Read chopi Levhi 11 Bible Online

Levhi 11 - chopi bible

Levhi 11

¹Se MKOMA a wombile ka Mosi ni ka Aroni a txi khene:

²Gelani vanana va ka Israyeli, mi txi khanu: Ka sotshe sihari si si kuho ha mafuni, asi mi fanelako kudya ngu siya:

³Sotshe si si ku ni txitsendo txo bhandiswa si txi maha simbidi; asiya msana ka kuva si ti dyite, si nyengako, eso mi nga sikota kusidya.

⁴Ngu mhaka yeto, mi nga dyeni asiya: Hambi si txi nyenga, mwendo kuva ni txitsendo txo mbi bhandiswa: Dikamelu, nguko dona da nyenga kambe txitsendo txa dona kha txa bhandiswa; mi fanete kuziva ti to da yila;

⁵mnvunza wa matune wu nyengako, aniko kha wu nga ni txitsendo txo bhandiswa, wa yila kwanu;

⁶mnvunza wa makati, wa nyenga, aniko kha wu nga ni txitsendo txo bhandiswa; ti ziveni ti to wa yila;

⁷khumba, yi ku ni txitsendo txo bhandiswa, si maha sitsendo simbidi aniko kha yi nyengi; ti pimeni ti to ya yila;

⁸mi nga dyeni nyama ni ya txihi txihari txa sona sile, mi nga gweseni txirumbi txa sona. Zumbani mi ti pima ti to sa yila kwanu.

⁹Ka sihari si si ku matini, ma sikota kudya sotshe asile si ku ni timbaluvalu ni mara, hambi ngako i di sa mu ka linene, mwendo mu ka minambo.

¹⁰Aniko asi si kasako ngu dibindi ni sihari si si hanyako mu ka mati si si nga ni timbaluvalu ni otshe[7] mara, mi nga si dyeni, sa yila kwanu.

¹¹Si nava si txi yila kwanu; mi nga dyeni nyama ya sona, zivani ti to ngu txirumbi txa sona txa yila.

¹²Ngu toneto, ni txihari txa mu matini txo mbi na timbaluvalu hambi mara ti pimeni ti to txa yila kwanu.

¹³Ka sinyana asi si yilako, si si faneliko kudyiwa ngu siya: Digama, dikoti ni tximhungu,

¹⁴ni likhozi, ni totshe tixaka ta matshova,

¹⁵totshe tixaka ta magwana,

¹⁶mbuwu, dikolekole, tshamani, ni totshe tixaka ta minguvi,

¹⁷ditshukulu, nyamatate ni txikhovha,

¹⁸txiwakuru, txitutu ni digwana da linene,

¹⁹mkhoromati ni totshe tixaka ta nyawungondwani, didema ni mangavilani.

²⁰Sotshe so puruma, si si tsimbilako ngu mune wa mikondo nzikalana so yila kwanu.

²¹Aniko mi nga dya sikalani so puruma, asi si tsimbilako ngu mune wa mikondo, asi si ku ni minenge yimbidi ya msana yo lapha kupinda ya masoni, kasi si mana kundaka.

²²Ka sona mi nga dya siya: Humbi ngu tixaka ta yona, txizombela ngu tixaka ta yona, nyenza ngu tixaka ta yona, ni tshera ngu tixaka ta yona.

²³Aniko simwani sitoto si tsimbilako ngu mune wa mikondo, sa yila kwanu.

²⁴Awule a gwesako txirumbi txa sona sihari sile si nga wombwa ti to sa yila, a na va a txi yila ka dotshe ditshiku donedo.

²⁵Awule a rwalako txirumbi txa sihari soneso, a fanete kukuwula syambalo sakwe, e zumba a txi yila, dotshe ditshiku.

²⁶Awule a gwesako ni txihi txihari txo mbi na txitsendo mbi so bhandiswa si maha simbidi, mwendo txo mbi nyenga, hambi a na va a txi yila.

