Read chopi Isaya 2 Bible Online

Isaya 2 - chopi bible

Isaya 2

¹[4] Txiwoniso txi a ngave natxo Isaya, mwana Amosi, madingano ni Judha, ni Jerusalema.

²Se ku na maheka to, ka masiku o gwitisa, mmango wa Nyumba ya MKOMA, wu vekwa txitimwi ka mimango, ni kuguleka txitimwi ka simangwana, se matiko otshe ma na tutuma me ya mmangoni.

³Se matiko amangi ma na rambana, ma txi kha ona: Ngonani, a hi kweleleni mmangoni ka MKOMA, Nyumbani ka Txizimu txa Jakobe, kasi ku txi ya hi gondisa tinzila ta txona, se athu hi na tsimbila ngu tinzila ta txona; nguko ku na huma mlayo ngu Siyoni, [5] ni dipswi da MKOMA, ngu Jerusalema.

⁴ Se ene a na lamula txitimwi ka matiko, kambe a na tsayisa matiko o tala; a na hundulusa matxhari awe me maha misuka, ni tingove tawe ti maha masikela; ditiko kha di na mbi guleta ditxhari do lwisa dimwani ditiko; kha va na mbi gondela kambe kulwa yimbi.

⁵Ngonani, anu va nyumba ya ka Jokobe, he tsimbileni kuwonekelani ka MKOMA.

⁶Aniko awe u lekile vathu vako, va nyumba ya ka Jakobe; nguko va tate ngu sihena sa wutxani, va nyawuti kufana ni Vafilista, kambe va ti pata ni vanana va vamatiko.

⁷Se ditiko dawe di tate ngu silivhela ni nzalama; thomba ya dona kha yi gumi; na kona ditiko dawe di tate ngu mahantxhi, sikotxikani sawe kha si gumi.

⁸Kambe ditiko dawe di tate ngu sithombe so vatwa; va khizama masoni ka mthumo wa manza awe, masoni ka sile si nga mahwa ngu titiho tawe.

⁹Koneho, vathu va na namiswa, tinganakana ti na vekwa hahatshi; ngu toneto kha va na mbi divalelwa.

¹⁰ Tsula, wulela mndani ka marigwi, u tisisa mu ka lithulu, masoni ko thaviseka ka MKOMA, ni ka wudhumo wakwe wa hombe.

¹¹Maso a vathu vo ti kulisa ma na pfhupeliswa, ni kutikulisa ka vavamna ku na vekwa hahatshi, MKOMA ngene dwe a no dhumiswa ka ditshiku donado.

¹²Nguko ditshiku da MKOMA wa Mabutho a Tiyimbi, di na va do veka hahatshi votshe va va tikulisako ni ku ti dhumisa.

¹³Di na heta yotshe mikedhari ya Libhanoni, yo guleka ni kulapha; ni mikusu yotshe ya Bhasani;

¹⁴do heta yotshe mimango yo lapha, ni sotshe simangwana so guleka;

¹⁵ni kukhundumusela txotshe txitezi txo lapha, ni dotshe diguma do tsana.

¹⁶E wukela sotshe sitimela sa matini ka Tarxixi, ni sotshe[6] sitimela sa mixowo yo tshura ngutu.

¹⁷Kutikulisa ka m'thu ku na vekwa hahatshi, ni kutikukumukisa ka wamwamna, ku na wiswa hahatshi; MKOMA ngene dwe a no guletwa ka ditshiku donedo.

¹⁸Se sotshe sithombe so vatwa si na fuviswa do gwita.

¹⁹Sekoko vathu va na wulela tiphakoni ka marigwi, ni mu ka maphala a mafuni, ngu mhaka ya kuthava MKOMA, ni kudhumiswa ka wuhombe wakwe, ngako a txi khukha kasi kuxamalisa ditiko.

²⁰Ka ditshiku dile, vathu va na rinza ka mirukunya ni ka madema sithombe sawe sa silivhela ni sa nzalama, asi vona va nga si maha kasi kuva txi si khozela.

²¹Va na wulela mu ka tifa ta marigwi ni mu ka maphala a mimango, ngu kuthava MKOMA, ni kudhumiswa ka wuhombe wakwe, mbimo yile a khukhako, e xamalisa ditiko.

²²Tsulani kule koko ni m'thu wu a ku ni muhefemulo tithonvuni kwakwe; nguko a nga va a txi themba txani kani?