Read chopi Isaya 16 Bible Online

Isaya 16 - chopi bible

Isaya 16

¹Rumelani txinvutana ka mfumeli wa ditiko, txi txi khukhela txiwulani ka Sela, kala mmangoni ka dihorana da Siyoni.

²Nguko mahorana a Mowabhi mata mabeloni ka Arinoni, kufana ni sinyana si si purumako, ni mavhondo a ma hangalaswako sisakani ka ona.

³Teka wudhota, hi mahele wululamo, se veka mtsudi wako ni mitshikari wu txi nga wusiku; sisa vale vo tovelwa, u nga ningele vale va tutumako.

⁴Va na luvele kwako awe Mowabhi, vale va nga tovelwa, uva wuthavelo wawe masoni ka mxaseli; nguko m'thu wo xanisa a na va ni magwito; kukhundumuswa ka hangalaswa, se vaxanisi va mwalatwa ha mafuni.

⁵Nguko txikhalo txa wukoma txi na tsaniswa ngu wumbilu, se txitimwi ka txona ku na zumba mlamuli, amu ditendani ka Dhavhidha, awu a no lamula, a lavako wululamo, kambe a kuluvetako kumaha ta tinene.

⁶Hi pfite kutikulisa ka Mowabhi, wa ti kulisa ngutu, ni kutitsimba kwakwe ngutu, ni kutikukumukisa kwawe, ni kuhenya kwawe, kutikukumukisa kwawe nga walo.

⁷Ngu toneto, Mowabhi a na dilela Mowabhi, votshe va na dila; mi na kuma ngu makhato a Kiri-Harezeti, ina, nguko se va dhukisilwe.

⁸Nguko tithembwe ta Hesibhoni ni m'vhinya wa Sibhima, si omile; vanyamne va matiko va phayile mindonga yawe ya yinene; va hoka kona Jazeri; va rerela txiwulani; madhavi a kona ma navile, se ma hokile mtxhatuko ka linene.

⁹Ngu toneto, ni na dila ngu madilelo a Jazeri, i ku m'vhinya wa Sibhima; ni na ku nakanisa ngu mirongo yangu, awe Hesibhoni, ni Eleyale, nguko litsako la hombe la mihando yako ya malanga, ni la kuelula kwako, li mwalate.

¹⁰Se kubhuma ni litsako si thavisilwe thembweni ko nona, mivhinyani kha kuembelelwi, kambe kha ku nga ni kutsaka ka hombe ni kakumweko; ni mkami kha na mbi kamela kambe mauvha amu mapipani. Ani ni malatile kutsaka ka hombe.

¹¹Ngu mhaka yeto, masembe angu ma tuma, ngu mhaka ya Mowabhi, kufana ni txitende, ni mndani kwangu, ngu mhaka ya Kiri-Heresi.

¹²Se ku na maheka taku, mbimo yi Mowabhi a no ti kombekisa, ngako a txi na karala ka makhalo o guleka, a txi wulela dithepeleni kwawe e khongela, kha na mbi mana txilo.

¹³Adiya ngu dona dipswi di MKOMA a ngadi womba kale, do wukela Mowabhi.

¹⁴ Aniko, konkuwa, MKOMA a wombile, a txi khene: Mndani ka malembe mararu, ma fanako ni malembe a m'thu wo holelwa, wudhumo wa Mowabhi wu na maha wa kale, ni dotshe dibutho dakwe da hombe; se miboti ya kona yi na va yidotho, kambe kha va na mbiba ni mtamo.