Read chopi Isaya 54 Bible Online

Isaya 54 - chopi bible

Isaya 54

¹ MKOMA a khene: “Embelela ngu kutsaka, awe txifule, awe u nga mbi veleka! Pfalisa ngu kutsaka ngu ka wuembeleli wo tsakisa, se u kwangula, awe u nga mbi pfa kupanda ka kuveleka! Nguko mbangi vanana va wule a nga lekwa, kupinda va wule a ku wukati.”

²Engetela wukhalo wa ditenda dako se mijiyo ya tinyumba tako, yi na nawuluke; u nga ma tsimbisele; laphisa tingoti tako, kambe tsanisa kha kwati timphande ta kona.

³Nguko u na nava u txiya ka dianza da txinene, se liveleko lako li na lumbwa ngu matiko, li txi wusa madhoropa ale ma nga sala i di marumbi.

⁴U nga thave, nguko khu na mbiwa tingana; u nga ti thele tingana, nguko khu na mbi kanganyiswa; u na divala tingana ta wuphya wako, kambe khu na mbiswa u alakanya tingana ta wuphya wako.

⁵Nguko M'vangi wako i mwamna wako; ditina dakwe MKOMA wa Mabutho a Tiyimbi; se Msawuleki wa Israyeli, ngene mtiruli wako; ene a na dhanwa ku Txizimu txa otshe mafu.

⁶Nguko MKOMA a kudhani kufana ni wamsikati wo lekwa, wo xaniseka moyani; kufana ni kulekwa ka wamsikati wa dihorana, kuwomba Txizimu txako.

⁷Ngu mbimo yayidotho ni ku lekile, kambe ni tshumete ni ku wuyisa ngu wumbilu wa hombe;

⁸ngu kuhenya ka hombe, ni ku sisete khohe yangu ngu mbimo yokari; aniko ngu wunene wa kwa mbi gwita ni na kupfela wusiwana, kuwomba MKOMA, Mtiruli wako.

⁹Nguko eto kwangu ti na fana ni ndambi ya Nowa; ni xambanyile koko ti to ndambi ya Nowa, kha yi na mbi talela kambe mafu; ngu toneto ni xambanyile ti to kha ni na mbiswa kambe ni ku henyela, hambi ku kukawuka.

¹⁰Nguko mimango yi na wekela, ni simangwana si na zinginika; aniko wumbilu wangu kha wu na mbi kuvayilela, se txitumelelano txa kudikha kwangu kha txi na mbi txitxa, kuwomba MKOMA, wule a ku mahelako wumbilu.

¹¹Awe u xaniswako, u tsayiswa ngu sihuhuri, u si thaveleleki! Wona taku ani ni na veka marigwi ako, ni sotshe sitshuriselo, kambe ni na kutsanisa txitimwi ka masafira.

¹² Se ni na maha mafasitela ako ngu makristali, ni matimba ako ngu marubhime, se yotshe mihingano yako ngu marigwi o dhundeka.

¹³ Se votshe vanana vako va na maha vagondiswa va MKOMA; ni kudikha ka vanana vako ku na maha ko enela.

¹⁴U na tsaniswa ngu kululama, kambe u na va kule ni wukhozisi, nguko khu na mbi thava; hambi ni kuxamala, nguko kha ku na mbi kuhokela.

¹⁵Wona taku va nata sengeletana, aniko i si nga ngu ngani; avale va no patana ve kuwukela, va nawa ngu lirando lako.

¹⁶Wona taku ani ni vangile mtshuli, wule a futetako makala ka mndilo; a mahako matxhari a mthumo wakwe; kambe ni vangile muhoxoti, kasi kukhundumusa.

¹⁷Otshe matxhari ale ma longiselwako ku ku wukela, kha ma na mbi humelela; ni totshe tidimi tile ti ku wukelako kulamulwani, awe u na ti kona; ayiya i thomba ya sithumi sa MKOMA, ni wululamo wu wutako ngu kwangu, kuwomba MKOMA.