Read chopi Isaya 3 Bible Online

Isaya 3 - chopi bible

Isaya 3

¹Nguko wona taku MKOMA, Txizimu txa Mabutho a Tiyimbi, a na thavisa ka Jerusalema ni ka Judha, ndonga ni mtxheketelo,[7] ni otshe mati o tima ditora.

²Tindena ni masotxhwa, valamuli ni vaprofeti, muhuti ni didhota;

³mthangeli wa mtxhanu wa magumi a masotxhwa, ni vathangeli, didhota ni m'thu wo ziva kuthuma ni wa kuziva kuwombawomba;

⁴na va ninga mazambi kasi ku ma txi maha vathangeli vawe, ni vanana va na va fuma.

⁵Se vathu votshe va na xanisana, hambi vaakelani va na xanisana, ni mwanana a na xanisa didhota, vanyalidede va na xanisa vo thaviseka.

⁶Mbimo yi m'thu a no ñola mwanawe nyumbani ka tate wakwe, a txi khene: Awe u ni syambalo, u na maha mfumeli wathu, dirumbi diya di na xayiswa ngu ngawe.

⁷Ka ditshiku donedo a na guleta dipswi, a txi khene: Kha ni na mbi maha ñanga, nguko nyumbani kwangu kuwalo sakudya, hambi syambalo; mi nga ni maheni mthangeli wa vathu.

⁸Nguko Jerusalema a khavilwe ni ditiko da Judha di wite, nguko lidimi lawe ni mithumo yawe silwa ni MKOMA, ve sola wudhumo wakwe.

⁹Tikhohe tawe ta va kona; va andisa sionho sawe, kufana ni Sodhoma; kha va si baramisi. Dikhombo ka mihefemulo yawe! Nguko vo ti mahela kubiha vona vapune.

¹⁰Gelani va vo lulama ti to va katekile, nguko va na dya mihando ya mithumo yawe.

¹¹Dikhombo ka vakubiha! Nguko va na ningwa hakhelo ya mithumo ya manza awe.

¹²Vaxanisi va vathu vangu mbanana, se vavasikati ngu vona va ku mu ko duketa wukoma. Yowe! Vathu vangu! Ava va mi thangelako, va mi xenga, va mi onhela nzila yi mi tsimbilako ngu yona.

¹³MKOMA a to khukha a txi ema e womba-womba, e huma, kasi kulamula vathu.

¹⁴MKOMA a thethisa madhota a vathu vakwe kumweko ni vathangeli vawe; nganu mi nga onha thembwe yiya ya m'vhinya; asi mi nga honyola ka sisiwana si maneka tinyumbani kwanu.

¹⁵Ngu kutxani mi xanisa vathu vangu, ni kutshinda tikhohe ta sisiwana kani? Kuwomba MKOMA, Txizimu txa Mabutho a Tiyimbi.

¹⁶MKOMA a to womba kambe a txi khene: Nguko mahorana a Siyoni ma ti kulisa, ma tsimbila ma di emisile tithamo ta ona, ma wonisa kugwilika, ma tsimbilisa ku nga mo sinya, se[8] ma di ambate masinda minengeni.

¹⁷Ngu toneto, MKOMA a na peka misungo ya mahorana a Siyoni, MKOMA a na vhunungula wumbwuri wa ona.

¹⁸Ka ditshiku donedo, MKOMA a na va tekela si va ti tshuriselako ngu sona, sigoko sawe ni masinda awe;

¹⁹sikurufu ni tiketani, ni syambalo so vangamela;

²⁰mibhoti, ni masinda o tshurisa ngu ona mawoko, ni tiketani, ni sibutxhangwana sa mafura o bhumula, ni singeda;

²¹tiringi ni sikurufu sa mu ka tithonvu;

²²syambalo sa mibuso ni majasi, ni sikatawu, ni sipeneti;

²³sibuko, ni mahembe a linyu yo hehuka, ni mafadhuko, ni masilika.

²⁴Se ku na maheka taku, wukhaloni ko bhumula, ku nava ni kununga; se wukhaloni ka libhande, ku nava ni ngoti; wukhaloni ka misisi, ku na maneka tipala; wukhaloni ka syambalo sa mibuso, ku na ambalwa masaka; wukhaloni ka kutshura ngutu, ku nava ni sibawa so hiswa ngu mndilo.

²⁵Vavamna vako va na dawa ngu ditxhari, ni tindena tako ti na guma yimbini.

²⁶Se sike sa didhoropa si na va kupandisekani ni kudilani; ene a na handwa e khalahatshi hahatshi.