Read chopi Isaya 34 Bible Online

Isaya 34 - chopi bible

Isaya 34

¹Tshuketani anu matiko, mi ta engisa; se anu vathu, engisani; mafu ma na tipfe, ni kutala ka ona; mafu ni sotshe si si humako ka ona.

²Nguko kuhenya ka MKOMA ku txitimwi ka otshe matiko, ni txiviti txi txitimwi ka otshe mabutho a ona; ene a ma khundumusile do gwita, kambe asi ningete kudawani.

³Se vafi va na rinzwa, sirumbi sawe si na nunga, ni mimango yi na nyivilikiswa ngu mnoha wawe.

⁴ Se otshe mabutho a nzumani ma na guma, kambe nzuma yi na petwa nga dibhuku, ni dotshe dibutho da sa nzumani di na wa, kufana ni kuwa ka mazokoro a m'vhinya, ni ku nga kuwa ka dikuwu da mkuwu.

⁵Nguko ditxhari dangu di levile nzumani; wona taku di na wela txitimwi ka Edhomi, ni txitimwi ka vathu vangu, vo ruketelwa, kasi kuya lamula.

⁶Ditxhari da MKOMA di tate ngu mnoha, di tate ngu mafura, ni mnoha wa sinvuntana ni wa vamabhongwe, ngu mafura a titsho ta tihamba, nguko MKOMA a ni mphaxo kona Bhozira, ni kudayela ka hombe ditikoni ka Edhomi.

⁷Ni tinyari ti na txhika nayo, marole, ni madhuna; kambe mafu awe ma na sela mnoha wa sona me khura, ni lithulu lawe li na tala ngu mafura.

⁸Nguko ditshiku da kuphota ka MKOMA, dilembe da kutshumetela ka kulwa ka Siyoni.

⁹Se sinambwana sakwe si na hinduka si maha mraka, ni lithulu lakwe li na maha txivavula, se mafu akwe ma na maha mraka wo tura.

¹⁰Hambi ni wusiku mwendo ni mitshikari kha wu na mbi timeka; wutshi wa kona wu na kwelela yotshe mbimo; wu na omiswa ka liveleko ni liveleko, kambe ka dizana ni dizana kha ku na mbi pinda m'thu ni wammweyo ngu kona.

¹¹Aniko disekwa, ni nungu, si na zumba kona, se disukulu ni digwana si na aka kona, kambe ene a na gwimba ngoti ya tipfilupfilu, ni txidinganiso txa mipimiso yo biha.

¹²Vona va na dhana vale va lisima veta mfumoni, aniko ni wammweyo kha na mbi vaho, votshe vathangeli vawe kha va na mbi va va txilo.

¹³Se tinyumbani kwawe ka wukoma ku na mila mipa, maxexo ni sihaha ka mikhokhola yawe; ku na maha dizumbo da vamwamilambo, ni m'hubhe wa sisondo sa timbuwu.

¹⁴Se sitoli si na manana ni magoya; vamabhongwe va na dhanana kona; ni sihari sa wusiku si na zumba koneho, kambe si na mana wukhalo waku si humula ka wona.

¹⁵Si na aka kona sisuku, kambe si na veka manda a sona, si na tshotshora vanana va sona, si txi va veka hahatshi ka mitsudi ya sona; kambe makoti ma na tshangana mamwewo ni mamwani.

¹⁶Lavani mu ka dibhuku da MKOMA, mi gonda: Kha txi ngaho ni txa tximwetxo txi no tandeka, kha ku na mbi pwateka ni txa tximwetxo hambi tximwani; nguko txisofu txakwe txipune txi leletile, kambe moya wakwe wupune wu na si sengela.

¹⁷ Nguko ene apune a xaxuvile tixolo, ni dianza dakwe di si abanisete ditiko ngu ngoti; si na di fumela yotshe mbimo, ku na zumba liveleko ni liveleko ka dona.