Read chopi Isaya 17 Bible Online

Isaya 17 - chopi bible

Isaya 17

¹Mahungu a Dhamasku. Wona taku Dhamasku a na thaviswa, kha na mbiswa e maha didhoropa, aniko a na maha mmumbu wa marumbi.

²Madhoropa a ditiko da Aroweri ma na lekwa; ma na lumba mitxhambi, yi na zumba kona, na ku si nga ni wa ku yi dhukisa.

³ Se mkhokhola wa Efrayime wu na lova, kumweko ni mfumo wa Dhamasku, ni m'boti wa Siriya; yi na nga wudhumo wa vanana va Israyeli, kuwomba MKOMA wa Mabutho a Tiyimbi.

⁴Se ka ditshiku donedo ku na hungulwa wudhumo wa Jakobe, ni mafura a mmidi wakwe ma na txutxeka.

⁵Nguko ku na fana ni mfunyeli a elulako fulaho, wule a funyelako mafaka ngu diwoko dakwe; kambe nga wule a funyelako mafaka mkorani ka Varefayime.

⁶Hambi keto, a na salelwa ngu miboti yokari, nga mndonga wa muolivha, wu di zuzilwe: Wu salako ni mihando yimbidi, mwendo yiraru, titshangwe ka madhavi, ni mune mwendo mtxhanu ka madhavi o nava ngutu, a mndonga wo veleka ngutu, kuwomba MKOMA, Txizimu txa Israyeli.

⁷Ka ditshiku dile, m'thu a na wonetela M'vangi vakwe, maso akwe ma na wonetela Msawuleki wa Israyeli.

⁸Se kha na mbi wonetela siluvelo, i ku mthumo wa manza akwe, mwendo kuwonetela si si nga mahwa ngu titiho takwe, hambi ka sithombe sakwe so vatwa, ni sifananiso sa ditambo.

⁹Ka ditshiku dile, madhoropa akwe o tsana ma na fana ni makhalo o lekwa txitingani, mwendo txitimwi ka mimango, ayi yi nga lekwa kale ngu vanana va ka Israyeli; se ku nava ni kuxaselwa.

¹⁰Ngu mhaka yeto, u divate Txizimu txa kuhanyiswa kwako, kambe khwa alakanya dirigwi da mkhokhola wako; ngu mhaka yeto u na phaya mindonga yo tshura, u yi bhiyela ngu mindonga ya vamatiko.

¹¹Ka ditshiku dile u no yi phaya, u na yi bhiyela, se ni mixo mbewu yi na mila; aniko sile so elulwa si na puruma ngu ditshiku da xomulo, ni da kupandiseka ka hombe ngutu.

¹²Dikhombo ka dibutho da hombe da vathu vale va bhongako, nga ti ti bhongisako tona tinene, ni kudhuma ka matiko, ma dhumako kufana ni kudhuma ka mati o tala!

¹³Nga toneto, matiko ma na dhuma, nga ti ma dhumisako tona mati amangi, aniko a na ma malata, se ma na tutuma me tsula kule; kambe ma na hangalaswa nga mwasi wa mmangoni, masoni ka moya, ni ku nga dibwinzi, masoni ka txihuhuri.

¹⁴Ni wusiku, wona taku ku ni kuthava, kambe di si se txa, kha va na mbi vaho. Atxiya njyavelo txa vale va hi handako, ni thomba ya vale va hi hoxotako.