Read chopi Isaya 53 Bible Online

Isaya 53 - chopi bible

Isaya 53

¹ I mani a nga kholwa ka txhumayelo yathu kani? Niku diwoko da MKOMA di wonekisilwe ka mani kani?

²Nguko a humile masoni ka MKOMA nga txiluva, e fana ni m'twi ka mafu a kuoma; asi nga ni wuwono ni kutshura ka hombe; se mbimo yi athu hi nga muwona, kha ha wona kutshura ni kakumweko, kasi ku hi txi mnavela.

³A ti ti txhipiswa, kambe i ti ti wo nyenywa ngutu hagari ka vathu, m'thu wa mipando, wo ziva ngutu kuthuma, awule vathu va nga txi ti fenengeta tikhohe, a ti ti txhipiswa, kambe kha ha khatala ngu tona ni ka kudotho.

⁴ Kha ditshuri ene a rwate malwati athu, e rwala ni kupanda kwathu; se athu hi txi mfananisa ni mxaniseki, wo pekwa ngu Txizimu ni kukhoziswa.

⁵ Aniko ene a pekilwe ngu sihambunyeto sathu, e xaniswa ngu mhaka ya wubihi wathu; txitsayiso txi txi hi tiselako kudikha, txi ti ti txitimwi kwakwe, se hi hanyisilwe ngu mikhwimbiriti yakwe.

⁶Athu hotshethu hi ti ti hangalakile kufana ni tinvuta; mmweyo ni mmweyo a ti ti tsimbila ngu nzila yakwe, aniko MKOMA a mrwekile wubihi wathu hotshethu.

⁷Ene a to khoziswa, aniko kha tula txisofu; kufana ni txinvutana a to yiswa kudawani, ni kufana ni nvuta masoni ka wu a yi kayako, ene kha tula txisofu.

⁸ A thavisilwe ngu kutsindavetwa ni kulamulwa; se i mani a no xawutela ta kuhanya wakwe kani? Nguko a wilisilwe mafuni ka va va hanyako, kambe a manetwe ngu wuhambunyeti wa vathu vangu.

⁹ Se diyiva dakwe di to vekwa kumweko ni vaonhi, ni vanyatithombe, kufani kwakwe; hambi ku ene a nga si zivi kumaha to wekela, kambe kha phazama ngu txisofu txakwe.

¹⁰Hambi keto, MKOMA a tsakete ku mxanisa, e mpfisa kupanda, ngako muhefemulo wakwe wu txi maha mhamba yo thavisa sionho, a na wona vatukulu vakwe, a na andisa masiku, se litsako la linene la MKOMA, li na kula manzani kwakwe.

¹¹A na wona mthumo wa muhefemulo wakwe, e tsaka; ngu wuzivi wakwe, txithumi txangu, mlulami, txi na emela votala, nguko wubihi wawe a na wu rwala.

¹² Ngu kumaha keto, ni na mninga txyavelo txa votala, se a nga abana sile so handwa kumweko ni va va mtamo ngutu; nguko a tshakunutile muhefemulo wakwe kufani, se e balwa kumweko ni sindaka-milayo; aniko ene a ti rwekile sionho sa votala, kambe a kombelete sindaka-milayo.