokari da hombe, ni kulwiswa, ka wukhalo wa wulamuli ni wululamo, u nga xamale ngu mhaka yo nga eyo; nguko awule a ku txitimwi ngutu kupinda vale va ku txitimwi, wa khatala ngu tona; kambe ku ni vo guleka ngutu kupinda vona.

⁹Dibhindu da mafu nda hotshethu; hambi mfumeli wa vhuneka ngu sa mafuni.

¹⁰Awule a dhundako male kha na mbi dhuka e kolwa ngu male; ni wule a randako thomba yayingi kha na mbi dhuka e kolwa ngu dibhindu da kona; eto nitona mbukanganyisi.

¹¹Ahawa thomba yi andako kuanda ni vadyi va yona; dibhindu muni va ku nado vanyamne va yona, ngako i si nga ku yi wonetela ngu maso dwe, kani?

¹²Wukohe wa mthumi wa tshamba, hambi a di dyite sa sidotho mwendo sasingi; aniko kukhura ka nyatithombe ka mpwatisa wukohe.

¹³Ku ni wubihi ni nga wu wona hahatshi ka ditambo, wu ndindetelako dikhombo: I ku tithomba tile vanyamne va tona va ti vekelako kusina.

¹⁴Nguko tona tithomba eto, ti mwalala ngu dikhombo dokari; se ngako a di ni mwanana, kha ku sali txilo manzani kwakwe.

¹⁵ Nga tile a nga humisa tona ngu mndani ka mame wakwe, a na tshumelisa toneto i di tximbwiri; kha na mbi teka txilo txa mthumo wakwe, ngu manza akwe.

¹⁶Eto ni tona wubihi wu wu tisako makhombo: Ti to ati a nga tisa tona, a na tshumelisa toneto; ni ti to se dibhindu muni a ku nado ngu kuthumela moya,

¹⁷ni ti to eva a di dyite ka otshe masiku akwe txidemani, a di ni xomulo ya hombe, ni makhombo, ni txiviti txa hombe kani?

¹⁸Mhaka ya yinene yo tshura yi ni nga yi wona, ngu yiya: Ngudya ni kusela, ni kutitsakela mmwani ni mmwani, ngu dibhindu da wotshe mthumo wakwe, wule a nga wu maha hahatshi ka ditambo, ka otshe masiku a kuhanya kwakwe, aale Txizimu txi nga mninga; nguko atxiya njiavelo txakwe.

¹⁹Se ka m'thu wule Txizimu txi nga mninga tithomba ni mipeto, ni mtamo wa ku tidya, a txi teka txyavelo txakwe, e ti tsakela ngu mthumo wakwe, etxo njiningo txa Txizimu.

²⁰Nguko kha na mbi alankanyela ngutu masiku a kuhanya kwawe; nguko Txizimu txi mxamula ngu kutsakisa mbilu yakwe.