Read chopi Ndando ya Tindando 5 Bible Online

Ndando ya Tindando 5 - chopi bible

Ndando ya Tindando 5

¹Nita thembweni kwangu, ndiyangu, txitekwa txangu; ni ta sengeleta mira ni tixakaxaka ta tingi ta sibhumutiso, ni dyite dihesa dangu ni wulombe wangu, ni sete vhinya yangu ni masi angu. Dyanani anu vangana, [4] selani ngutu anu sirandwa.

²Ni ti otete, kambe mbilu yangu yi ti ti xaniseka, dipswi da txirandwa txangu txi pekako ditimba. A khene: Ni tulele ndiyangu, awe mndoni wangu, dituva dangu da ku ambi na dikhwiti, nguko msungo wangu wu nakani ngu mwando, ni misisi yangu yi nakani ngu mathotho a wusiku.

³Ni ambute syambalo sangu, na si ambalisa kutxani kani? Ni sambile minenge yangu, na mahisa kutxani kutshumela ni yi nzihatisa kani?

⁴Txirandwa txangu txi to wuletisa diwoko ngu ha ka ditshoko da ditimba, se mbilu yangu yi to nyawukelwa ngu lirando.

⁵Se ni to wuka, ni ya tulela txirandwa txangu ku to nyuka mafura a mira manzani kwangu, ma txi thothoketa ngu titihoni kwangu, me nakanisa sikhweketo sa ditimba.

⁶Ni to tulela txirandwa txangu, kambe a ti ti khukhile e tsula. Mhefemulo wangu wu to guma mtamo, mbimo yi ene a nga womba-womba ni nani; ni to mlava, kambe kha na mmana; ni m'dhani, kambe kha orovela.

⁷Ni to manwa ngu vawoneleli, vale va nga tihorolokela didhoropani, va to ni peka, ve ni dayisa, vawoneleti va diguma va to ni tekela dibhaji dangu.

⁸Anu mahorana a Jerusalema, na mi kombela, ti taku ngako mi txi mana txirandwa txangu, txi geleni ti taku nafa ngu lirando.

⁹Njitxani txi txirandwa txako txi pindako tximwani txirandwa txangu ngu txona, awe wo tshura ngutu hagari ka vavasikati kani? Txirandwa txako txi pinda vamwani ngu kutxani, koza u hi leleta to nga eto, kani?

¹⁰Txirandwa txangu njo tshura ngutu, txa txiemo txo tshura, txa teka m'jeke hagari ka 10.000.

¹¹Msungo wakwe wu fana ni nzalam yo hehuka ngutu, misisi yakwe yi laphile, ya mtima nga digwana.

¹²Maso akwe ma fana ni a matuva hafuhi, hafuhi ni mnambo wa mati, ma txi kuwulwa ngu masi.

¹³Mathama akwe ma fana ni ndima ya mipepo, kufana ni[5] simangwana sa mwasi wo nungela; txisofu txakwe txi fanana ni makhoñwa di di dotako mafura a mira.

¹⁴Mawoko akwe ma fana ni tiphera ta nzalama ti nga tshuriselwa ngu tidhayimani; mndani[6] kwakwe kufana ni titxheho ta tshofu to tshulelwa ngu marigwi a safira.

¹⁵Minenge yakwe yi fana ni tiphande ta marigwi, ti ti nga zimekwa txitimwi ka siparako sa nzalama yo hehuka; a wonekisa ku nga Libhanoni, ni wunene nga mikedhari.

¹⁶Ka tsakisa[7] kuwombawomba kwakwe ka kunene; ina, ene wa navetisa ngutu. Txirandwa txangu txi zumbisileto, kambe ngu toneto mngana wangu, Anu vanana vamahorana a Jerusalema,