Read chopi Isaya 31 Bible Online

Isaya 31 - chopi bible

Isaya 31

¹Dikhombo ka vale va relelako Egipta kuya kombela kuvhunwa; kambe va thembako mahantxhi! Va ku ni themba ni sikotxikani, nguko i ku sasingi, ni vagadhi va mahantxhi, nguko mba mtamo ngutu; va singako ni mhaka ni Msawuleki wa ka Israyeli, kambe kha va lavi MKOMA.

²Hambi keto kambe, nene ana ni wutxhari, a na tisa wubihi, kha na mbi tshumeta mapswi akwe; a na wukela nyumba ya vamahi va kubiha, ni sivhuno sa vale va mahako kubiha.

³Nguko Vaegipta mbathu, hi nga Txizimu, ni mahantxhi awe i nyama, hi nga moya. Se mbimo yi MKOMA a no guleta diwoko dakwe, votshe va na wa hahatshi, m'vhuni ni wu a vhunwako, votshe va na loviswa kumweko.

⁴Nguko MKOMA a ni gete tiya: Kufana ni kubhonga ka ngonyamo ni ka txingonyamwana, na ti di mani mpfimba wa tona, hambi ti txi rambelwa dibutho da vadyisi, kha ti dhukiswi ngu mapswi awe, hambi kututuma ngu kuthava wungi wawe. Ngu toneto, MKOMA wa Mabutho a Tiyimbi, a na txhika kuya lwela mmango wa Siyoni, ni tximangwana txa kona.

⁵Kufana ni sinyana si purumako, ngu toneto, MKOMA wa Mabutho a Tiyimbi, a na xayisa didhoropa da Jerusalema; a na di vhikela ni ku di hulukisa, kambe a na di hanyisa.

⁶Hundulukelani ka wule koko vanana va ka Israyeli va nga mtshuralela ngutu.

⁷Nguko ka ditshiku dile, mmweyo ni mmweyo, a na tshotsha kule sithombe sakwe sa silivhela, ni sithombe sakwe sa nzalama, si nga mahwa ngu manza anu, kasi ku mi onho.

⁸Se Asiriya a na wiswa ngu ditxhari, na i si nga ngu m'thu; ditxhari di di si lumbiko m'thu di na mlovisa, kambe a na tutuma masoni ka ditxhari, ni mazambi akwe ma na xulwa.

⁹Se ngu dizowa a na pinda dirigwi dakwe da wuthavelo, ni vathangeli vakwe va na tshotsha m'jeke, kuwomba MKOMA, awule mndilo wakwe wu ku Siyoni, ni txikho txakwe txa hombe txi ku Jerusalema.