Read chopi Isaya 30 Bible Online

Isaya 30 - chopi bible

Isaya 30

¹Dikhombo ka vanana va i ku vakaneti, kuwomba MKOMA, ava va nga mana wudhota, va si wu mani kwangu! Kambe va nga ti vhikela ngu txivhikelo txova i si nga Moya wangu, kasi kuengetela txionho ka txionho.

²Va relelako veya Egipta, na va si wotisi txilo kwangu, kasi kuya ti tsanisa ngu mtamo wa Faro, ni kuveka themba yawe ka mtsudi wa Egipta!

³Nguko mtamo wa Faro, wu na mi thela tingana, ni kuthemba mtsudi wa Egipta, ku na mi wusela pfilu-pfilu.

⁴Nguko vathangeli vakwe va maneka Zowani, ni vakombisi vakwe va hokile Hanesi.

⁵Vona va nawa tingana, ngu vathu va ku kha va na mbi va mahela txilo, hambi ngu txivhuno mwendo dibhindu, aniko va nawa tingana ni kuxowoka.

⁶Mahungu a sihari sa Wulambwe. Ka ditiko da txixaniso ni xomulo (kutako ngu ka dona mnyoka, ni mwamilambo wo tura, a purumako), va na sanzeka tithomba tawe aha ka simbongolana, ni txitimwi ka malunda a makamelu, tithomba tawe, ka vathu va va na kwa mbi bhindula txilo kwawe.

⁷Nguko Egipta a na va vhuna walo, se va si hoki ka magwito a txilo, ngu toneto, ni dite ngu mhaka yiya: Kumalalani kwawe, ku nava ni mtamo wawe.

⁸Tsula koko konkuwa, u txi ya bhala tiya aha ka dipulango, masoni kwawe, kambe ti bhale amu ka dibhuku; kasi ku ti zumba ti di bhatwe, ka mbimo yitako, ngu ha ku si gwitiko, kala kupinduka.

⁹Nguko vathu vava mba kaneti, mbanana vo womba-womba makuhu, vanana vo mbi lava kuengisa Mlayo wa MKOMA.

¹⁰Va ku kha vona ka tiñanga: Mi nga ti woneni; ni ka vaprofeti va txi kha vona: Mi nga profeteni kwathu ti i ku to lulama; hi geleni ti to tsakisa, kambe mi dingana ku hi guleta;

¹¹vayilelani nzila, mi huma amu ka txinzilana; mahani ti to Msawuleki wa Israyeli asi maneki hagari kwanu.

¹²Ngu mhaka yeto, Msawuleki wa Israyeli a khene: Ta woneka taku ma lamba dipswi diya, se mi themba kutsindaveta ni kuweketa, ngu mhaka yeto, ma ti khweketa

¹³Ngu mhaka yeto, wubihi wuwa kwanu, wu na nga diseta di di ku ni lifa, do humisa mrumbu kukhukhela txitimwi ngutu, adiya kuwa ka dona, ku nota ngu txidhukisa.

¹⁴Se a na txi faya, nga ti txi fayiswako tona txiya txa muwumbi, a txi txi faya, kha na mbi txi tsetsa; kha ku na mbi maneka ni txirengele tximwetxo, txo hala ngu txona mndilo ha txikho, mwendo kureka ngu txona mati txisimani.

¹⁵Nguko MKOMA Txizimu, Msawuleki wa Israyeli, a khene: Ngu kuhunduluka ni kuthutha, ku ndi na maneka kuhanyiswa kwanu; kuzumbisekani ni mu ka kuthemba, ku ndi na maneka mtamo wanu, aniko kha ma ti lava.

¹⁶Aniko mi khanu: Ahim-him; hi na tutuma ngu mahantxhi; hambiko mi na tutuma; kambe mi khanu: Hi na gadha mahantxhi a livilo; ngu mhaka yeto, vatutumisi vanu, va na va ni livilo.

¹⁷1.000 wa vavamna, va na tutuma, ngu kuviketwa ngu wammweyo, se ku txo viketa va mtxhanu, motshenu mi na tutuma, kala kuza mi lekwa mi di songile nga phande tshokani ka mimango, ni kufana ni m'jeke tximangwanani.

