Read chopi Isaya 61 Bible Online

Isaya 61 - chopi bible

Isaya 61

¹ Moya wa MKOMA Txizimu, wu txitimwi kwangu, nguko MKOMA a ni totile, kasi kuya txhumayela mahungu amanene ka sisiwana,[22] a ni rumete kuya tirula vale va ku ni kuxaniseka mbiluni, ni kuya nuwela mhaka ya kuthukunyulwa ka va vo sungwa, ni kutulelwa ka vale vo ñolwa;

² ni kupeka nyiwo ya dilembe do kateka da MKOMA, ni ditshiku da kuphota ka Txizimu txathu; kuthavelela votshe vale va dilako;

³ni kurumete ka votshe vale va dilako Siyoni, kasi ku va sanzeka m'bhoti wukhaloni ka dikhuma, ni ku va tota mafura a kutsaka wukhaloni ka kudila, ni ku va ambeka wudhumo hahanze ka moya wo xupheka, kasi kuve dhanwa ku mindonga ya kululama, yi nga phaywa ngu MKOMA, kasi ku e mana kudhumiswa.

⁴Se va na aketa makhalo ale ma nga xaselwa, kambe va na wuseta ni ale ma nga haxulwa kale, ni kuwusa madhoropa ale ma nga xaselwa, ma nga khundumuswa ka liveleko ni liveleko.

⁵Kambe ku nava ni valuveli va va no dyisa mitxhambi yanu, se vathu va matiko mamwani, va na maha vadimi vanu, ni vaxayisi va mivhinya yanu.

⁶Aniko anu mi na dhanwa ku mi vaphaxeli va MKOMA, kambe va na mi dhana ku mi sithumi sa Txizimu txathu; mi na dya tithomba ta matiko, mi dhumiswa mu ka wudhumo wa ona.

⁷Ngu mhaka ya tingana tanu to wuyetwa kumbidi ni kuxaniseka kwanu, va na tsaka ngu txyavelo txawe; ngu kumaha keto, ditikoni kwawe, va na mana ngu kuwuyetwa kumbidi, kambe va na va ni kutsaka ko mbi guma.

⁸Nguko ani MKOMA, ni randa kululama, ni nyenya wubihi; ani ni na va ninga ngu ditshuri hakhelo yawe, kambe ni na maha navo txitumelelana txo mbi guma.

⁹Se liveleko lawe li na ziwa hagari ka matiko, ni tixaka tawe ti na ziwa hagari ka vathu, votshe vale va no va wona, va na tiziva ti to i mbewu yile yi nga katekiswa ngu MKOMA.

¹⁰Ni na tsaka ngutu ka MKOMA, muhefemulo wangu wa tsakela Txizimu txangu, nguko txi ni ambekile syambalo sa kuhanyiswa, txi ni fenengeta didhamba da kululama, nga muwuti a ti mbombisako ngu so tshura, ni ku nga txiwutwa txi ti bombisako ngu siketiketi sa txona.

¹¹Nguko nga kule mafu ma humisako makhukhu a ona, ni ku nga themmbwe yi milisako sile si phaywako ka yona, ngu tona eto MKOMA Txizimu, a na milisa kululama, ni wudhumo ka otshe matiko.