Read chopi Ndando ya Tindando 8 Bible Online

Ndando ya Tindando 8 - chopi bible

Ndando ya Tindando 8

¹Oh! I ti ku wo va ndiyangu, wule a nga mama tshumbu ya mame wangu, ni ndi no mbimo yi hi tshanganako ruwani, ni ku pswompswa, ni si solwi ngu m'thu.

²Ni ndi na kuteka, ni kuyisa nyumbani ka mwamwangu, se awe u ndi na ni gondisa ta lirando, Ni ndi na kuninga vhinya yo lombela ni vhinya ya maromani u txi sela.

³Dianza dakwe da txibhabha di nave hahatshi ka msungo wangu, se da txinene di na ni khutarele.

⁴Anu vanana vamahorana a Jerusalema, na mi xambanyela tito, mi nga wuseni hambi kuvhumukisa lirando langu, kala kuza li ti lava li pune.

⁵I mani wule a tako ngu didhawa da txiwulani, a di khutarete txirandwa txakwe kani? Ni ku wusile u di hahatshi ka mndonga wa mahapula, aha mwamwako a nga lumwa a di kona, ahawa a nga kuvelekela kona.

⁶Ni veke nga txitambu mbiluni kwako, ni txi nga txitambu diwokoni kwako, nguko lirando li ni mtamo kufana ni lifo, ni wukwele wu karata kufana ni dithitha dituro da kona di fana ni dituro da mndilo, di hisa kufana ni titshatsha ta MKOMA.

⁷Kha ku na mati a ma nga sikotako ku tima lirando, kambe kha ku na mnambo wu wu nga sikotako ku li bhwabhwanetisa. Hambi ku ngako m'thu a txo ningele thomba yotshe ya nyumbani kwakwe ngu mhaka ya lirando, magwito a kona ngu kunyenywa dwe.

⁸Hi ni ndiya ya yidotho, yi sanziko kuva ni titshumbu; Hi na maha txani ngu yona, ditshiku di yi nota wutwa kani?

⁹I tiku ova diguma, hi ndi na aka txidingililelo txa silivhela txitimwi yona, i tiku ova ditimba, hi ndi na m'biyela ngu mapulango a mikedhari.

¹⁰Ani ni diguma, titshumbu tangu, ti fana ni sidingililelo sa dona; masoni kwakwe ni fana ni wule a manako kudikha.

¹¹Solomoni a ti ti ni thembwe ya mivhinya Bahali-Hamoni; A to yi ningela manzani ka vawoneleli; se mmweyo ni mmweyo wawe a to neha 1.000 wa tisilivhele ngu mihando yakwe.

¹²M'vhinya wangu na ti xayisela nipune, awe Solomoni u na va ni tisilivhele ta 1.000, se vawoneleli va mihando va na mana 200.

¹³Awe u zumbako thembweni kwangu, vangana vangu va navela kupfa dipswi dako, ni nani na di lava ku dipfa.

¹⁴Ngono ngu kukuluveta txirandwa txangu, tutuma kufana ni txipene mwendo mbavala, txitimwi ka mimango ya so bhumulisa.