Read chopi Ndando ya Tindando 6 Bible Online

Ndando ya Tindando 6 - chopi bible

Ndando ya Tindando 6

¹Txi yite hani txirandwa txako, awe wo tshura ngutu hagari ka vavasikati kani? Txi yite hani txirandwa txako hi na kuvhuna kulava kani?

²Txirandwa txangu txa relela thembweni kwakwe, ka tindima ta sibhumuliso, kasi kuya ti dyisa tindimani ni kuhaphela makoñwa.

³Ani ni wa txirandwa txangu, ni txona txirandwa txangu njangu; txirandwa txangu txi dyela mu ka makhoñwa.

⁴Awe mndoni wangu u tshurile nga didhoropa da Tiriza, u tshurile kufana ni Jerusalema, u xamalisa kufana ni dibutho di di ku ni m'jeke.

⁵U nga ni wonetele, nguko maso ako ma ni heta mtamo. Misisi yako yi fana ni mtxhambi wa tiphongo ti ti dyelako Gileyadhi.

⁶Makwasa ako ma fana ni mtxhambi wa tinvuta ti txita ngu kusambiswani, ati ti velekako ngu mahasa, se kha ku nga ni nyumba ka tona.

⁷Mathama ako hagari ka timbobo, ma fana ni txikhwemu txa diromani.

⁸Ku ni mtxhanu wa magumi ni dimwedo a tikosikazi, ni mtxhanu wa magumi ni mararu a vavasikati vavadotho, ni timbiri ta kwa mbi balwa.

⁹Aniko txituvana txangu njimwetxo, wa kwa mbi na txionho, ngene ekha ka mame wakwe, txirandwa txa wule a nga m'veleka; Ngako mahorana ma txi mu wona, va m'dhana ku wu wo kateka, vafumeli va txisikati ni vavasikati vavadotho va na m'dhumisa.

¹⁰I mani wuwa a wonekisako ku nga wuronga, wo tshura nga mtxima, wa kuwoninga nga ditambo, wo thisa nga dibutho da yimbi di ku ni m'jeke kani?

¹¹Ni relete thembweni ka mitshulani, kuya wona siluva sa mkovani, ni kuwona ti to mwendo mivhinya yi thungile, ni kumwedo miromani yi velekile wuluva.

¹²Na ni sanzi ku tipfa, moya wangu wu ni wuletile mu ka sikotxikani sa vathu vangu vavanene.

¹³Wuya, wuya awe Mxulamita, wuya, wuya kasi ku hi txi kuwona. Ngu kutxani u wonetelako Mxulamita a txi nga o sinya hagari ka mabutho mambidi a yimbi kani?