Read chopi Isaya 52 Bible Online

Isaya 52 - chopi bible

Isaya 52

¹ Wuka, wuka, ambala mtamo wako, awe Siyoni; ambala syambalo sako so tshura ngutu, awe Jerusalema, didhoropa do sawuleka; nguko kwako kha ku na mbi thuka ku txi wulela awu a nga mbi ya wukwerani, hambi wa kwa mbi basa.

²Gubhuta lithulu, wuka u khalahatsha, awe Jerusalema; titxhatxhise ka tingoti ti ti ku thamoni kwako, awe mwanana wa muhorana wa Siyoni, u ku khumbi.

³Nguko MKOMA a to khene ka vathu vakwe: Kha ma xaviswa ngu txilo; kambe mi na tirulwa, na i si nga ngu male.

⁴Nguko MKOMA Txizimu a khene: Ka masiku ale ma nga pinda, vathu vangu va relete veya Egipta, kasi kuya luvela kona, se Asiriya a to va khozisa hahanze ka mnandu.

⁵ Se konkuwa, nji txani ni no txi maha, kuwomba MKOMA, nguko vathu vangu va ñotwe, va si nga ni mnandu kani? Avale va va fumelako va peka tihuwa, kuwomba MKOMA; se ditina dangu da ruketelwa, ngu ha ku si gwitiko, ditshiku ni ditshiku.

⁶Ngu kumaha keto, vathu vangu va na ziva ditina dangu, ngu mhaka yiya ka ditshiku dile, nguko ani nipune ngani ni wombako: “Ngani wuwa!”

⁷ Hi nga kutshura ka yona txitimwi ka mimango mikondo ya wu a zivisako mahungu amanene, a wu a huwelelako kudikha, a zivisako wunene, a pfalisako kuhanyisa, a ku khene ka Siyoni: “Txizimu txako txa fuma.”

⁸Engisani huwa ya vawoneleli vako! Vona va guleta mapswi, ve embelela kumweko, nguko ngu maso awe va na muwona, mbimo yile MKOMA a no tshumelela Siyoni.

⁹Kwangulani mi embelela, mi pfalisa kumweko, anu marumbi a Jerusalema! Nguko MKOMA a thavelete vathu vakwe, a tirute Jerusalema.

¹⁰MKOMA a thavisile diwoko dakwe do sawuleka, ti txi wonwa ngu maso a matiko otshe; se otshe magwito a mafu, ma na wona kuhanyisa ka Txizimu txathu.

¹¹ Khukhani, khukhani, humani emo, mi nga gweseni txilo txo mbi basa; humani hagari ka dona, ti sawulekiseni anu mi rwalako siya sa MKOMA.

¹²Nguko kha mi na mbi huma ngu kukuluveta, hambi kutsula ngu kututuma, nguko MKOMA a na thangela masoni kwanu, se Txizimu txa Israyeli, txi na mi londeta ngu msana.

¹³“Wonani taku, txithumi txangu txi na maha ngu wunene; txi na kuliswa, ni kuguletwa, ni kuthaviseka ngutu.”

¹⁴Vathu votala mbimo yi va nga wona va to xamala, nguko khohe yakwe yi ti ti bihile ngutu, kupinda tikhohe ta vamwani, ni txiwumbeko txakwe txi ti ti pinda txa vamwani anana va vathu.

¹⁵ Ngu kumaha keto, a na xamalisa matiko o tala, ni vafumeli va na pwata ni txo ngu mhaka yakwe, nguko va na wona ni ti va sinziko kuziviswa, se ni tile va nga mbi tipfa, va na ti pima.