Read chopi Isaya 15 Bible Online

Isaya 15 - chopi bible

Isaya 15

¹Mahungu a Mowabhi. Ngu ditshuri, ngu wusiku wumwewo, didhoropa da Are wa Mowabhi di khundumusilwe, di fuvisilwe; ngu ditshuri, ngu wusiku wumwewo, didhoropa da Kiri wa Mowabhi, di khundumusilwe, di fuvisilwe.

²Vaaki va Bhajite ni Dhibhoni, va kwelela ka makhalo o guleka, kuya dila kona; Mowabhi wa peka huwa ngu mhaka ya Nebho ni Medhebha; yotshe misungo yi na maha tigwayi, ni sotshe siletu si na va si di yotwe.

³Va ambate masaka tinzilani ka hombe; txitimwi ka tinyumba tawe, ni mitendelani kwawe, votshe va keta, kambe va dila ngu txiviti.

⁴Ngu kumaha keto, Hesibhoni ni Eleyale va keta; mapswi awe ma pfala kala Jahaza; ngu toneto, ava va nga xoma va Mowabhi vadila; muhefemulo wakwe wa dhudhumela mndani kwawe.

⁵Mbilu yangu ya dila ngu mhaka ya Mowabhi; vahombe vawe va tutumile veya Zowari, kufana ni dirole da malembe mararu, nguko va dila va txi kwelela Luwiti, nguko, nzilani ka Horhonayi, va wusa kudila ka hombe ngutu.

⁶Nguko mati a Ninirimi ma nava ma di phwite; nguko mwasi wu omile, kupwateka ni diphundenyana se kha ku nga ni dizokoro ni da dimwedo do rumbuka.

⁷Se tithomba tile ti nga sengeletwa ni sile va nga veka, va na si yisa txinambwanani ka mipfhuwu.

⁸Nguko huwa yi na hoka mihinganoni ka Mowabhi; kudila kwawe ku na hoka Eglayimi, kala Bheyeri-Eliyi ku na hoka kukuma.

⁹Nguko mati a Dhimomi ma tate ngu mnoha, nguko ni na engetela kambe dikhombo ka ditiko da Dhimomi: Ni tingonyamo ka vale va nga huluka va Mowabhi, ni tithomba ta ditikoni.