Read chopi Isaya 26 Bible Online

Isaya 26 - chopi bible

Isaya 26

¹Ka ditshiku dile, ku na embelelwa ndando ditikoni ka Judha: Hi ni didhoropa do tsana, adi Txizimu txi nga veka ka dona kuhuluka ngu maguma ni tibhingo.

²Tulani matimba, kasi ku di na wulela ditiko do lulama, dile di xayisako ditshuri.

³Awe u na xayisa ngu kudikha awule mapimo akwe ma nga tsana kwako; nguko ene wa kuthemba.

⁴Thembani MKOMA ngu ha ku si gwitiko, nguko MKOMA Txizimu, dirigwi da yotshe mbimo.

⁵Nguko ene wa wisa vale va zumbako ka makhalo o guleka, kambe didhoropa di di guletwako a na di veka hahatshi, a txi di khundumusela, kala di maha lithulu.

⁶Mkondo wu na di ganyatela: Mikondo ya vaxaniseki mazambo a sisiwana.

⁷Nzila ya wo lulama, yi lulamile yotshe, awe ngu kululama, u pima matsimbilelo a mlulami.

⁸Nzilani ka wulamuli wako MKOMA, ha kuverela; ditinani kwako ni mapimoni kwako, kuho kualakanya ka mihefemulo yathu.

⁹Ngu muhefemulo wangu ni ku lavile ni wusiku, se ngu moya wangu wu ku mndani kwangu, ni na phindula ni kulava, nguko, ku di ni wululami wako ha mafuni, vaaki va ha mafuni va gonda wululamo.

¹⁰Hambi ku txi divalelwa m'bihi, kha ti mmahi e gonda wululamo, hambi ditikoni ka wululamo, ene a maha kubiha, kambe kha nga ni mhaka ni wuhombe wa MKOMA.

¹¹MKOMA, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

¹²MKOMA, awe u na hi ninga kudikha, nguko awe ngawe, u nga maha kwathu yotshe mithumo yathu.

¹³Awe MKOMA, Txizimu txathu, vamwani vanyamne va tolovela ku hi fumela, aniko athu hi alakanya ditina dako dwe.

¹⁴Va txi fa vona, kha va na mbi tshumela ve hanya; va txifa, kha va na mbi wuka; ngu toneto, u va endete, u va lovisile, u fuvisa ni ku va alakanya ka kona.

¹⁵Awe MKOMA, u engetete vathu vava, awe u engetete vathu vava, u ti mahile wa wudhumo; kambe u va tshotshile kule, ka yotshe mihingano ya mafu.

¹⁶MKOMA va ku endete kuxanisekani kwawe; mbimo yile txitsayiso txako txi ngata txitimwi kwawe, va to tshakunuta mkombelo wawe wa txihunja.

¹⁷Nga wamsikati wa txirumbu, ngako yi di hokile mbimo yakwe, a ni kupanda ko lava kuveleka, kambe wa peka huwa kupandisekani kwakwe, hi mahile toneto nathu, ngu kulava khohe yako, awe MKOMA!

¹⁸Hi ti ti ni sirumbu athu, hive ni kupanda ko lava kuveleka, aniko eto kha ta hambana ni kuve moya; kha ha tisa kutxhatxhisa ha mafuni, kambe kha vawa vahanyi va ha mafuni.

¹⁹ Vafi vako va na hanya, vafi vako va na wuka; vhumukani, kambe giyani, anu mi zumbako lithuluni, nguko mwando wako, awe Txizimu, wu na fana ni mwando wa mwasi, se mafu ma na tshotsha mapune vafi.

²⁰Tsulani, koko, anu vathu vangu, wulelani tinyumbani kwanu mi ti sekela matimba, baramani ngu mbimoanyana, kala kuza kuboxa kuhenya.

²¹Nguko wona taku MKOMA a na khukha ka wukhalo wakwe, kuya tsayisa vahanyi va ha mafuni, ngu mhaka ya wubihi wawe; se mafu ma na vhunungula mnoha wawe, aniko kha ma na mbi fenengeta kambe vale va nga dawa.