²⁷Ti ziveni ti to sa yila sotshe sihari sa mune wa minenge, asile si tsimbilako ngu mune wa mikondo. Awule a gwesako txirumbi tximwetxo txa sona a na va a txi yila dotshe ditshiku.

²⁸Ni wule a rwalako txirumbi txa sona a fanete kukuwula syambalo sakwe ni kuzumba a txi yila ka dotshe ditshiku dile. Asiya nzimaha so yila kwanu.

²⁹Se sihari si si hanyako ha mafuni, si fanete si ziwa ti to sa yila, i ku: Dikhututu, dikonzo ni mkwaxe, ni totshe tixaka ta sona,

³⁰nungu, ngwenya, txivarara, m'bundwa ni lifankanda.

³¹Ngu soneso tito, so yila kwanu hagari ka sihari si si kasako.

³²Ni sotshe siya sile siwako txitimwi ka sona, ngako si txi fa, mwendo siya sa mapulango, syambalo, madhowo, masaka, hambi ni sihi si m'thu asi thumisako, ka wuhi ni wuhi mthumo wu a wu mahako, si yilite. Si na betwe matini si kuwulwa, ni kuzumba si txi yila dotshe ditshiku. Se ngu msana si na maneka si di basile.

³³Ngako tximwetxo txa sona sihariso txi txi wela mu ka txiya txa mraka, txi di fite, txiya txonetxo txifanete kufaywa, ni txile txi manekako mndani ka txona txi na va txi txi yila.

³⁴Ngako mati ma ku mu ka txona txiyetxo me maneka ma txi thelwa txitimwi ka sakudya so mbi yiliswa, sa yila ni sona.

³⁵Se ni txihi txiya txi txi welako txitimwi ka txirumbi txa sihariso, txi na va txi txi yila; txikho ni khadi, si na fayetelwe; sa yila; ngu toneto eso sa yila kwanu.

³⁶Kambe ngako txisima mwendo dithange txi di ni mati, ma nava ma di sawulekile; aniko awule a gwesako txirumbi txa kona a na va a txi yila.

³⁷Ngako txirumbi txi txi wa txitimwi ka timbewu to phaya, timbewu toneto ti nava ti di basile.

³⁸Aniko mbewu ngako yi txi nakaniswa ngu mati, se txirumbi txa sona sihariso txi txi wa txitimwi ka yona mbewuyo, yi maneka yi txi yila.

³⁹Ngako ku txi fa txifuyo txo dyiwa, awule a gwesako txirumbi txa kona, a na va a txi yila ka dotshe ditshikudo.

⁴⁰Awule a dyako nyama ya txona txiharitxo txo fa, a na kuwula syambalo sakwe, e maneka a txi yila ka dotshe ditshikudo; ni wule a rwalako txirumbi txa kona a na kuwula syambalo sakwe, e yila ka dotshe ditshikudo.

⁴¹Sihari si si kasako ha mafuni sa yila; mi nga si dyeni,

⁴²si si kasako ngu dibindi ni si si tsimbilako ngu mune wa mikondo, mwendo minenge yo tala. Mi nga si dyeni, nguko sa yila.

⁴³Mi nga ti nyenyeziseni ngu sile si tsimbilako ngu dibindi si kasako, mi nga ti yiliseni ngu ku si gwesa, nguko mi na va mi txi yila.

⁴⁴Ani ngani MKOMA, Txizimu txanu. Ti maheni vasawuleki, nguko ani ni msawuleki! Mi nga ti nyenyeziseni ngu mhaka ya sona sihari si si kasako ha mafuni!

⁴⁵ Kha ditshuri, ani ngani MKOMA, ni nga mi humisa ditikoni ka Egipta, kasi ku ni txi va ni di Txizimu txanu. Ngu toneto, mahani vo sawuleka. Nguko ani ni sawulekile.

⁴⁶Ayiya mithetho yi yi nga vekwa ngu didhawa da sihari, ni sinyana sa totshe[8] tixaka, si si kasako ngu dibindiha mafuni.

⁴⁷Kasiku mi ziva kuhambanisa so yila ni so mbi yila, ni si si dyiwako, ni si si si dyiwiko.