Read chopi Ekleziyaste 8 Bible Online

Ekleziyaste 8 - chopi bible

Ekleziyaste 8

¹I mani a fanako ni txhari kani? Niku i mani a zivako kutxhamusela to maha kani? Wutxhari wa m'thu wa maha khohe yakwe yi phatima, ni kukhwanyela ka khohe yakwe ka txitxa.

²Ani ni khani: Xayisa sirumo sa mfumeli, ngu mhaka ya txixambanyo txako ka Txizimu.

³U nga tutumele kukhukha masoni kwakwe, hambi kuwulelela ka timhaka to biha, nguko ene wa maha totshe ti a ti lavako.

⁴Nguko dipswi da mfumeli di ni mtamo; se i mani wu a no khene kwakwe: U maha txani kani?

⁵Awule a xayisako sirumo kha na mbi welwa ngu to biha; se mbilu ya txhari ya ziva mbimo ni mamahelo.

⁶Nguko totshe to maha ti ni mbimo ya tona ni mamahelo a kona; nguko wubihi wa m'thu mbwa hombe txitimwi kwakwe.

⁷Nguko kha zivi ti ti no humelela; i mani a no mmaha e tiziva ti ti mahekisako tona kani?

⁸Kha ku na m'thu ni wammweyo a ku ni mtamo txitimwi ka moya, kasi kuñola moya; hambi ku va ni mtamo ngu ditshiku da kufa; kambe kha ku na matxhari ka yimbi ya kona; ni ka kudotho wubihi kha wu na mbi txhatxhisa vabihi.

⁹Totshe eto ni ti woni mbimo yile, ni nga ningetetela mbilu yangu ka yotshe mithumo, yi yi mahwako hahatshi ka ditambo; ku ni mbimo yi m'thu a fumako txitimwi ka mmwani m'thu, kasi ku mxanisa.

¹⁰Kambe ni woni va kubiha va txi tshotshwa, ku ti ti ni wu a nga ti ti ya dithithani; se avale va nga maha ta tinene, va nga ti ti huma ngu ka wukhalo wo sawuleka, va to divalwa didhoropani; eto ni tona mbukanganyisi.

¹¹Nguko kulamulwa ka wo biha kha ku kuluveti kuta, ngu mhaka yeto, timbilu ta vanana va vathu ti navela kumaha wubihi.

¹²Hambi ku ngako muonhi a txi maha kubiha dizana da sikhati, ni masiku akwe me tala, ani na tiziva ngu ditshuri ti to avale va thavako Txizimu, va na kateka, nguko kuva ve thava masoni ka Txizimu.

¹³Aniko muonhi kha na mbi kateka, ni masiku akwe kha ma na mbi engeteleka; a na fana ni mtsudi, nguko kha thavi masoni ka Txizimu.

¹⁴Ku ngadi ni wumwani wukanganyisi wu mahwako txitimwi ka mafu: Ku ni vo lulama, va txhatxhazelwako ngu mithumo ya vabihi, ni vabihi va va txhatxhazelwako ngu mithumo ya vo lulama. Ni khani eto ni tona mbukanganyisi.

¹⁵Sekoko ani ni to dhumisa litsako, ngako m'thu asi ngako ni txa tximwetxo txa txhuko hahatshi ka ditambo, txo pinda kudya, e sela, ni ku ti tsakela; nguko eto ti na m'vhuna ka mthumo kwakwe, ka masiku a kuhanya kwakwe, ale Txizimu txi mningako hahatshi ka ditambo.

¹⁶Ni txi maha ti to mbilu yangu yi thuma ngu wutxhari, ni kuwona mthumo wu wu ku txitimwi ka mafu (m'thu koko kha mani wukohe, ni wusiku, mwendo ni mitshikari),

¹⁷sekoko ni to wona wotshe mthumo wa Txizimu, ti to m'thu kha sikoti kuziva mthumo wu wu mahwako hahatshi ka ditambo; hambi m'thu a txo thumela ku wu mana, kha na mbi wu mana; hambi ku ngako txhari yi txo kha yona yi nga wu ziva, hambi keto, kha yi na ku wu manela.