Read chopi Isaya 62 Bible Online

Isaya 62 - chopi bible

Isaya 62

¹Ngu kuranda Siyoni kha ni na mbi malala, ngu mhaka ya kuranda Jerusalema kha ni na mbi bundama, kala kuza kuhuma kululama kwakwe kufana ni liwoningo, ni kuhanyiswa kwakwe kufana ni txisase txa mndilo.

²Se matiko ma na wona kululama kwako, ni votshe vafumeli va na wona wudhumo wako; se va na ku dhana ngu ditina dadiphya, adi txisofu txa MKOMA txi no di raya.

³Kambe u na va m'bhoti wo dhumiseka manzani ka MKOMA, ni txigoko txa wukoma manzani ka Txizimu txako.

⁴Khu na mbi ngadi u dhanwa ku u “Wo Lekwa,” ni ditiko dako kha di na mbi dhanwa kambe taku “Dirumbi”; aniko va na kudhana taku “Hefizibha,”[23] ni ditiko dako di na dhanwa taku “Bhewula,”[24] nguko MKOMA wa tsaka ngu ngawe, se MKOMA a na tekana ni ditiko dako.

⁵Nguko nga kule dijaha di tekanako ni muhorana, ngu toneto ni vona vanana vako, va na tekana ni nawe; kufana ni muwuti a tsakako ni txiwutwa, ngu toneto Txizimu txako txi na tsaka ni nawe.

⁶O Jerusalema! Ni vekile vawoneleli txitimwi ka maguma ako, ava va no mbi malala wusiku ni mitshikari; o anu mi khumbukako MKOMA, mi nga thukeni mi malala,

⁷kambe mi nga maneke mi di malate, kala kuza e tsanisa, ni ku kala kuza e veka Jerusalema kuva wudhumo ha mafuni.

⁸MKOMA a xambanyile ngu dianza dakwe da txinene, ni diwoko dakwe da mtamo, a txi khene: Kha ni na mbiswa kambe ni ningela fulaho yako ka valala vako, hambi va mamwani matiko kha va na mbi sela vhinya yako, yile u nga ti thumela.

⁹Aniko avale va no sengeletela, va nadya kambe va na dhumisa MKOMA; ni vale va no elula va na sela mithandani ka wukhalo wangu wo sawulekani.

¹⁰Humani, humani ngu sike; longiselani nzila ya vathu; lulametani, lulametani digondo, mi thavisela marigwi ka dona; gwimbani m'jeke ka vathu.

¹¹ Wonani taku MKOMA a zivisile kala magwito ka mafu, a txi khene: Gelani mwanana wa muhorana wa Siyoni, mi txi khanu: Wona taku kuhanyiswa kwako kata; wona taku kuta ni hakhelo yako, ni mithumo yakwe yi thangete masoni kwakwe.

¹²Se a na va dhana taku mbathu vo sawuleka, avale va nga tirulwa ngu MKOMA, se awe u na dhanwa ku Wo lavwa, Didhoropa di di nga mbi lekwa!