Read chopi Levhi 13 Bible Online

Levhi 13 - chopi bible

Levhi 13

¹MKOMA a to womba ka Mosi ni ka Aroni, a txi khene:

²Ngako m'thu a txi woneka ha mmidi kwakwe wubalala mwendo dithanzi, di txi nga tshekela, m'thu eneyo a na tekwa a txi heleketwa ka mphaxeli Aroni, mwendo ka mmweyo wa vanana vakwe.

³Se Mphaxeli a na wonisisa ha mmidi kwakwe, ngako a txi wona mapfhete akwe ma txi basa, mwendo dithanzi di txi tshima, kupinda ngutu lihohe la nyama yakwe, yi na va i di tshekela; ngako mphaxeli a txi muwona, a na womba ti to wa yila.

⁴Se ngako dithanzi i ti do basa aniko di si thisi, hambi ni mapfhete a kona, ma sa hinduka ma txi basa, mphaxeli a na ruma ti to m'thu eneyo a na zumbe ka ekha kala mtxhanu wa masiku ni mambidi.

⁵Ngu msana ka mtxhanu wa masiku ni mambidi, mphaxeli a na mu wonisisa kambe. Ngako dithanzi di sa endeleka, di di zumbisile toneto, mphaxeli a na ruma kambe ti to eya zumba ka ekha, amu ka mamwani masiku a mtxhanu ni mambidi.

⁶Ka ditshiku da wutxhanu ni mambidi, a na engeta e mu wonisisa. Se ngako a txi wona ti to dithanzi kha da endeleka, kambe kha di bhilivili, mphaxeli a na mu wombe ti to a basile. Ta komba ti to mbuhalala dwe; mlwati a na kuwula syambalo sakwe, se a na va a di basile.

⁷Aniko ngako dithanzi di txi endelekela ha nyamani kwakwe, ngu msana ka kuva a di ti kombisile ka mphaxeli, aha a nga va a di getwe ti to a na ti basise, a na va a txi kombisa kambe dithanzi ka mphaxeli.

⁸Ngako mphaxeli a txi wona ti to kha ditshuri dithanzi di endelekile ha mmidi kwakwe, a na m'gela a txi khene kha basa; ana ni tshekela.

⁹Ngako m'thu a txi telwa ngu mtungu wa tshekela, a na yiswa ka mphaxeli, awule a no ya mu wonisisa.

¹⁰Ngako a di ni dithanzi ha mmidi kwakwe do basa, di txi hindula ni mapfhete akwe, ma txi basa ha nyamani kwakwe, ku txi maneka ku txi bhilivila,

¹¹i tshekela yo tshima a ku nayo ha mmidi kwakwe, se mphaxeli a na m'gela ti to kha basa. Kambe kha ti laveki ti to e mu humisa kasiku eya zumba ka ekha, ni kuya mxolisisa. Nguko ti zivekile ti to kha basa.

¹²Ngako tshekela yi txi tama yi endeleka ha mmidi kwakwe, yi txi humelela, kukhukhela ha msungo kala mikondoni, aha koza mphaxeli a txi kholwa, ngu ku ti wona ngu maso akwe,

¹³sekoko mphaxeli a na mu wonisisa. Ngako a txi wona ti to kha ditshuri wulwali wa tshekela wu enetile wotshe mmidi wakwe, wu basile, ngu toneto a basile.

¹⁴Aniko ka ditshiku dile ku no woneka nyama yo bhilivila, a na va a sa basa.

¹⁵Ngako a txi wona ti to dithanzi do bhilivila aha ka nyama ya mmidi wakwe, mphaxeli a na m'gela a txi khene kha basa; nyama yo bhilivila ya yila, se ene kha basa.

¹⁶Ngako nyama yo bhilivila yi txi hinduka yi txi maha yo basa, mlwali a fanete e tshumela a txi ya ka mphaxeli.

¹⁷Mbimo yi a txi mu wonisisa, ti txi komba ti to nyama ya ha mmidi kwakwe yo bhilivila, yi hindukile yi tshumela yi basa, mlwali a basile.

¹⁸Ngako m'thu a di tetwe ngu dizuku da txilonda, txi txi hola

¹⁹se ha wukhaloni ka txibawa txa txilonda, ku txi maneka txibawa txo basa, mwendo dithanzi do bhilivila, a na tsule eya ti kombekisa ka mphaxeli.

²⁰Mphaxeli a na mu wonisisa, se ngako lihohe lakwe li txi maneka li di tshimile, ahale ka wukhalo wule, ni mapfhete a kona me maneka ma di basile, wa yila. I tshekela yi nga humelela aha ka txibawa.

²¹Aniko ngako a txi wonisisa, e wona ti to mapfhete kha ma basa, mwendo txibawa kha txa tshima kupinda nyama yakwe, mphaxeli a na m'gela e zumba ka ekha, mtxhanu wa masiku ni mambidi.

