Read chopi Isaya 14 Bible Online

Isaya 14 - chopi bible

Isaya 14

¹Nguko MKOMA a na pfela wusiwana Jakobe, kambe a na sawula Israyeli, a txi mu veka ditikoni kwakwe. Valuveli va na va kumweko navo, va txi namarela ka nyumba ya va ka Jakobe.

²Se vathu va na va amukela ve va yisa makhaloni kwawe, sekoko nyumba ya va ka Israyeli, yi na va fumela, amu ditikoni ka MKOMA, veva tikhumbi ta txiwamna ni ta txisikati. Va na maha tikhumbi ta vale va nga ti va mahile tikhumbi, ni kufumela vale i nga ti vaxanisa vawe.

³Se ku na humelela tito, ngu ditshiku di MKOMA a nota kuninga kuhumula ka mthumo wako, ni ka kuthava kwako, ni ka mthumo wo nemela, wule va nga kuthumisa,

⁴sekoko u na embelela ndando yo tseketsela mfumeli wa Bhabhilona, u txi khawe: A gwitete hayi mxanisi, ni didhoropa da nzalama di gwitisile kutxani!

⁵Se MKOMA a funyile ndonga ya vakubiha, ni ndonga ya wukoma ya vafumeli.

⁶Ayile va nga ti peka vathu ngu yona ngu txiviti, ngu txiruko txa kwa mbi guma, va txi fumela matiko ngu tshofu, se konkuwa, va tutumiswa, kusina wu a va tsivelako.

⁷Konkuwa, ditiko dotshe se di kuhumulani ni kudikhani, va huwelela ngu kutsaka.

⁸Hambi didhondo da mikipresi ni mikedhari ya Libhanoni yi tsakela kuwa kwako, yi txi kha yona: Kukhukhela kule u nga wa, kha ku na wu a tako ku ta hi wilela.

⁹Xeyoli, kukhukhela hahatshi ko tshima, ku xanisekile ngu kulava awe, kasi ku ku hingeta kutani kwako; ku ku wusete vafi, ni votshe vathangeli va ha mafuni, kambe a va khukhisile ngu ha situluni ka wukoma, votshe vafumeli va matiko.

¹⁰Votshe vava va na xamula, va txi kha vona: Awe nawe u lwate ku nga athu, u fani ni nathu.

¹¹Kutikulisa kwako ku wisilwe ka diphala do hokoma, kumweko ni diguwa da timbila tako, se timbungu ti na maha ditaho ni txifenegelo txako.

¹² U wisile kutxani ngu nzumani, awe nyeleti ya mixo, dihorana da wuronga! U rinzisilwe kutxani hahatshi, awe m'wisi wa matiko!

¹³Nguko u ti ti khawe mbiluni kwako: Ni na kwela ni txiya nzumani, na guleta txikhalo txangu txa wukoma, txitimwi ka tinyeleti ta Txizimu.

¹⁴Ni na kwela txitimwi ka marefu, kambe ni na fana ni Nyatxitimwi.

¹⁵ Hambi keto, u na yiswa mndiloni, ka diphala do hokoma.

¹⁶Ava va kuwonako, va na kuwonisisa, va txi kha vona: Ngene m'thu wu a nga zinginisa mafu, awu a nga zinginisa mifumo kani?

¹⁷Ngene a nga maha ti to ditiko di maha txiwula, e xasela madhoropa a dona, kani? Awu a nga lamba kuleka tikhumbi takwe ti ti tshulela mitini ka tona kani?

¹⁸Votshe vafumeli va matiko, vona votshe, va tshotshilwe ngu txithavo, mmweyo ni mmweyo m'tini kwakwe.

¹⁹Aniko awe u tshotshilwe kule ni mathitha ako, u fana ni didhavi di di si vhuniko txilo, kufana ni txyambalo txa va va nga dawa ngu ditxhari, nga vale va relelako ka diphala do tala ngu marigwi, kufana ni txirumbi txi kandetelwako.

²⁰Khu na mbi tshotshwa kumweko navo, nguko u haxute ditiko dako, u dayela vathu vako, lihunzu la va kubiha kha li na mbi khumbukwa.

²¹Longisani wukhalo wu vanana va no dawelwa ka wona, va fela sihono sa vatate vawe, kasi ku va si wuki ve fuma mafu, hambi ku va sitate ditiko ngu madhoropa awe.

²²Nguko ni na va wukela, kuwomba MKOMA wa Mabutho a Tiyimbi, ni na fuvisa ditina da Bhabhilona ni misalelwa ya kona, vanana ni vatukulu, kuwomba MKOMA.

²³ Ni na di maha wukhalo wa sikhovha, ni txiziva txa mati a kusina, na di hiyela ngu diphiyelo di di lovisako, kuwomba MKOMA wa Mabutho a Tiyimbi.

²⁴MKOMA wa Mabutho a Tiyimbi a xambanyile, a txi khene: Ati ni nga ti pimisa ti na mahisa toneto; se ati ni nga womba ti na mahekisa toneto.

²⁵Ni na khundumusa Asiriya amu ditikoni kwangu, ni mkandetela ngu mikondo amu ka mimango yangu, kasi ku dikange dakwe di na maneka kule navo, ni mrwalo wakwe wu na habukiswa ha makata kwawe.

²⁶Ngu txona txikungo txi txi nga sungwa txitimwi ka otshe mafu, adiya dianza di nga nawulutwa txitimwi ka matiko otshe.

²⁷Nguko MKOMA wa Mabutho a Tiyimbi a tsanisile; i mani koko a no kaneta kani? Se a guletile diwoko dakwe; i mani koko a ngadi tshumetelako msana kani?

²⁸ Mahungu awa ma zivisilwe ngu dilembe dile mfumeli Akazi a nga fa ngu dona.

²⁹U nga tsake, awe ditiko dotshe da Vafilista, ngu kule yi nga funywa ndonga yile yi nga ti ku peka, nguko amu ka mtwi wa mnyoka ku na huma txifofo, se m'hando wa kona i nava mnyoka wo tura, wu purumako.

³⁰Matiwula a sisiwana ma na dyiswa, ni sisiwana si na otela ngu kudikha; aniko ni na daya mkoloti wako ngu nzala, ni misalelwa yako yi na hasamulwa.

³¹Peka huwa awe txike; kwangula, awe didhoropa; nyunguluka awe ditiko dotshe da Vafilista; nguko ku na huma wutshi ngu Wutxani, ka mbimo ya kona kha ku na mbiva ni wammweyo wo sala ekha.

³²Ku na xamulwa txani koko ka mitumi ya vathu kani? Va na kha vona: MKOMA a akile makhato a Siyoni, kasi ku vathu vakwe, vale va xanisekako ve mana wuthavelo.