Read chopi Ndando ya Tindando 3 Bible Online

Ndando ya Tindando 3 - chopi bible

Ndando ya Tindando 3

¹Ni wusiku ha m'bhedhuni kwangu, ni to lava wule muhefemulo wangu wu mrandako, ni mlavile, aniko kha na mmana.

²Ni na khukha koko, ni horolokela didhoropa, ni horolokela amu ka tinzila ta hombe ni mitendelani, ni lava awu muhefemulo wangu wu mrandako; nguko ni m'lavile, se kha na mmana.

³Va to ni mana vawoneleli, vale va nga ti horolokela didhoropa; ni to va wotisa ni txi khani: Ina mi woni awule muhefemulo wangu wu mrandako kani?

⁴Ni di hambunyetani navo, koneko ni to mana wule muhefemulo wangu wu mtsakelako; Ni to mñola, kala kuza ni mwuleta nyumbani ka mame, txibhiyani ka wule a nga ni veleka.

⁵Anu vanana vamahorana a Jerusalema, na mi xambanyela ngu timhoti ni timbavala ta txitinga, ti to mi nga wuseni hambi kuvhumukisa lirando langu, kala kuza li ti lava li pune.

⁶I mani wu a kwelelako ngu txiwulani, kufana ni tiphande ta wutshi, a bhumulako mira ni dibaselo, ni tixaka ta totshe tipowa to bhumula kani?

⁷Wonani, msingo wa Solomoni, wu randetwe ngu mtxhanu wa magumi ni dimwendo a tindena, ti ti humako hagari ka tindena ta Israyeli.

⁸Votshe va di xomile matxhari, ni mitamo ya yimbi; mmweyo ni mmweyo ni ditxhari dakwe txiwununi, ngu mhaka ya dizowa da wusiku.

⁹Mfumeli Solomoni a to ti mahela txithathe ngu mapulango a Libhanoni.

¹⁰Tiphande ta txona nda silivhela, txikhigelo txa kona i nzalama, ni txikhalo txa disilika, mndani ka txona ku tshurisetwe ngu lirando ngu vanana vamahorana a Jerusalema.

¹¹Anu vanana vamahorana a Siyoni, humani mi ya wona mfumeli Solomoni, ni m'bhoti wu a nga ambekwa ngu mwamwakwe, ditshiku dile a nga ya lowola ngu dona, ngu ditshiku da kutsaka ka hombe ka mbilu yakwe.