Read chopi Isaya 42 Bible Online

Isaya 42 - chopi bible

Isaya 42

¹ Wonani Txithumi Txangu, txi ni txi seketelako, Msawulwa wangu, awule moya wangu wu mtsakelako; Ni vekile Moya wangu txitimwi kwakwe; a na humisa kululama hagari ka vamatiko.

²Kha na mbi dila, kha na mbi henya, hambi dipswi dakwe kha na mbi di pfalisa mitendelani.

³Litshava li li nga thidyaka, kha na mbi li funya, kambe kha na mbi tima ngoti yi yi tuvikako; ngu ditshuri a na humisa wululamo.

⁴ Kha na mbi pwateka, kambe kha na hambi funywa, kala kuza e veka wululamo ha mafuni. Se sitondolo si na vereka mlayo wakwe.

⁵ A womba tiya MKOMA Txizimu, awu a nga vanga nzuma, e yi nawuluta, kambe a vangile mafu, ni sotshe si ma si humisako, a ningako kuhefemula ka vathu va va ku ka ona, ni moya, ka vale va tsimbilatsimbilako ka ona.

⁶ Ani MKOMA ni ku dhani ngu kululama, kambe ni na kuñola ngu dianza, ni na kuxayisa; ni na kuningela uva txitumelelano txa vathu, ni kuva liwoningo ka vamatiko;

⁷kasi kutula maso a mabhofu, kasi kuhumisa vo sungwa kusungwani, ni mkorani avale va ku txidemani.

⁸Ani ngani MKOMA; adiya ditina dangu; wudhumo wangu koko, kha ni na mbi ninga mmwani, hambi kudhumiswa kwangu, kha ni na mbi kuningela ka sithombe so vatwa.

⁹Wona taku, timhaka ta kale ti pindile, na mi zivisa timhaka ta tiphya, na mi zivisa ti sanzi kuwoneka.

¹⁰Embelelani ka MKOMA dando ya yiphya, ni ku m'dhumisa kukhukhela magwito ka mafu, anu mi sambelako lineneni, ni sotshe si si ku ka lona; anu sitondolo, ni vaaki va sona.

¹¹Guletani mapswi awe txiwula ni nanu madhoropa, ni mikhokhola yi Kedhari a zumbako ka yona; va na gulete avale va zumbako marigwini, va na kwangule ngu txitimwi ka mimango.

¹²Ningani wudhundo ka MKOMA, mi zivisa wudhumo wakwe mu ka sitondolo.

¹³MKOMA a na huma kufana ni ndena, kufana ni m'thu wa yimbini, a na wusa kukhatala; a na kwangula, e maha diguwa da hombe, kambe a na veka hahatshi valala vakwe.

¹⁴Nguko ni malate mbimo yo lapha, ni di malate, ni ti ñola; se konkuwa ni na peka tihuwa, kufana ni wu a ku ha ko veleka, kambe votshe ni na va xasela, ni va mita.

¹⁵Mimango ni simangwana si na va txiwula, wotshe mwasi wa kona ni na wu omisa, minambo ni na yi maha sitondolo, se ni omisa maziva.

¹⁶Ni na tsimbitisa mabhofu ngu nzila yi ma si yi ziviko, ni na ma maha me tsimbila ngu magondo ale ma nga mbi ma ziva; ni na hundula txidema txi maha kuwonekela masoni kwawe; ni so maha so gombonyeka ni na si lulamisa. Simaheso ni na si maha, kambe kha ni na mbiswa ni va leka.

¹⁷Va na tshumelela msana se va na wa tingana avale va thembako sithombe so vatwa, va ku kha vona ka sithombe so wumbwa: Anu mi sizimu sathu.

¹⁸Anu maphazeve engisani, ni nanu mabhofu wonani, kasi ku mi txi na kota kuwona.

¹⁹I mani i ku dibhofu, i si nga txithumi txangu, mwendo diphazeve kufana ni txirumwa txangu, atxi ni txi rumako kani? Niku i mani i ku dibhofu kufana ni wule a randekako, i ku dibhofu kufana ni txithumi txa MKOMA kani?

²⁰Awe wa wona so maha sasingi, aniko khu si vekisi; hambi u di tute tinzeve, khu engisi txilo.

²¹MKOMA a ti ti tsaka ngu ngene, ngu kuranda ka kululama kwakwe; a mkulisile ngu mlayo, e mmaha wo dhundeka.

²²Kambe avava mbathu vo pelwa ni kuhandwa; votshe va rinzilwe maphalani, ni kusiswa tinyumbani ka mikora; va ñotwe, kuwalo wo va txhatxhisa; va handwa, kha ku nga ni wo khene: Tshumeta!

²³I mani a kuho hagari kwanu a tipfako tiya kani? A wonisisako e pfisisa ati ti nova ngu tona msana keto kani?

²⁴I mani a nga ningela Jakobe kuva e handwa, ni Israyeli manzani ka makhamba kani? Ina hi nga MKOMA wule va nga muonhela, wule va nga lamba kutsimbila ngu nzila yakwe, va si engisi mlayo wakwe kani?

²⁵Ngu mhaka yeto, a tshakunutile kuhenya kwakwe txitimwi kwawe, ni mtamo wa yimbi. Se a va vekete m'dhikila madhawani, kambe kha va tipfisisa txilo keto; a va hisile aniko kha va veka mbilu yawe keto.