Read chopi Ndando ya Tindando 4 Bible Online

Ndando ya Tindando 4 - chopi bible

Ndando ya Tindando 4

¹Wona taku, u tshurile ngutu, awe mndoni wangu, wona taku u tshurile ngutu; maso ako hagari ka timbobo tako, mafana ni maso a matuva, misisi yako yi fana ni mtxhambi wa tiphongo ti ti dyiswako mmangoni ka Gileyadhi.

²Makwasa ako ma fana ni mtxhambi wa tinvuta ti nga kaywa, ti txita ngu kusambiswani, ati ti velekako ngu mahasa, se kha ku nga ni txifule ni txa tximwetxo ka tona.

³Txisofu txako txi fanana ni ngoti yo bhilivila, ni kuwombawomba kwako ka tsakisa; mathama ako hagari ka timbobo tako ma fana ni txikhwemu txa diromani.

⁴Thamo yako yi fana ni txitezi txa Dhavhidha, txi nga akwa kasi kuhayeka kona matxhari, amu ku hayekwako 1.000 wa matxhari, otshe a vathu va mtamo.

⁵Titshumbu tako ta timbidi ti fana ni simhotyana simbidi sa mahasa, si dyiswako hagari ka makhoñwa.

⁶Ni na tsula mmangoni ka mira, ni tximangwanani ka dibaselo, kusanzi kutitila, ni mitsudi yi sanzi kumwalala.

⁷Mndoni wangu, u tshurile ngutu, kha ku na txi txi solekako kwako.

⁸A hi khukhe Libhanoni, awe msikati wangu, ngono hi khukha Libhanoni; wonetela kukhukhela tshokani ka mmango wa Amana, kukhukhela tshokani ka mmango wa Seniri ni wa Hermoni, khukhela mazumboni ka tingonyamo, ni mimangoni ka tiyingwe.

⁹U ni dute mbilu, ndiyangu, awe txirandwa txangu, u ni thote mbilu ngu maso ako, ngu liketani limwelo li ku thamoni kwako.

¹⁰Hi nga kutshura ka lirando lako ndiyangu! Awe msikati wangu, lirando lako nda linene kupinda vhinya! Ni kubhumula ka mafura ako ka tsakisa kupinda yotshe mixowo ya makha.

¹¹Mahesa a wulombe ma khulunga ha txisofu kwako, awe msikati wangu! Wulombe ni masi si hahatshi ka lidimi lako, se kubhumula ka syambalo sako, nga ka Libhanoni.

¹²Awe u thembwe yo bhiyelwa, ndiyangu, msikati wangu, u txiziva txo sekelwa, txisima txo fenengetwa.

¹³Kuthunga kwako kufana ni thembwe ya maromani, yi ku ni mihando ya yinene: I ku sipresite ni nardhu.

¹⁴Nardhu ni safarawu, ni kalamoni ni kanela, ni yotshe mindonga ya dibaselo, ni mira ni alowesi, ni sotshe sibhumuliso.

¹⁵U txisima txa thembweni, txisima txa mati o vhela, mnambo wu wu khulungako Libhanoni.

¹⁶Khukha, moya wa wuphemba, ngono awe moya wa wulambwe; futeta thembweni kwangu, kasi kupfalisa kunungela ka yona. Ha! I ti ku txota txirandwa txangu thembweni ka txona, txi ta dya mihando ya txona yo tshamba.