Read chopi Isaya 8 Bible Online

Isaya 8 - chopi bible

Isaya 8

¹MKOMA a to khene kambe kwangu: Teka txileti txa hombe, u bhala ka txona, ngu mibhalo ya hombe, u txi khawe:[11] Kukuluveta kuhanda, kukuluveta kuxasela.

²Sekoko ni to teka tifakazi to thembeka i ku: Mphaxeli Uriya, ni Zakariya, mwana Jebherekiya.

³Ni to ya zivana ni msikati wangu, i ku mprofeti wa txisikati; se ene a to khura txirumbu, e veleka mwanana wa m'zambi; MKOMA a to khene kwangu: U na mraya ditina daku i Mayeri-Salali-Hasi-Bhazi.

⁴Nguko mwanana na a sinzi kuziva kuwomba ku tate wangu, mwendo ku mame wangu, tithomba ta Dhamasku ni simaha si si nga honyolwa Samariya, si na yiswa masoni ka mfumeli wa Asiriya.

⁵Se MKOMA a toya masoni ngu kuwombawomba ni nani, a txi khene:

⁶Nguko vathu vava, va txhipisile mati a Silowame, aawa ma khulungako kha kwati, ve tsakela Rezimi ni mwana Remaliya.

⁷Wona taku, MKOMA a na tisa mati a mtamo, a mnamboni, txitimwi kwawe, ngu ti to, mfumeli wa Asiriya ni wudhumo wakwe wotshe a nata ngu milonga yakwe yotshe e khulungela ka yotshe milonga yakwe;

⁸a na wulela ditikoni ka Judha kufana ni ndambi, e kukumuka kala mikoloni ka vathu. Kunawuluka ka tibhapi tako, ku na fenengeta kuanama ka ditiko dako, awe Emanuweli.

⁹Mahani diguwa da kulwa, anu matiko, mi na funyeletelwa; riyani tinzeve motshenu va matiko a kule, tsanani, mi na phatulelwa, tsanani, mi na phatulelwa.

¹⁰Sungani motshe txikungo, aniko kha txi na mbi maheka, wombani dipswi, kambe kha di na mbi tsana; nguko Txizimu txi ni nathu.

¹¹Nguko MKOMA a wombile kwangu ngu dianza dakwe da mtamo, kambe a ni gondisile ku ni si tsimbili ngu nzila ya vathu vava, a txi khene:

¹²Mi nge khanu njikungo, ka totshe ti vathu vava va ku kha vona njikungo; mi nga thaveni kudhukisela kwawe, hambi kukarateka ni ka kudotho.

¹³ Sawulekisani MKOMA wa Mabutho a Tiyimbi, nguko ngene msawuleki wanu; ngene a thisako kwanu, ngene a dhukisako kwanu.

¹⁴Sekoko, ene i nava nyumba yanu yo sawuleka, aniko a na maha dirigwi do mi gumula, ni txirigwana txo nyenyeka, ka tinyumba timbidi ta ka Israyeli; mlawu ni likoka ka vaaki va Jerusalema.

¹⁵ Se vavangi hagari kwawe, va na gumulwa ngu dona, va txi wa, ve funyeka; va na bzwetwa, ve ñolwa.

¹⁶Sungelela wufakazi, u tsanisa mlayo hagari ka vagondiswa vangu.

¹⁷Se ni na themba MKOMA wu a nga sisela khohe yakwe va nyumba ya ka Jakobe, ni na verela kwakwe.

¹⁸ Ngani wuwa, ni vanana va MKOMA a nga ni ninga, kuva sikombiso, ni sixamaliso, kona Israyeli, ngu didhawa da MKOMA wa Mabutho a Tiyimbi, awu a zumbako mmangoni ka Siyoni.

¹⁹Va txi mi gela va txi kha vona: Wotisani ava va ku ni mimoya ya vafi, ni vahuti vale va lengako, ni kungungurukela, mi txi khanu: Vathu kha va faneli ku wotisa Txizimu txawe kani? Ku nga wotiswa ka vafi timhaka ta va va hanyako kani?

²⁰Amu ka mlayo ni mu ka wufakazi! Ngako va si wombi dipswi diya,[12] kha va na mbi dhuka ve wona wuronga.

²¹Se va na rendelekela ditiko, ve xaniseka, ni kupfa nzala; ni mbimo yi va pfako nzala, va na henya, ve ruketela mfumeli wawe, ni Txizimu txawe, ve wonetela txitimwi.

²²Se va txi wonetela ha mafuni, ku nava ni tshani ni txidema, va na xaniseka ve ndindelwa txidemani.