Read chopi Isaya 57 Bible Online

Isaya 57 - chopi bible

Isaya 57

¹Wa lova mlulami, se kha ku nga ni wu a alakanyo eto mbiluni kwakwe; Vathu vo thembeka va thaviswa, na ku si nga ni wo ziva ti to mlulami, a tekwa a sanzi kuonha.

²Ene a na wulela ngu kuthutha; va na humula mibhedhuni kwawe, vale va no maneka va di tsimbite kululamani kwawe.

³Aniko tshuketani hawa, anu vanana va mloyi wa txisikati, anu liveleko la wugango ni wugelegele.

⁴I mani wu mi msekako kani? I mani wu mi asamako sisofu kwakwe, ni ku mi humisela mani lidimi kani? Ina kha mi nga vanana va wuhambunyeti, liveleko la makuhu,

⁵mi ti futumetako ngu sithombe hahatshi ka yotshe mindonga yo nakana, mi phaxa ngu vanana sinambwanani, ni tiphakoni ka marigwi, kani?

⁶Amu ka marigwi o swililika a sinambwanani, ku ni txyavelo txako; asiya ngu sona i kuthomba yako; kambe ka sona u thela sa kusela kwako, se u txi si ninga miningelo; ina ani ni ndi na tsakiswa ngu sona eso kani?

⁷U veka m'bhedhu wako txitimwi ka mimango yo lapha, ni kuguleka; se u kwela ka yona u maha miphaxo.

⁸Wa veka syalakanyiso sako msana ka matimba ni ka misasimo; nguko u ti wonekisa ka vamwani kupinda kwangu, kambe wa kwela u anamisa m'bhedhu kwako, u maha txitumelelano navo; u randa m'bhedhu wako, ni hani hawa u wu wonako.

⁹Se uya ka mfumeli ni mafura, kambe wa andisa mafura ako o bhumula; wa rumela sirumwa sako si txi ya kule, kambe wa va ruma kala Xeyoli.

¹⁰U karate amu ka dipfhumba dako do lapha; kambe khu wombi ku khawe: Kha ku na themba; sile u nga ti si lava u si mani; ngu kumaha keto, u nga lwale.

¹¹Se u thava mani mwendo kudhudhumela, aha koza u hemba u si ni alakanyi, mwendo ku ni veka mbiluni kwako kani? Ina hi nga mhaka ya kule ni nga malala kukhukhela kale, se u si ni thavi kani?

¹²Ani ni na pfalisa kululama kwako ni mithumo yako, aniko kha va na mbi kulondola.

¹³Ngako u txi dila, sile mi nga ti sengeletela si na mi txhatxhise; kambe moya wu na si teka sotshe, ni kwa mbi nyawula ku na si gula; aniko wule a thembako kwangu a na lumbwa ngu mafu, se mmango wangu wo sawuleka wu na maha thomba yakwe.

¹⁴Se ku na wombwa taku: Lulamisani, lulamisani, longiselani nzila; thavisani sitsha ka nzila ya vathu vangu.

¹⁵Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

¹⁶Nguko kha ni na mbi lwa kala kupinduka, hambi kuya masoni ngu kuhenya; nguko moya wu nga guma mtamo masoni kwangu, ni mihefemulo yile ni nga yi va nga.

¹⁷Ngu mhaka ya wubihi wa likungo lakwe, ni henyile, ni va peka; ni to barama, ni henya; aniko sindaka-milayo si to tsimbitisa ngu nzila ya kuranda ka mbilu ya sona.

¹⁸Ani na ti wona tinzila tawe, hambi keto ni na va hanyisa; kambe ni na va thangela ni tshumela ni va thavelela, ni vale va dilako navo.

¹⁹ Ani na veka mihando ya sisofu: Kudikha, kudikha, ka vale va ku kule, ni ka vale va ku hafuhi, kuwomba MKOMA, kambe ani ni na va kalamukisa.

²⁰Aniko vabihi va fana ni linene lo vhiluka, kha li na kumalatwa, ali mati a lona, ma humisako lidhaka ni ndope.

²¹ Vabihi kha va nga ni kudikha, kuwomba Txizimu txangu.