Read chopi Isaya 39 Bible Online

Isaya 39 - chopi bible

Isaya 39

¹Ka yona yile mbimo, Merodhake-Bhaladhani, mwana Bhaladhani, mfumeli wa Bhabhilona, a to rumela mapapilo ni txihiwa ka Ezekhiya, nguko a ti ti pfite taku a ti nga lwala, niku se a kalamukile.

²Se Ezekhiya a to va amukela ngu kutsaka, eya va komba nyumbani ya thomba yakwe, ni silivhela ni nzalama, ni makha, ni mafura o bhumula kha kwati, ni txisangala txakwe txa matxhari, ni sotshe sile si ngadi sisangalani kwakwe; kha ka maneka ni txa tximwetxo txi Ezekhiya a nga mbi va komba, hambi txa nyumbani kwakwe mwendo txa wukoma wakwe wotshe.

³Sekoko mprofeti Isaya, a tile ka mfumeli Ezekhiya, a txi ta khene: Vavamna vale va ti kha vona txani, niku va khukhela hani va txi ta kwako kani? Se Ezekhiya a to khene: Va tile ngu ka ditiko da kule ngutu, i ku Bhabhilona.

⁴Se ene Isaya a to khene: Va woni txani nyumbani kwako kani? Se Ezekhiya a to khene: Va woni sotshe si si kuho nyumbani kwangu; kha ku nga ni txa tximwetxo txi ku sisangalani kwangu, ni nga mbi va komba.

⁵Sekoko Isaya a to khene ka Ezekhiya: Engisa dipswi da MKOMA wa Mabutho a Tiyimbi:

⁶Wona, ma nata masiku awa aku, sotshe si nova si diho nyumbani kwako, si nga sengeletelwa ngu vatate vako kala ka ditshiku da nyamsi, si na tekwa si tsuliswa Bhabhilona; kha ku na mbi sala ni txa tximwetxo, kuwombile MKOMA.

⁷ Se ka vanana vako, ava va no velekwa ngu ngawe, va na tekwa veya mahwa mithenwa, nyumbani ka mfumeli wa Bhabhilona.

⁸Sekoko Ezekhiya, a to khene ka Isaya: Ndinene dipswido da MKOMA, u nga ni gela. E engeta a txi khene: Nguko ku na vaho kudikha ni kuzumbiseka ka masiku angu.