Read chopi Isaya 25 Bible Online

Isaya 25 - chopi bible

Isaya 25

¹Awe MKOMA, ngawe Txizimu txangu; ni na kuguleta, ni dhumisa ditina dako, nguko u mahile sixamaliso, makungo ako a kale nga ditshuri, ni kutsana.

²Nguko didhoropa u di mahile mmumbu wa marigwi, didhoropa do tsana u di mahile dirumbi, se dizumbo da vamatiko, di nga mahe kambe didhoropa, di nge ngadi di aketwa kambe.

³Ngu mhaka yeto, vathu va mtamo va na kudhumisa, se didhoropa da matiko o thisa di na ku thava.

⁴Nguko uve mkhokhola wa txisiwana, kambe uve mkhokhola wa wule wo pwata, kuxanisekani kwawe; wuthavelo masoni ka txihuhuri, ni mtsudi ha lisanini; nguko kufuteta ka vaxanisi, kufana ni txihuhuri txo peka diguma.

⁵Nga lisani ka wukhalo wa kuoma, awe u malatile diguwa da vamatiko, kufana ni lisani li kapeliswako ngu mtsudi wa direfu do hehuka; ngu toneto, ndando ya vaxanisi, yi na xowokiswa.

⁶Se MKOMA wa Mabutho a Tiyimbi a na ninga ka mmango wuwa ka votshe vathu, m'buso ngu sihari so nona, m'buso wa vhinya ya yinene, kudya sakudya sa mafura, kuselwa ni vhinya ya yinene, yo surutetwa kha kwati.

⁷Se mmangoni hawa a na vharula nguwo yi matiko otshe ma tsivako ngu yona tikhohe, ni m'jiyo wu matiko otshe ma sisalako ka wona.

⁸ A na fuvisa lifo ngu ha ku si gwitiko, ngu kumaha keto, MKOMA Txizimu, a na bahula mirongo ka totshe tikhohe, kambe a na thavisa tingana ta vathu vakwe kotshe ha mafuni, nguko MKOMA a wombile.

⁹Se ka ditshiku donedo, va na kha vona: Wonani Txizimu txathu, hi nga ti txi verela, txi na hi hulukisa; awuwa ngene MKOMA, wule hi nga txi m'verela; hi na m'guleta ni kutsaka, kuhanyisani kwakwe.

¹⁰Nguko dianza da MKOMA, di na humula ka mmango wuwa; aniko Mowabhi a na ganyatelwa hahatshi ka wona, kufana ni kuganyatelwa ka mwasi ditalani.

¹¹Se Mowabhi a na nawuluta manza hagari kwawe, kufana ni msambeli a txi lava kusambela; kambe MKOMA a na veka hahatshi kutikulisa ka Mowabhi, hambiko manza akwe i ku a wutxhari.

¹²Se a na wisa mikhokhola yo guleka ya maguma ako, kambe a na ma wisa, a txi ma khundumusela hahatshi, kala me maha lithulu.