Read chopi Isaya 27 Bible Online

Isaya 27 - chopi bible

Isaya 27

¹Ka ditshiku dile, MKOMA ngu ditxhari dakwe do banga, da hombe, da mtamo, a tsayisa Levhiyatani, i ku mnyoka wa livilo, Levhiyatani, mnyoka wo gombonyeka, kambe a na daya dragoni a ku lineneni.

²Ka ditshiku dile, ku nava ni thembwe ya vhinya ya mxowo wo bhilivhila; yi embeleteni.

³Ani MKOMA, na verela, se ka mbimo ni mbimo ni na theletela mati, kasi ku ni wammweyo asi onheteli, wusiku ni mitshikari ni yi xayisa.

⁴Kha ku nga ni kuhenya kwangu; i mani a ndi no veka sitxhotxhota ni mipa masoni kwangu yimbini kani? Ani ni ndi na va wukela, ni va hisa.

⁵Mwendo wa kuhonyola mtamo wangu, a txi va ni kudikha ni nani, ina, a nave ni kudikha ni nani.

⁶Ma nata masiku ale Jakobe a no mila mitwi, se Israyeli a na veka siluva e mila, kambe va na tata mafu ngu mihando.

⁷Ina ene a ngava a di dayisile Israyeli, kufana ni tile a nga dayisisa tona vale va nga m'dayia kani? Mwendo ene a va date kufana ni tile a nga dayisa tona vale va nga dawa ngu ngene kani?

⁸Ngu mpimo u lwite nayo mbimo yile u nga mlamba; ene a mthavisile ngu moya wakwe wa hombe, ngu mbimo ya moya wa wutxani.

⁹Ngu mhaka yeto, txi na thaveka txionho txa Jakobe, se awuwa wu na va m'hando wotshe wa kuva ku di thavisilwe txionho txakwe; mbimo yi a no maha ti to, otshe marigwi a ha txiluveloni, kufana ni marigwi a dibumba, ma nga khundumuselwa, tiphande ni sithombe sa ditambo, kha si na mbi ema

¹⁰Nguko didhoropa da mtamo di sate dokha, dizumbo do lambwa ni kulekwa kufana ni txiwula; eyo va na dyisela kona marole, kambe ma na otela kona, me dya madhavi a kona.

¹¹Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.

¹²Se ku na maheka ka ditshiku dile taku, MKOMA e sengeleta mihando yakwe, kukhukhela milongani ka mnambo, kala ka mnambo wa Egipta; se anu vanana va ka Israyeli, mi na haphelwa, mmweyo-mmweyo.

¹³Se ku na maheka ka ditshiku dile, taku ku na vetwa mpundu wa hombe, se vale va nga ti mwalate ditikoni ka Asiriya, ni vale va nga tsuliswa ditikoni ka Egipta, va na tshumela ve wuya, ve ta khozela MKOMA, mmangoni ko sawuleka, kona Jerusalema.