Read chopi Isaya 7 Bible Online

Isaya 7 - chopi bible

Isaya 7

¹ Ku to maheka koko ka masiku a kufuma ka Akazi, mwana Jothamu, mwana Uziya, mfumeli wa Judha, ti to Rezini, mfumeli wa Siriya, ni Peka, mwana Remaliya, mfumeli wa Israyeli, ve kwelela Jerusalema, kasi ku yalwa ni ditiko dile, aniko va tandekile ku di xula.

²Se va to gela va nyumba ya ka Dhavhidha, va txi kha vona: Siriya a mahile txitumelelano ni Efrayime. Sekoko, mbilu ya Akazi ni timbilu ta vathu vakwe ti to dhudhumela, va txi nga mindonga ya txitinga, yi txi zinginiswa ngu moya.

³Sekoko MKOMA a to khene ka Isaya: Humani konkuwa, awe ni mwanako Seyari Jasubhi, mi hingeta Akazi, mi na ya mmana magwito ka mlonga wa hombe, ka nzila yi yi ku hafuhi ni thembwe ya mkuwuli.

⁴Se u na khawe kwakwe: Ti wonele, u ti malalela; u nga thave, ni mbilu yako yi nga gume mtamo, ngu mhaka ya sikhwemu simbidi sa misonje, si pukukako wutshi, ngu mahaka ya kuhenya ka Rezimi, ni ka Siriya, ni ka mwana Remaliya.

⁵Nguko Siriya, ni Efrayime, ni mwana Remaliya, va mahile txikungo txa kubiha txo kuwukela, va txi kha vona:

⁶A hi kweleleni hi ya wukela Judha, hi ya m'dhukisa, hi abanelana ditiko, hi veka mwana Tabheyali, ku e fuma hagari ka dona.

⁷MKOMA Txizimu, a khene: Mhaka yiya kha yi na mbi maheka, kambe kha va na mbi humelela.

⁸Nguko m'zinda ka Siriya ngu Dhamasku, ni msungo wa Dhamasku i Rezimi; se mndani ka mtxhanu wa magumi ni dimwedo, ni mtxhanu wa malembe, Efrayime a na xaselwa, e leka kuva ni vathu.

⁹Hambi keto, m'zinda ka Efrayime, ngu Samariya, ni msungo wa Samariya, i mwana Remaliya; ngako mi si kholwi, lambi kha mi na mbi tsana.

¹⁰Se MKOMA a to simama e womba-womba ni Akazi, a txi khene:

¹¹Ti kombelele ka MKOMA, Txizimu txako, txikombiso to kari; kombela ti to txi huma ngu hahatshi ko tshima, mwendo ngu txitimwi ko guleka ngutu.

¹²Aniko Akazi a to khene: Kha ni na mbi kombela txilo, hambi kuduka MKOMA.

¹³Sekoko Isaya a to khene: Engisani konkuwa, anu va nyumba ya ka Dhavhidha! I mhaka yayidotho yo xanisa vathu, koza mi lava ni kuxanisa Txizimu txangu kani?

¹⁴ Ngu toneto, MKOMA apune, a na mi ninga txikombiso: Wonani taku, wotuma a na mana txirumbu e veleka mwanana wa m'zambi, se ditina dakwe i Emanuweli.

¹⁵A na dya mafura ni wulombe, an'ze kuza e ziva kulamba to biha, e sawula tinene.

¹⁶Ngu ditshuri, mwanana wuwa, a sinzi kuziva kulamba to biha ni kusawula tinene, ditiko edo u thavako vafumeli vambidi va dona, di na maha dirumbi.

¹⁷Aniko MKOMA a na tisa txitimwi kwako, ni txitimwi ka vathu vako, ni txitimwi ka nyumba ya tate wako, ngu mfumeli wa Asiriya, masiku o nga ale, ma si khaliko kuta, kukhukhela ditshiku dile Efrayime a nga hambana ni Judha.

¹⁸Nguko ku na maheka taku, ka ditshiku dileya, MKOMA a na vetela mloti tiphuka ti tiku magwito ka mnambo wa Egipta, ni tinombe ti ti tsimbilako ditikoni da Asiriya.

¹⁹Totshe ti nata khandamela amu ka yotshe mikova ya siwula, ni mu ka tifa ta marigwi, amu ka mipa, ni ka sotshe sitinga.

²⁰Ka ditshiku dile, MKOMA a na kuyula vathu ngu limo lo hinda, li ku mtxhatuko ka mnambo, i ku mfumeli wa Asiriya, a no kuyula msungo, ni mapfhepfheleti a mu ka minenge, ni otshe maletu.

²¹Se ku na maheka taku, ka ditshiku dileya, ti to m'thu e fuya homu yimweyo ya makati, ni tinvuta timbidi.

²²Kambe ku na maheka tito, ngu mhaka ya kutala ka masi ya ti no ma mana, a nadya mafura; ni votshe vale va no sala hagari ka ditiko, va na dya mafura ni wulombe.

²³Kambe ku na humelela ka ditshiku dileya, ti taku, makhalo otshe a mivhinya ya 1.000, yo dingana male ya 1.000 wa matxheleni a silivhela, ku na mila sipopo ni mipa.

²⁴Vathu va na wulela kona va di ni wulaho ni tingove, nguko ditiko dotshe di na tala ngu sipopo ni mipa.

²⁵Ni ka yotshe mimango yile mi tolovelako kudima ngu misuka, kha ku na mbiswa kutsimbila m'thu, ngu mhaka ya kuthava sipopo ni mipa; ku na maha libala la tihomu, kukandetelwa ngu tinvuta.