Read chopi Isaya 45 Bible Online

Isaya 45 - chopi bible

Isaya 45

¹MKOMA a wombi tiya ka mtotiwa wakwe Siro, awule ni mñolako ngu dianza dakwe da txinene, kasi ku ni xula matiko masoni kwakwe; ni na thukunyula siwunu sa vafumeli, kasi kutula matimba masoni kwawe, kambe matimba kha ma na mbi sekwa.

²Ani ni na thangela masoni kwako, ni lulamisa tinzila to gombonyeka; ni na funya matimba a suku, kambe ni phatulela sikhoto sa tisimbi.

³Se ni na kuninga tithomba tile ti nga siswa, ni tile ti nga fenengetwa, kasi ku u na tiziva tito, ani ngani MKOMA, Txizimu txa ka Israyeli, ni ku dhanako ngu ditina dako.

⁴Ngu kuranda txithumi txangu Jokobe, ni Israyeli, msawulwa wangu, ani kwako, ni na kudhana ngu ditina dako; ni ku ningile txibongo txako, hambi ku u nga si ni zivi.

⁵Ani ngani MKOMA, se kha ku na mmwani; hahanze kwangu, kha ku na txizimu; ani ni na kutsanisa, hambiko u si ni ziviko.

⁶Kasi ku ti na ziwa kukhukhela wutxani, ni kukhukhela mswa-ditambo, tito, hahanze kwangu kha ku na mmwani; ani ngani MKOMA, se kha ku na mmwani.

⁷Ani na maha kuwonekela ni va nga txidema; ani na vanga kudikha, ni va nga dikhombo; ani MKOMA, na maha totshe tiya.

⁸Anu tizuma nisani mwando, ni marefu ma na nise kululama; ma na tuleke mafu, se kuhuma kuhanyisa, kululama ku na ninge mihando kumweko; ani MKOMA, ni si vangile.

⁹ Dikhombo ka wule a lwisanako ni M'vangi wakwe, khadi hagari ka timwani tikhadi ta dibumba! Ina dibumba di nga womba ka muwumbi wa dona, di txi kha dona: U maha txani, kani? Mwendo mthumo wako, wu txi kha wona: Khu nga ni manza kani?

¹⁰Dikhombo ka wule a ku khene ka tate wakwe: U velekile txani kani? Se ka wamsikati a txi khene: U hefemulete txani kani?

¹¹A womba tiya MKOMA, Msawuleki wa ka Israyeli, wule a nga m'va nga: Ni wotiseni ta masiku ale matako; mi na lava kuziva mhaka ya vanana vangu, ni mhaka ya mthumo wa manza angu.

¹²Ani ni vangile mafu, kambe ni vangile m'thu ka ona; ani ni m'vangile, manza angu ma nawulutile tinzuma, se ni otshe mabutho a kona ni ma ningile mlayo wangu.

¹³Ani ni m'wisile ngu kululama, se totshe tinzila takwe ni na ti lulamisa; ene a na aka didhoropa dangu, kambe a na txhatxha tikhumbi tangu, i si nga ngu hakhelo hambi ngu siningo, kuwomba MKOMA wa Mabutho a Tiyimbi.

¹⁴MKOMA a wombisa tiya: Mthumo wa Egipta, ni dibhindu da Vaetiyopiya, ni Vasabhi, vathu va txiemo txo lapha, si na pinda sita kwako, si na kulumba; va na kulondeta, va nata va di sungilwe ngu titxhini, kambe va nata khizama masoni kwako; va na maha mikombelo yawe kwako, va txi kha vona: Kha ditshuri Txizimu txi kwako, kha ku na tximwani txizimu kambe.

¹⁵Ngu ditshuri awe u Txizimu txi txi ti sisako, Txizimu txa ka Israyeli, M'hanyisi.

¹⁶Va nawa tingana, kambe va na kanganyiseka votshe; va nawa kumweko vale va mahako sithombe.

¹⁷Aniko Israyeli wa hanyiswa ngu MKOMA, ngu kuhanyisa ka kwa mbi guma; ngu mhaka yeto kha mi na mbi wiswa tingana, hambi kukanganyiswa kala kupinduka.

¹⁸Nguko MKOMA a womba tiya, awule a nga maha tinzuma, Txizimu txi txi nga wumba mafu txi ma vanga; txona txi ma tsanisile, kha txa ma maha diphanga, aniko txi ma vangile kasi ku vathu ve zumba ka ona: Ani ngani MKOMA, kha ku na mmwani.

¹⁹Kha na womba-womba txihujani, hambi ka wukhalo wa txidema wa ha mafuni; kha na womba ka liveleko la Jakobe, ni txi khani: Ni laveni walo; ani ngani MKOMA, ni wombawombako kululama, ni zivisako timhaka ta tinene.

²⁰Sengeletanani, mi txita, tshuketani kumweko, anu mi nga huluka ka matiko; kha va zivi ta txilo ava va rwalako sithombe so vatwa, so mahwa ngu mapulango, kambe va khozelako ka txizimu txaku kha txi sikoti kuhanyisa.

²¹Zivisanani mi tshuketa, mi maha txikungo motshenu; i mani a nga zivisa tiya kukhukhela kale kani? I mani kukhukhela kaleko a nga zivisa kani? Ina hingani MKOMA kani? Se kha ku na tximwani Txizimu hahanze kwangu; Txizimu txo lulama, ni M'uhanyisi, kha txingaho, hahanze kwangu.

²²Hundulukelani kwangu mi na hanyiswa, anu motshenu mihingano ya mafu; nguko ani ni Txizimu, kha ku na tximwani.

²³ Ni xambanya ngu ngani nipune; di humile ngu txisofuni kwangu dipswi do lulama, kambe kha di na mbi tshumelela msana: Ati to masoni kwangu, ma na khizama otshe mazolo, se totshe tidimi ti na xambanya ngu ngani.

²⁴Va na kha vona ngu ngani: Kululama ni mtamo si ka MKOMA dwe; va nata kwakwe, aniko kha va na mbiwa tingana, votshe vale va no henya va txi mwukela.

²⁵Aniko ka MKOMA li nava li di lulamile ni kutikulisa lotshe liveleko la ka Israyeli.