Read chopi Isaya 63 Bible Online

Isaya 63 - chopi bible

Isaya 63

¹I mani wuwa a tako ngu Edhomi, ka Bhozira, ni syambalo so bhilivila kani? Awu syambalo sakwe i ku so dhundeka, a tsimbilako ngu mtamo wakwe wa hombe kani? Ani ni wombawombako ngu kululama, ni mtamo ngutu kasi kuhanyisa.

²Ngu kutxani syambalo sako si nga bhilivila kani? Ni syambalo sako so fana ni sa wule a sukako mauvha dipipani kani?

³ Ani nokha ni to suka dipipani, se ka vathu kha ngaho a nga ti ti ni nani; se kuhenyani kwangu ni to va suka, ni ku va phwarasela ngu txiviti txangu; se mnoha wawe wu to ndakela syambalo sangu, ni nzihatisa sotshe syambalo sangu.

⁴Nguko ditshiku da kuphota di mbiluni kwangu, ni dilembe da vo tirulwa vangu di hokile.

⁵Ni wonile ka madhawa otshe, aniko ku si nga ni wa ku ni vhuna; ni to xamala ngu kupwateka ni wammweyo wo ni tsanisa; ngu kumaha keto, diwoko dangu di ni tisete kuhanyisa, ni kuhenya kwangu ku ni tsanisile.

⁶Se ni kandetete vathu kuhenyani kwangu, kambe ni va lavisile ngu txiviti txangu, se ni wisa mtamo wawe hahatshi.

⁷Ni na khumbuka wunene wa MKOMA, ni wungi wa wudhumo wa MKOMA, madingano ni totshe ti MKOMA a nga hi ninga, ni wunene wakwe wa hombe ka nyumba ya ka Israyeli, a nga va mahela madingano ni wumbilu wakwe, ni madingano ni kutala ka wunene wakwe.

⁸Nguko MKOMA a ti ti khene: Kha ditshuri, vona i vathu vangu, vanana va va na kwa mbi womba makuhu. Ngu toneto, ene a to va Muhanyisi wawe.

⁹Ka kotshe kuxaniseka kwawe, ngene a nga xaniswa, se Ngelozi yile yi ku masoni kwakwe yi to va huanyisa; ngu lirando lakwe ni wumbilu wakwe, a to va tirula, se e va teka ni ku va tsimbitisa ka otshe masiku a kaleko.

¹⁰Aniko vona va to mueyisa, se ve henyisa Moya wakwe wo Sawuleka; a to maneka i di mlala wawe, se ene apune a tolwa navo.

¹¹Hambi keto, a to alakanya masiku a kale ngutu, a Mosi ni a vathu vakwe, va nga kha vona: Ahayi wule a nga va humisa lineneni, kumweko ni vadyisi va mtxhambi kani? Ahayi wule a nga thela Moya wakwe wo Sawuleka hagari kwawe,

¹²wule diwoko dakwe do dhundeka, a nga maha ti to di tsimbila ka dianza da txinene da Mosi kani? A nga abanisa mati masoni kwawe, kasi ku ti mahela ditina da kwa mbi gwita kani?

¹³Awule a nga va tsimbitisa mazivani, kufana ni dihantxhi txiwulani, kasi ku va si humbwi kani?

¹⁴Kufana ni txihari txi txi relelako mikovani, Moya wa MKOMA wu va ningile kuhumula; ngu toneto u tsimbitisile vathu vako, kasi ku ti mahela ditina do dhundeka.

¹⁵Wona na u di nzumani, se u wona na u di ka wukhalo wako wo sawuleka, ni kudhundeka. Txi hayi txiluse txako, ni mithumo yako ya mtamo kani? U nga thavise kwangu lirando la mndani kwako ni la wumbilu wako!

¹⁶Aniko awe u Tate wathu, hambi kule Abrahamu asi hi ziviko, ni Israyeli asi hi alakanyiko. Awe MKOMA, u Tate; Mtiruli wathu, kukhukhela kaleko, ditina dako.

¹⁷Ngu kutxani, awe MKOMA u hi mahako hi hambuka ka tinzila tako kani? U bangisela txani timbilu tathu kuva hi si ku thavi kani? Wuyisa tihunzu ta thomba yako, ngu kuranda sithumi sako.

¹⁸Ngu mbimonyana ya yidotho dwe, u tekilwe ngu vathu vako vo sawuleka, valala vathu va kandetete wukhalo wako wo sawuleka.

¹⁹Hi tshumete hi txi nga vale u si khaliko ku va fumela, ni kufana ni vale va si khaliko kudhanwa ngu ditina dako.