Read chopi Isaya 32 Bible Online

Isaya 32 - chopi bible

Isaya 32

¹Mfumeli a na fuma ngu kululama, se vathangeli va na fuma madingano ni wulamuli.

²Se wamwamna wule a na fana ni txivhikelo txo vhikela moya, a na nga wuthavelo ka txihuhuri, ni ku nga lidhonga la mati ka makhalo a kuoma, ni mtsudi wa dirigwi da hombe ka ditiko da txihala.

³Se maso a vale va wonako kha ma na mbi wona msana; ni tinzeve ta vale va engisako, ti na engisisa.

⁴Se timbilu ta va vo mbi thembeka, ti na mana wutxhari; ni tidimi ta vo kangamela ti na womba-womba ngu kutxhatxheka.

⁵Txiphukuphuku kha txi na mbi ngadi txi dhanwa taku nja lisima; hambi wa wutona kha na mbi dhanwa taku mbwo hana.

⁶Nguko txiphukuphuku txi womba-womba wuphukuphuku, ni mbilu ya txona yi maha to biha, ni kuthumisa wukanganyisi, kasi kuwombawomba ta walo, to wukela MKOMA, se txi tona muhefemulo wa wule a ku ni nzala, ni kutona mati awu a ku ni ditora.

⁷Kambe siya sa wa likungo si bihile; ene a sika makungo o biha, kasi kuonha vale vo thutha, ngu mapswi awalo, hambi ngako txisiwana txi txi womba ditshuri.

⁸Aniko txisiwana txi maha makungo amanene, se ngu wunene txi simama txi di emile.

⁹Khukhani mi ema, anu vavasikati vo zumbiseka, kambe engisani dipswi dangu; se anu vanana vamahorana o tithemba ngutu, riyani tinzeve mi engisa mapswi angu.

¹⁰Nguko msana ka dilembe ni masikwanyana, mi na karatwa anu vavasikati vo ti themba; nguko kuhaphelwa ka mihando ku na gwita, hambi kufunyelwa kha ku na mbiswa ku diho.

¹¹Dhudhumelani, anu vavasikati vo zumbiseka, kambe karatekani anu mi ti thembako ngutu; thavisani syambalo sanu, mi sala mi di simbwiri, se mi ambala masaka siwununi kwanu.

¹²Pekani tikhana, mi dilela thembwe yanu yo nona, ni mivhinya yo veleka ngutu.

¹³Txitimwi ka ditiko da vathu vangu, ku na mila sihaha ni sitxhotxhota, kumweko ni txitimwi ka totshe tinyumba to tsaka ka tona, ka didhoropa di di ndakandakako ngu kutsaka.

¹⁴Nguko nyumba ya wukoma yi na sala yokha, diguwa da didhoropa di na guma; mimango ni sitezi sa vawoneleti si na maha tiphako ka yotshe mbimo, emo timangwa ti no tutuma-tutuma kona, ku txi maha lihawu la sifuyo.

¹⁵Kala kuza wu txhika txitimwi kwathu Moya wa txitimwi; sekoko txiwula txi na hinduka txi maha thembwe yo nona, kambe thembwe yo nona yi na maha txitinga.

¹⁶Se kulamula ku na zumba txiwulani, ni wululamo wu na maneka thembweni ko nona.

¹⁷Se simaho sa kululama si na va kudikha, ni mthumo wa kululana wu na va kuzumbiseka, ni kutsana ko mbi guma.

¹⁸Vathu vangu va na zumba ditikoni ka kudikha, ka tinyumba to tsana ngutu, ni ka makhalo o humula ngu kuthutha,

¹⁹hambi kutxiwa maralala, kuwiswa ni txitinga, ni didhoropa di na wiswa do gwita.

²⁰Mi katekile anu mi phayako txitimwi ka otshe mati, kambe mi ningako kutxhatxheka ka minenge ya tihomu, ni ya timbongola.