Read chopi Isaya 21 Bible Online

Isaya 21 - chopi bible

Isaya 21

¹Mahungu a txiwula txa linene. Kufana ni sihuhuri sa Wulambwe, si wisetela sotshe, a nata ngu txiwulani, ka ditiko do thisa.

²Ni wonisilwe txiwoniso txo thisa: Mkanganyisi wa kanganyisa, ni mxaseli wa xasela. Kwelela awe Elamu, randela awe Medhi; ni malatile miketo yawe yotshe.

³Ngu toneto, txiwunu txangu txi taletwe ngu kupanda ka hombe; kupandiseka ku ni ñote ku nga kupandiseka ka wule a lumwako; na xaniseka ngutu, aha ko kha ni sikoti ni kuengisa, ni dhukile ngutu, kha ni sikoti ni kuwona.

⁴Mbilu yangu yi vhilukile, na dhudhumela ngu kuthava; kuswa ka ditambo ni nga ti kulava, ku ni mahile ni dhudhumela.

⁵Va longisa meza, va wonelela, vadya, ni kusela; khukhani mi ema anu vathangeli, mi tota sitxhavangu.

⁶Nguko MKOMA a ni gete tiya: Tsula u ya veka muwoneleli, awu a no kugela, ti titako.

⁷“Se ngako wu txita mtxawa wu di gadhile mahantxhi ngu vambidi-vambidi, mtxawa wa timbongola ni mtxawa wa makamelu, ene a na engisele kha kwati ngu kutiwonela ka hombe.”

⁸Se a to dila nga ngonyamo, a txi khene: MKOMA, ni emile txitimwi ka txitezi ni wonelela yotsthe mbimo ni mitshikari, ni wonelela wusiku wotshe.

⁹ Se wonani konkuwa, wata mtxawa wa vavamna ni vagadhi va mahantxhi ngu vambidi-vambidi. Sekoko, a to xamula a txi khene: “Di wite ditiko da Bhabhilona, di wite!” Se sotshe sifananiso sa sizimu sawe so vatwa, si fayekete ha mafuni.

¹⁰O! Awe u nga Hulwa, awe fulaho ya wuhulelo wangu! Ati ni nga tipfa ngu ka MKOMA wa Mabutho a Tiyimbi, Txizimu txa ka Israyeli, ngutu ni nga mi zivisa.

¹¹Mahungu a Dhuma. Va ni kwangulela ngu Seyiri, va txi kha vona: Muwoneleti, nji txani txi nga maheka ni wusiku kani? Muwoneleli, nji txani txi nga maheka ni wusiku kani?

¹²Se muwoneleli a to khene: Mixo yata, wusiku ni wona; se ngako mi txi lava ku wotisa, wotisani; tshumelani mi txita.

¹³Mahungu o wukela Arabhiya. Ni wusiku mi na ya gova sitingani ka Arabhiya, anu vapfhumba va ka Dhedhani.

¹⁴Humani ni mati mi hingeta vopfa ditora; anu vahanyi va ditiko da Tema, hingetani va va tutumako mi va ninga sakudya.

¹⁵Nguko va tutuma masoni ka matxhari, masoni ka ditxhari da kwa mbi phutelwa, ni masoni ka wulaho ni tingove, ni masoni ka yimbi yo thisa.

¹⁶Nguko MKOMA a ni gete tiya: Mndani ka dilembe, kufana ni malembe a vo holelwa, wotshe wudhumo wa Kedhari wu na mwalala.

¹⁷Se mtengo wule wu no sala wa vafuli, tindena ta vanana va ka Kedhari, wu na hungulwa, nguko a wombisile eto MKOMA, Txizimu txa ka Israyeli.