Read chopi Isaya 60 Bible Online

Isaya 60 - chopi bible

Isaya 60

¹Wuka, woninga, nguko liwoningo lako lata, ni wudhumo wa MKOMA wa humelela txitimwi kwako.

²Nguko wona taku, txidema txi fenengetile mafu, ni kuphuma ku fenengetile vathu, se MKOMA a na humelela txitimwi kwako, ni wudhumo wakwe wu na woneka txitimwi kwako.

³Se matiko ma na tsimbila liwoningoni kwako, ni vafumeli va na tsimbila ka liwoningo li li nga kuveleka.

⁴Gula maso ako, u ma rendelekisa ka madhawa otshe, u wona; votshe vava se va sengeletani va ta kwako; vanana vako va majaha va nata ngu kule; ni vanana vako vamahorana va na wunjeka didhawa kwako.

⁵Sekoko u na ti wona, kambe u na woningwa, se mbilu yako yi na ndaka-ndaka, kambe yi na kukumuka ngu kutsaka, nguko kunona ka linene ku na wuyiswa kwako, ni tithomba ta matiko ti nata kwako.

⁶Mitxhambi yo tala ya makamelu yi na ku fenengeta, a kuta ngu Midhiyani ni Efa; yotshe yi nata ngu Sabha, ya nata ni nzalama ni dibaselo, ve nuwela wudhumo wa MKOMA.

⁷Totshe tinvuta ta Kedhari ti na sengeletana hafuhi ni nawe, se tihamba ta Nebhayote ti na kuthumela; mi na kwela ngu kutsaka txiluveloni kwangu, se ani ni na dhumisa nyumba ya wudhumo wangu.

⁸Mbamani vale vatako ngu kupuruma nga marefu, ni ku nga situvani ka mafasitela a sona kani?

⁹Ngu ditshuri, sitondolo si na ni verela, se kukhata, nzitimela sa Tarxixi, si no neha vanana vako, vale vatako ngu kule, va nata ni nzalama yawe ni silivhela yawe, kusawulekisani ka ditina da MKOMA, Txizimu txako, ni Msawuleki wa Israyeli, nguko a ku dhumisile.

¹⁰Se vanana va vamatiko va na aka maguma ako, ni vafumeli vako va na kuthumela, nguko, kuheyani kwangu ni ku pekile, aniko ka wunene wangu, ni ku pfete wumbilu.

¹¹Se matimba ako ma nava ma di tulekile, hambi ni wusiku mwendo ni mitshikari kha ma na mbi sekwa, kasi kuve kutisela tithomba ta matiko, ni vafumeli va ona va na tsimbitiswa ngu vona.

¹²Nguko ditiko ni mfumo wule wu no mbi ku thumela, si na lova; ina, matiko oneyo otshe ma na sala i di marumbi.

¹³Wudhumo wa Libhanoni wu nata kwako; kumweko ni mikipresi, ni mipinyeru, ni misiringa, kasi ku ta tshurisela wukhalo wangu wo sawuleka; se ni na dhumisa wukhalo wu mikondo yangu yi emako ka wona.

¹⁴Kambe va nata ve ta nama kwako, vanana va vale va nga kuxanisa, ve ta khizama mikondoni kwako, votshe vale va nga kutxhipisa, se va na kudhana ku Didhoropa da MKOMA, i ku Siyoni wa Msawuleki wa Israyeli.

¹⁵Na i si nga kutxhipiswa ni kunyenywa kule u nga mahelwa kona, kuhoka ha ko ni wammweyo asi pindi ngu kwako, ni na veka kwako kudhundeka ka kwa mbi gwita, kuzumbiseka ka liveleko ni liveleko.

¹⁶Kambe u na mama masi a matiko, se u na ti dyisa tikhanani ka vafumeli; u na tiziva ti to ani ngani MKOMA, Muhanyisi wako, Mtiruli wako, ni nyamitamo wa va ka Jakobe.

¹⁷Wukhaloni ka koporo ni na tisa nzalama, ni wukhaloni ka simbi ni na tisa silivhela, wukhaloni ka mapulango ni na tisa msuku, wukhaloni ka marigwi, ni na tisa simbi; se ni na maha ti to vafumeli vako ve dikha, ni vathumi vako veva vo lulama.

¹⁸Kha ku na mbiswa kambe kupfala kulwisana ditikoni kwako, hambi kuxaselwa ni kukhundumuselwa mihinganoni kwako; aniko u na dhana “Kuhanyisa” ngu magumani kwako, ni matimbani kwako u na khawe “Kudhumisa.”

¹⁹ Kha di na mbiswa di kuthumela ditambo kasi ku kuwoninga, hambi kuwoningwa ngu mtxima; aniko MKOMA a na va liwoningo lako la kwa mbi guma, ni Txizimu txako mbudhumo wako.

²⁰Kha di na mbi ngadi di txiswa ditambo dako, hambi mtxima wako kha wu na mbifa, nguko MKOMA i nava liwoningo lako yotshe mbimo, ni masiku a m'zila wako ma na guma.

²¹Se votshe vathu va kakwanu va na va vo lulama, mafu ma nava thomba yawe yotshe mbimo; va na va makhukhu o thungiswa ngu ngani, mthumo wa manza angu, kasi ku ani ni dhumiswa.

²²Vathu vavadotho va na va 1.000; ni vavadotho ngutu, va na va vathu vavangi ngutu. Ani MKOMA, ngu mbimo ya kona, ni na ti maha eto.