Read chopi Isaya 43 Bible Online

Isaya 43 - chopi bible

Isaya 43

¹Se konkuwa, kuwomba MKOMA, wule a nga kuvanga, awe Jakobe, kambe a nga kuwumba awe Israyeli, a khene: U nga thave, nguko ani ni ku tirute; ni kudhani ngu ditina dako; awe u wangu.

²Ngako u txi txhatuka matini, ni na va ni nawe, hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m'dhikila kha wu na mbi kuhisa.

³Nguko ani ngani MKOMA Txizimu txako, Msawuleki wa Israyeli, Mtxhatxhisi wako; ni ningete Egipta kuva mtxhatxhisi wako, ni Etiyopiya, ni Sebha, ka wukhalo wako.

⁴Ngako u nga randeka masoni kwangu, kambe u dhundekile, se ani ni ku randile, niza ni ningela vathu ngu mhaka yako, ni ningela matiko kasi ku kuhanyisa.

⁵U nga thave koko, nguko ni ni nawe, ni na wuyisa vanana vako ngu wutxani, ni kusengeleta kukhukhela mswa-ditambo.

⁶Ni na khani ka Wuphemba: Naheta! Ni Wulambwe ku khani: U nga lambe! Wuyisani vanana vangu ngu kule, ni vanana vangu vamahorana, ngu magwito ka mafu,

⁷ka votshe vale va dhanwako ngu ditina dangu, ni vale ni nga va wunja, kasi kuva wudhumo wangu; ani ni va wumbile, ina, ani ni va vangile.

⁸Tisani vathu va i ku mabhofu, avale va ku ni maso; ni maphazeve ale ma ku ni tinzeve.

⁹Matiko otshe ma na sengeletane, ni vathu va na tshangane; i mani hagari kwawe a nga sikotako kuzivisa tiya, e hi maha hi engisa timhaka ta kale kani? Kombisani tifakazi tanu, kasi ku mi ti basisa, ni ti to ti pfiwa, ni ti to ku txi wombwa taku: Ditshuri!

¹⁰Anu mi tifakazi tangu, kuwomba MKOMA; txithumi txangu txile ni nga txi sawula; kasi ku mi na tiziva, mi kholwa kwangu, ni ti to mi pfisisa taku ani ngani nipune, ni ti to hahanze kwangu kha ku khali ku va ho tximwani txizimu, ni msana kwangu kha ku na mbi vaho tximwani Txizimu.

¹¹Ani, ani ngani MKOMA, se hahanze kwangu, kha ku nga ni M'hanyisi.

¹²Ani ni zivisile, kambe ani ni hanyisile, ni ti mahile ti pfala, se txizimu tximwani kha txa nga vaho hagari kwanu, anu koko mi tifakazi tangu, kuwomba MKOMA; ani ni Txizimu.

¹³Na ku si se vaho ditshiku, ani ngani; kambe kha ngaho wu a sikotako kuhuluka manzani kwangu; Ngako ni txi thuma, i mani a no ni tsimba kani?

¹⁴MKOMA, Mtiruli wako, i ku Msawuleki wa Israyeli, a womba tiya: Ngu mhaka ya ku mi randa, ni rumete valala Bhabhilona, se votshe ni na va maha ve relela kota vo tutuma, ni womba Vakaldheya, ka sitimela si va nga txi ti dhumisa ngu sona.

¹⁵Ani ngani MKOMA, Msawuleki wanu, Muvangi wa Israyeli, Mfumeli wanu.

¹⁶MKOMA, a womba tiya, awu a nga dhoda nzila lineneni, ni lisoko amu ka mati a hombe;

¹⁷wule a nga tisa txikotxikani ni dihantxhi, dibutho da yimbi ni mtamo; vona va wite kumweko, kha va na mbiswa ve wuka; va fuvisilwe, va timekile kufana ni ngoti ya dilambu.

¹⁸Mi nga alakanyeni timhaka ti ti nga pinda, hambi kupimisa timhaka ta kale.

¹⁹Wonani taku ni na maha mhaka ya yiphya, se konkuwa ti huma hakubasani; ina kha mi na mbi tiziva kani? Wonani taku ni na dola nzila txiwulani, ni minambo ligwangwani.

²⁰Sihari sa txitinga si na ni thumela, maxolwa ni vanana va mbuwu, nguko ni na thela mati txiwulani, ni minambo ligwangwani, kasi ku vathu vangu ve mana kusela, ka msawuleki wangu.

²¹Vathuvo ni nga ti wumbela, kasi ku va na ni dhumisa.

²²Hambi keto, khwa ni dhana awe Jakobe, aniko u karate ngu ngani, awe Israyeli.

²³Khwa ni tisela sifuyo sa sidotho sa miningelo ya kuhiswa, mwendo ku ni dhunda ngu miphaxo yako; kha na kunemetisela ngu miningelo, hambi ku ku rera ngu dibaselo.

²⁴Khwa ni xavela ngu male, litshava lo bhumulisa, hambi ku ni khurisa ngu mafura a miphaxo yako, kambe u ni ningile mthumo ngu sionho sako, se u ni karalisa ngu wubihi wako.

²⁵Ani, ani nipune, ngani ni pfhitako sihambunyeto sako, ngu kuranda kwangu, se sionho sako kha ni si alakanyi.

²⁶Xota ku ni alakanya, hi na wulela hotshe kulamulwani; txhatxha mhaka yako, kasi ku u na maneka di lulamile.

²⁷Tate wako wo khata[18] a onhile, ni vatxhamuseli vako va ni onhete.

²⁸Ngu mhaka yeto ni na nyenyezisa vahombe va wukhalo wo sawuleka, kambe ni maha ti to Jakobe e loviswa, ni Israyeli kuva e rukwa.