¹⁸Ngu mhaka yeto, MKOMA a na verela ku mi mahela wumbilu; kambe ngu kumaha keto, a na guletwa kasi ku e mi pfela wusiwana, nguko MKOMA Njizimu to dinganisa. Va katekile votshe vale va thembako kwakwe.

¹⁹Nguko vathu va na zumba Siyoni, kona Jerusalema; khu na mbi dila kambe; ngu ditshuri a na kupfela wusiwana, ka dipswi da kudila kwako; se a txi dipfa, a na kuxamula.

²⁰MKOMA a na mi ninga dipawu da didotho, ni mati amadotho, aniko vale va kurumako, kha va na mbi tutuma kwako, ku nga vo puruma ngu tibhapi; maso ako ma wonetela vagondisi vako.

²¹Se tinzeve tako ti na engisa dipswi msana kwako, di txi kha dona: Nzila ngu yona yi; tsimbilani ka yona, mi nga jikeni miya txinene mwendo txibhabha.

²²Kambe asi si vhikelako sithombe sako sa nzalama, si na va si di nyenyezisilwe, ni si si vhikelako sithombe sako so tshulwa ngu nzalama; se u na si tshotsha hahatshi nga sigwanda sa nzambwa, kambe u na khawe ka tximwetxo ni tximwetxo txa sona: Humani hawa!

²³Sekoko a na nisa mati txitimwi ka mbweu yi u no phaya mafuni; kumweko ni dipawu dadiphya da mafuni; mafu ma na nona me pfuna; ka ditshiku dile, sifuyo sako si nadya ka makhalo o anama a wudyiselo.

²⁴Se tihomu ni timbongola ti ti dimako mafu, ti na dya mafaka amanene ngutu, o vhuwa ngu mikondo, ni kutshindwa ngu txitshindo.

²⁵Kambe ka yotshe mimango yo lapha, ni ka sotshe simangwana so guleka, sinambwana ni milonga ya mati, ka ditshiku da kudawa ka hombe, mbimo yile si nowa sitezi.

²⁶Kuwoninga ka mtxima ku na fana ni kuwoninga ka ditambo, se kuwoninga ka ditambo ku na engetelwa ka mtxhanu ni kumbidi, kufana ni kuwoninga ka mtxhanu wa masiku ni mambidi, ka ditshiku dile MKOMA a no sungelela mule ku nga phatukela, ni kukalamukisa silonda sa kona.

²⁷Wonani taku, ditina da MKOMA dita ngu kule, di txi tura ngu txiviti txakwe, di hangalasa wutshi wo phuma; txisofu txakwe txi tate ngu kuhenya, ni lidimi lakwe li fana ni mndilo wo tshokomisa;

²⁸kuhefemula kwakwe kufana ni txinambwana txi thekelelako, txa mati o gwitela mkoloni, kasi kutsetseta matiko ngu txiselo txo mbi vhuna txilo; ni matomu o pengisa, ma nava titshayani ka vathu.

²⁹Ku nava ni ndando hagari kwanu, kufana ni wusiku wu ku mahwako m'buso wo sawuleka; ni kutsaka ka mbilu, ko fana ni ku humako mbimo ku yi ku vetwako tshodi, kasi ku ta mmangoni ka MKOMA, ka dirigwi da ka Israyeli.

³⁰Se MKOMA a na pfalisa wudhumo wa dipswi dakwe, kambe a na wonekisa kurelela ka diwoko dakwe, ni kupandiseka ka txiviti, ni m'dhikila wa mndilo wakwe wo tshokomisa, ni nyangafula, ni ndambi, ni marigwi a maralala.

³¹Nguko Asiriya a na khundumuswa ngu dipswi da MKOMA, a ngadi peka ngu ndonga.

³²Se ngu kupeka kumweko ni kumweko ka ndonga ya wulamuli ayi MKOMA a no peka ngu yona, ku nava ni singomana ni tiharipa; se ni kulwa ka pfilu-pfilu, ku na va wukela.

³³Nguko txikho txi lulamisilwe kukhukhela nyamnova, ina, kululamisetwe mfumeli; ene a lulamisile ngu kutshimisa ni kuanamisa; mtamo wakwe mndilo, kambe wu ku ni tikhuni to tala; kufuteta ka MKOMA ko fana ni ka mnambo wa txivavula, ku na txi dhivela.