Read chopi Isaya 55 Bible Online

Isaya 55 - chopi bible

Isaya 55

¹ Anu motshenu mi ku ni ditora, ngonani matini, ni nanu mi singako ni male, ngonani mi ta xava, mi dya; Ina, ngonani mi ta xava, mi si nga ni male, mi si nga ni mtengo, vhinya ni masi.

²Mi xakelela txani male ka sile i singako sakudya kani? Ni mihando ya mthumo wanu, ka sile si si khurisiko kani? Ni engiseni kha kwati, mi nadya so tshamba, ni mihefemulo yanu yi na tsaka ngu so nona.

³ Riyani tinzeve, ngonani kwangu; engiseni, mihefemulo yanu yi na hanya; nguko ni na maha txitumelelano txo mbi guma ni nanu, ni mi ninga makatekwa o tsana a Dhavhidha.

⁴Wonani taku ani ni m'vekile kuva fakazi ka vathu, kuva mthangeli ni mfumeli wa vathu.

⁵Wona taku, u na dhana ditiko dile u si di ziviko, se ditiko dile di si khaliko ku ku ziviko, di na tutumela kwako, ngu kuranda ka MKOMA, Txizimu txako, ni ka Msawuleki wa Israyeli; nguko ene a ku dhumisile.

⁶Lavani MKOMA a txi ngadi e maneka, m'dhaneni a di ngadi hafuhi.

⁷M'bihi a na leke nzila yakwe, m'thu wa kwa mbi lulama a na leke mipimiso yakwe, se a na hundulukele ka MKOMA, ene a na mpfele wusiwana; a na tshumelele ka Txizimu txathu, nguko nja hombe ngutu mu ko divalela.

⁸Nguko mialakanyo yangu, hi nga mialakanyo yanu, ni tinzila tanu, hi nga tinzila tangu, kuwomba MKOMA.

⁹Nguko nga kule nzuma yi ku txitimwi ngutu kupinda mafu, ngu tona eto, ni tinzila tangu ti txitimwi ngutu kupinda tinzila tanu, ni mialakanyo yangu yi txitimwi ngutu kupinda mialakanyo yanu.

¹⁰ Nguko nga ti nzuma ni huguva si txhikako ngu nzumani, si si tshumeleli kona, aniko sa nakanisa mafu, si ma maha me ninga dibhindu, ni kumilisa, ni kuninga mbewu ka wule a phayako, ni sakudya ka wule adyako,

¹¹di na mahisa toneto dipswi di di no huma ngu txisofuni kwangu; dona di na tshumelela kwangu i ti diphanga, di na maha kudhunda kwangu, ni kuhetisa tile ni ngadi rumela tona.

¹²Nguko mi na huma mi di tsakile, mi tsimbitiswa ngu kuthutha; mimango ni simangwana si na kwangula ngu kutsaka masoni kwanu, se yotshe mindonga ya txitinga yi na peka manza.

¹³Ka wukhalo wa mipa, ku na mila faya, se ka wukhalo wa txipopo, ku na mila mirta; si na va ditina da MKOMA, i ku txikombiso txi na kwa mbi pfhitwai.