Read chopi Isaya 65 Bible Online

Isaya 65 - chopi bible

Isaya 65

¹Ni lavilwe ngu vale va si khaliko ku wotisa ngu ngani; ni manwi ngu vale va nga ti si ni lavi; ka vathu vale va nga si dhanwi ngu ditina dangu, ni txi khani: Ngani wuwa hawa!

² Ni nawulutile manza ditshiku dotshe, ka vathu va i ku vakaneti, va tsimbilako ngu tinzila to biha, ve ti mahela ti ti ku mapimoni kwawe;

³vathu va va ni henyisako masoni kwangu yotshe mbimo, va phaxelako va di tithembweni, ve hisa dibaselo txitimwi ka sitini;

⁴ve khalahatsha hafuhi ni mathita, ve heta wusiku wotshe ka makhalo a sihuja, va txi dya nyama ya khumba, ve nyamisa timbiya tawe ngu sakudya so yila.

⁵Se va txi kha vona: Khukha hawa, u nga tshukete hafuhi ni nani, nguko ani ni sawulekile ngutu kupinda awe. Avava mbutshi tithonvuni kwangu, mdilo wu wu turako ditshiku dotshe.

⁶Wona ti bhatwe masoni kwangu, taku: Kha ni na mbi malala; aniko ani ni na hakela, ni na rinza hakhelo masoni kwawe,

⁷sionho sanu, kumweko ni sionho sa vatate vanu, kuwomba MKOMA, avale va nga hisa dibaselo mimangoni, ni ku ni ruketela simangwanani; ngu mhaka yeto, ni na tshumela ni va pimela mithumo yawe ya kale, masoni kwawe.

⁸MKOMA a womba tiya: Kufana ni kungako ku txi manwa dosi amu ka txizangwa txa mauvha, va kha vona: U nga txi xakele, nguko ku ni makatekwa ka txona, ni na mahisa toneto ngu kuranda sithumi sangu, kasi ku ni si va hoxoti votshe.

⁹Kambe ni na humisa lixaka ngu ka Jakobe ni ka Judha, txidya-thomba txa mimango yangu, se vasawuleki vangu va na ningwa ditiko, ni sithumi sangu si na zumba ka dona.

¹⁰Se Saroni a na va txibala txa tinvuta, ni mkova wa Akori wu na maha dizumbo da sifuyo, sa vathu vangu va va ni lavako.

¹¹Aniko kwanu mi nga leka MKOMA, mi divalako mmango wangu wo sawuleka, mi lugisako meza ya Gadhi, se mi patelako vhinya yo lumba Meni,

¹²kambe ni na mi ningela ka ditxhari, motshenu mi na nama mi dayelwa, nguko ni mi dhani, aniko kha ma xamula; ni wombawombile, kambe kha ma engisa, aniko mi mahile ti i ku to biha masoni kwangu, mi sawute sile ani ni nga si si tsakeli.

¹³Ngu kumaha keto, MKOMA Txizimu a womba tiya: Wonani taku sithumi sangu si na dya, aniko anu mi na fa ngu nzala; wonani taku sithumi sangu si na sela, aniko anu mi na pfa ditora, wonani taku sithumi sangu si na tsaka, aniko anu mi na wa tingana;

¹⁴wonani taku sithumi sangu si na embelela ngu kutsaka ka timbilu ta sona, aniko anu mi na peka tihuwa ngu kupandiseka ka timbilu, mi na yowe, ngu kuxaniseka ka moya;

¹⁵se mi na leka ditina danu di maha txiruko ka va sawuleki vangu; MKOMA Txizimu a na mi daya; se sithumi sakwe a na si dhana ngu dimwani ditina.

¹⁶Se awule a katekiswako ha mafuni a na katekiswa ngu Txizimu txa ditshuri; ni wule a xambanyako ha mafuni, a na xambanya ngu Txizimu txa ditshuri; Nguko sixaniso sa kale si divatwe, kambe si fenengetilwe masoni kwangu.

¹⁷ Nguko ani na vanga nzuma ya yiphya ni mafu a maphya; se kha ku na mbi alakanywa timhaka tile ti nga pinda, kambe kha si na mbi khumbulwa.

¹⁸Aniko mi na tsaka mi pfalisa, ngu ha ku si gwitiko, ngu si ni si vangako; nguko wonani taku, ani na vangela litsako Jerusalema, ni kuzumbiseka ka vathu vakwe.

¹⁹ Se ni na tsaka kona Jerusalema, ni pfalisa vathu vangu; kha ku na mbi ngadi kambe kupfala wakwe dipswi da kudil, hambi dipswi da huwa.

²⁰Ka dona kha ku na mbi maneka kambe mwanana wo hanya masiku amadotho, hambi txikosana txi txi no mbi hetisa masiku a txona, nguko mwana a na fa a ti ni 100 wa malembe, aniko muonhi wa 100 wa malembe a na ruketelwa.

²¹Se va na aka tinyumba, ve zumba ka tona; va na phaya mivhinya, ve dya mihando ya kona.

²²Kha va na mbi akela kuva txi ta zumba vamwani, kha va na mbi phayela ku si ta dyiwa ngu vamwani, nguko masiku a vathu vangu, ma na fana ni masiku a mndonga, se vasawuleki vangu va na tsakela mithumo ya manza awe, kala ve kumba.

²³Kha va na mbi thuma, hambi kuveleka vanana kasi ku va xanisa, nguko liveleko la va vo katekiswa ngu MKOMA, kumweko ni lixaka vawe.

²⁴Se ku na maheka ti to ni va xamula, va sanzi kupeka huwa; va txi ngadi ve womba-womba ni na va engisa.

²⁵Dixolwa ni txinvutana si nadya kumweko, se ngonyamo yi na dya mwasi kufana ni homu; se lithulu li na maha sakudya sa mnyoka. Kha si na mbi maha wubihi mwendo kuonha txokari ka wotshe mmango wangu wo sawuleka, kuwomba MKOMA.