Read chopi Isaya 13 Bible Online

Isaya 13 - chopi bible

Isaya 13

¹Mahungu ya ma nga woniswa Isaya mwana Amosi, madingano ni Bhabhilona.

²Gwimbani m'jeke txitimwi ka mmango wa kwa mbi na txilo; va dhaneni ngu dipswi do guleka, mi va dyoweta ngu dianza, kasi kuva txi wulela ngu sike sa vathangeli.

³Ni leletete va sawuleki vangu, ina, se ni dhani tindena tangu, ati ti tsakelako wuhombe wangu, kasi ku ti txi maha mthumo wa kuhenya kwangu.

⁴Se ka pfala diguwa da vathu txitimwi ka mimango, do fana ni da dibutho da hombe da vathu, dipswi da mifumo ya matiko ma nga sengeletana. MKOMA wa Mabutho a Tiyimbi, wa xola dibutho da yimbi.

⁵Se va ta ngu ditikoni da kule, magwito ka nzuma, i MKOMA ni matxhari a kuhenya kwakwe a tako kuta xasela ditiko dotshe.

⁶Pekani huwa nguko ditshiku da MKOMA di hafuhi; di ta ngu ka wu wa Mtamo-wotshe kuta haxula.

⁷Mawoko otshe ma na pwata mtamo, ni totshe timbilu ta vathu ti na rereka.

⁸Se va na dhukiswa ve thava, va txi guma mtamo, ve xanisekisa ku nga wamsikati a di hafuhi ni kuveleka; va na wonana, ve xamala, ve dhunuka, ngu kuthava.

⁹Wonani, ditshiku da MKOMA data, do dhukisa, da tshofu, ni kuhenya ko tura, kasi kuhaxula ditiko, ni kulovisa vaonhi va dona.

¹⁰ Nguko tinyeleti ta nzumani ni mitxawa ya tona, kha ti na mbi leka kuwoninga, ditambo di na pfhupela kuhumani ka dona, ni mtxima kha wu na mbi woninga.

¹¹Se ni na tsayisa mafu ngu mhaka ya kubiha ka ona, ni vabihi ngu mhaka ya sionho sawe, ni na heta kutikulisa ka va makolo, vanyamitamo ni vathu wo ti guleta ni na va veka hahatshi.

¹²Ni na maha ti to m'thu eva ni lisima ngutu, kupinda nzalama ya yinene, kupinda nzalama yo hehuka ya Ofiri.

¹³Ngu toneto, ni na dhudhumelisa nzuma, ni mafu ma na khukha ha wukhaloni ka ona, ngu mhaka ya kuhenya ka MKOMA wa Mabutho a Tiyimbi, ngu ditshiku da kuhenya kwakwe.

¹⁴Mmwani ni mmwani a na fana ni mhoti yi yi tutumiswako, va txi nga tivunta to pwata m'dyisi; mmwani ni mmwani a na tshumelela ka va ka kwawe, votshe va na tutumela ditikoni kwawe.

¹⁵Votshe vale va no manwa va na pindiswa, ni votshe vale va no ñolelwa va na dawa ngu ditxhari.

¹⁶Vanana vawe va na phwaraselwa va txi si wona; tinyumba tawe ti na honyolelwa, ni vasikati vawe va na pfinyetelwa.

¹⁷Wonani, ani ni na va wusela Vamedhi, ava va si khataliko ngu silivhela, hambi kuva ni mhaka ngu nzalama.

¹⁸Va na fula mazambi ngu malaho awe, hambi vanana va va ku mndani, kha va na mbi pfelwa wusiwana, maso awe kha ma na mbi felela vanana.

¹⁹Se Bhabhilona, ditiko do tshura, kupinda matiko otshe, adi Vakaldheya va ti dhumisako ngu dona, di na fana ni Sodhoma ni Gomora, mbimo yi Txizimu txi nga ma haxula.

²⁰Kha ku na mbi ngadi ku txi akwa kambe, hambi kuwusetwa ngu liveleko ni liveleko; hambi Muharabhi kha na mbi gwimba ditenda dakwe kona, hambi vadyisi kha va na mbi dyisa sifuyo sawe kona.

²¹ Kambe sihari sa txiwulani si na zumba kona, tinyumba tawe ti na tala ngu sisukulu, ni timbuwu ti na zumba kona, ni tiphongo ti na ndaka-ndaka kona.

²²Se vanyadhukwe va na emba ka tinyumba tawe ta wukoma ta maphanga, ni maxolwa ka tinyumba tawe ta wukoma ta litsako; se mbimo ya dona yi hafuhi ni masiku a kona kha ma na mbi engetelwa.