Read chopi Levhi 12 Bible Online

Levhi 12 - chopi bible

Levhi 12

¹MKOMA a to womba kambe ka Mosi a txi khene:

²Gela vanana va ka Israyeli sileleto siya: Wamsikati wu a nga mana txirumbu, se e veleka mwanana wa mfana, a na va a txi yila mu ka mtxhanu wa masiku ni mambidi, ku nga mbimo yi a wonako mitxima yakwe.

³ Se ka ditshiku da wutxhanu ni mararu mwanana a na yiswa wukwerani.

⁴Ngu msana, a na verela kambe magumi mararu a masiku ni masiku mararu, kala e basa ka mnoha wakwe, ti di ngeto, a nga gwese ni txa tximwetxo txa simaha so sawuleka, kala kuza ku txi guma masiku a kubasiswa kwakwe.

⁵Ngako a txi veleka mwanana wa muhorana, a na yila amu ka mavhiki mambidi, ku nga mbimo yi a ku ni mitxima yakwe, a na verela mtxhanu wa magumi a masiku ni digumi dimwedo, ni mtxhanu wa masiku ni dimwedo, ngu mhaka ya mnoha wakwe, kasi a na basiswa.

⁶Ngako ma di gumile masiku a kubasiswa kwakwe, ngu ku va a di velekile mwanana wa mfana mwendo wa muhorana, a na va a txi ya maha mningelo ka mphaxeli, ha txikeni ka ditenda da msengeletano, ngu txinvutana txa dilembe dimwedo, kasi kumaha mhamba yo hiswa, ni txituvani, ni dituva, kasi kumaha mhamba yo basisa txionho.

⁷Mphaxeli a na va a txi si ningela ka MKOMA, a na mahela wule wamsikati mhamba yo dihela txionho, se mame a na va e basiswa ka wungozwa wakwe. Sileleto siya si fanete kulondetwa ngu wamsikati wu a nga veleka mwanana wa mfana mwendo wa muhorana.

⁸ Aniko ngako mame wa kona asi sikoti kumana txinvutana, a na ningela matuva mambidi mwendo mavhondo mambidi a situvani, dimwedo i mhamba yo hiswa, dimwani i mhamba yo kuwula txionho. Mphaxeli a na mmahela mhamba ya mdiho, se ene a na basiswa.