Read chopi Isaya 5 Bible Online

Isaya 5 - chopi bible

Isaya 5

¹Konkuwa, ni na embelela ka txirandwa txangu, dando ya txirandwa txangu, ngu mhaka ya thembwe ya txona ya mv'hinya. Txirandwa txangu txi ni thembwe ya m'vhinya ka tximangwana txo nona.

² Se a to dima e thavisela marigwi, e phaya mivhinya ya yinene ngutu; e aka txitezi hagari ka thembwe, a txi kelela dipipa do kamela ka dona mihando, a txi verela ku yi veka mihando ya yinene; aniko yi to veka mihando yo bava.

³Konkuwa koko, anu vaaki va Jerusalema, ni nanu vavamna va ka Judha, na mi kombela, lamulani hagari kwangu ni m'vhinya wangu.

⁴Njitxani tximwani txo dingana ku txi mahwa ka thembwe yangu atxi ani ni nga mbi txi maha kani? Ni ti verete kuvelekwa ka mauvha o tshamba, se ku txi ta velekwa mauvha o bava kani?

⁵Konkuwa koko, na mi gela ti ni no maha, ka thembwe yangu ya m'vhinya: Ni na thavisa libhingo la yona, yi na maha lihawu; ni na khundumusa diseta da kona, di na kandetelwa.

⁶Thembwe yi na maha txiwula, kha yi na mbi sakatwa, hambi kudimwa; kambe ku na mila txipopo ni mipa; ni na leleta marefu ti to ma si nisi nzuma txitimwi ka yona.

⁷Nguko m'vhinya wa MKOMA wa Mabutho a Tiyimbi ngu nyumba ya ka Israyeli, ni vathu va ka Judha, mndonga wa kona wo tsakisa; a ti ti verete kuve maha wululamo, ku to maneka[9] kukhinyavezwa; wukhaloni ka wululamo, ku to maneka tihuwa.

⁸Dikhombo ka vale va ku ni tinyumba ni tinyumba, va ku ni tithomba ni tithomba, kuza ku si maneki ni wukhalo, va txi zumbisa ku nga ova vona vokha ha mafuni!

⁹MKOMA wa Mabutho a Tiyimbi, a to khene tinzeveni kwangu: Ngu ditshuri tinyumba tatingi ti na maha marumbi, tinyumba ta hombe, totshura ti na pwata vathu.

¹⁰Se digumi da tindima ta vhinya ti na humisa digarafawu;[10] ni omeri yimweyo ya mbewu yi na humisa efa yimweyo dwe.

¹¹Dikhombo ka vale va wukako ni mixo ve londisela sa kusela, va selako kala ni wusiku, yiza vhinya yi txi va hisa.

¹²Sitende ni tiharipa ni singomana, ni titshodi, ni vhinya, siho mu ka mibuso yawe ya hombe, kha va khatali ngu mthumo wa MKOMA, hambi kuwona mithumo ya manza akwe.

¹³Ngu kumaha keto, vathu vangu va na yiswa wukhumbini ngu mhaka ya kwa mbi ziva, vathangeli vawe va na fa ngu nzala, ni dibutho da vathu di na oma ngu ditora.

¹⁴Ngu toneto, dithitha di engetete kunavela ka dona, di asamile txisofu txa dona kupinda mpimo, wudhumo wawe ni vathu vawe, ni kubomba kwawe, ni votshe vale va tsakako va na ngirimela ka dona.

¹⁵Sekoko tinganakana ti na xowoka, ni va va ti guletako, va na wa. Ni maso a vale va ti guletako, ma na wiswa tingana.

¹⁶Aniko MKOMA wa Mabutho a Tiyimbi a na guletwa ngu kululama, se Txizimu txo Sawuleka, txi na sawulekiswa ngu wululamo.

¹⁷Sekoko sinvutana si nadya kona, kufana ni kuva si txi dya libalani ka sona; ni vawuyi va na dya ka makhalo a vamatiko.

¹⁸Dikhombo ka vale va ndindako wubihi ngu dijoke, va ndindako sionho ngu majoke a kutikulisa, o ndinda ngu ona sikotxikani!

¹⁹Va txi kha vona: A na kuluvete e heta mthumo wakwe, kasi ku hi wu wona; wu nate wudhota wa Msawuleki wa Israyeli, kasi ku hi na wuziva!

²⁰Dikhombo ka vale va ku kha vona to biha ndinene, se ta tinene va txi ndo biha! Va tekako txidema ve txi maha kuwonekela, ni kuwonekela ve kumaha txidema, so bava ve si maha so lombela, se so lombela ve si maha so bava!

²¹Dikhombo ka vale va alakanyako to va txharihile, ni kutithemba kupinda mpimo.

²²Dikhombo ka vale i ku tindena kuselani ka vhinya, ni vathu va va ku ni mtamo kupatelani ka wusuke wo bava ngutu.

²³Dikhombo ka vale va emelako m'bihi ngu kuxavelela, se awule wo lulama ve mlambela kululama!

²⁴Ngu toneto, va na loviswa, kufana ni titshava ti txi hiswa ngu mndilo, va na fana ni kuhiswa ka mwasi wa kuoma, se mkoloti wawe wu na sina, ni siluva sa kona si na puruma ku nga lithulu; Nguko va lekile Mlayo wa MKOMA wa Mabutho a Tiyimbi, ve eyisa dipswi da Msawuleki wa Israyeli.

²⁵Ngu kumaha keto, kuhenya ka MKOMA, kuturile txitimwi ka vathu vakwe, se a nawulutile dianza dakwe, e va daya; mimango yi to zinginika, sirumbi sawe si hangalaka, ku nga nzokoro hagari ka tinzila; hambi keto, kuhenya kwakwe ku toya masoni, ni dianza dakwe di ngadi nawulukile.

²⁶A na guleta m'jeke wo dhana matiko a kule, a na va vetela mloti, ti to ve khukha magwito ka mafu, se vona va nata ngu kukuluveta.

²⁷Kha ku na mbi va ni kukarala hagari kwawe, hambi kurereka; kha ku na wu a no khudhahela, hambi kuotela; kha va na mbi txhatxha tibhande siwununi kwawe, hambi kubhenula tingoti ta tikathula tawe.

²⁸Tingove tawe ti na hinda ngutu, ni malaho awe otshe ma dombilwe; sitsendo sa mahantxhi awe si fana ni marigwi, madangarita a sikotxikani sawe ma fana ni txihuhuri.

²⁹Kubhonga kwawe kufana ni ka ngonyamo; va na bhonga kufana ni singonyamwana; Ina, va na bhonga va txi ñola mipfimba yawe, kha ku na wule a no yi txhatxhisa.

³⁰Ka ditshiku donedo, va na bhonga txitimwi kwawe kufana ni mavimbi a linene; se awule a no wona mafu, a na wona txidema ni kuxaniseka, kuwonekela ku na vhalelwa ngu txidema.