²²Ngako txibawa txi txi endeleka ha mmidi kwakwe, mphaxeli a na m'gela ti to kha basa, njibawa txa tshekela.

²³Ngako txibawa txi si endeleki txi txi zumbisa toneto aha ka mmidi wakwe, njibawa txa txithunye; mphaxeli a na m'gela ti to a basile.

²⁴Ngako mmwani m'thu a txihya ngu mndilo ha nyamani ka mmidi wakwe, se aha a nga hya kona ku txi maneka dithanzi do basa di txi bhilivila mwendo di txi basa,

²⁵mphaxeli a na wonisisa ha wukhaloni ka nyama aha ka mmidi wa mlwali, ngako mapfhete a kona ma txi basa, ni dithanzi da kona di txi nga do thisa kupinda nyama yakwe, se ti na komba ti to dithanzi nda tshekela yi nga maneka ngu kuhya; mphaxeli a na mu womba ti to kha basa; edo dithanzi nda tshekela.

²⁶Aniko, ngako a di mu wonisisile, mphaxeli e wona ti to mapfhete akwe kha ma basa, mwendo kha ma tshima kupinda nyama yakwe, ni ti to nyama ya kona kha yi basi, a fanete e m'gela ku e zumba ekha mtxhanu wa masiku ni mambidi.

²⁷Se mphaxeli a na mu wonisisa ka ditshiku da wutxhanu ni mambidi; ngako dithanzi didi endekile ha nyamani kwakwe, mphaxeli a na m'gela ti to kha basa, ana ni tshekela.

²⁸Ngako txibawa txi txi maneka txi di emile ha wukhaloni ka txona, txi si endeleki mwendo txi si woneki ngutu, etxo njibawa txa txilonda txohya, mphaxeli a na womba ti to a basile, nguko etxo njibawa txa kuhya.

²⁹M'thu wamwamna mwendo wamsikati, va txi telwa ngu dithanzi ha msungo mwendo ha txiletuka,

³⁰se mphaxeli ngako a di xolisisile, e wona ti to ha wukhaloni hale, didhowo dakwe di tshimile, ni mapfhete a kona ma hehukile ni kuhinduka me maha a halandi, a fanete e va gela ti to kha va basa; dithanzi, i ku tshekela ya ha msungo mwendo ya ha txiletuni.

³¹Ngako mphaxeli a txi wona ti to didhowo ha wukhaloni hale kha da tshima ngutu aha ka nyama yakwe, ni ti to kha ka nzihala, a fanete e ruma ti to e zumba ka ekha, mtxhanu wa masiku ni mambidi.

³²Se ngu msana ka mbimo yoneyo, ngako mphaxeli a di mxolisisile e wona ti to dithanzi kha da endeleka, ni mapfhete kha ma hehuka ni kuhiduka me maha a halandi, mwendo nyama yakwe kha ya tshima,

³³mlwati a na gelwa, asi kaywi misisi ni txiletu ka wukhalo wule wu ku ni dithanzi, se mphaxeli a na mruma kambe ku e zumba ekha, mamwani masiku a mtxhanu ni mambidi.

³⁴Ngako msana ka ale masiku a mtxhanu ni mambidi a di woni ti to dithanzi kha da endeleka, ni ti to ku kha da tshima aha ka nyama yakwe, mphaxeli a na m'gela ku a basile.

³⁵Aniko, ngu msana ka kuva a di getwe ti to a basile, dithanzi di txi ya masoni ngu kuendeleka,

³⁶sekoko ngako a di mxolisisile mphaxeli e wona tito, ha mmidi dithanzi di endelekete, kha kulaveki e mu wonisisa ku mwendo mapfhete akwe ma mahile a halandi; wa yila.

³⁷Ka toneto, ngako a txi wona ti to dithanzi di emile, ku txi khata kumila mapfhete a mtima, tikomba ti to dithanzi di hote. mlwali a basile, se mphaxeli a na m'gela ti to a basile.

³⁸M'thu wokari, wa wamwamna mwendo wa wamsikati, a txi woneka ni mathanzi o basa ha mmidi kwakwe,

³⁹ni kungako a di mxote mphaxeli e wona ti to mathanzi oneyo ma basile, kambe kha ma phatimi, nzirumbani dwe si nga humelela ha nyamani kakwe; a basile.

⁴⁰Ni ku ngako wamwamna a txi gumelwa ngu misisi, e maneka a di ni lipala, a basile.

⁴¹Se ngako misisi yakwe ya ha mbanza yi txi wa, lipala dwe; ene a basile.

⁴²Kambe ngako didhawa di ku singako ni misisi ha msungo mwendo ha ka mbanza, ku txi woneka txibawa txo basa ni kubhilivila, i ngava i di tshekela yi nga muhumelela ha msungo mwendo hambanza.

⁴³Mbimo yi a nga mxolisisa mphaxeli e mana ti to dithanzi da ha msungo mwendo da ha mbanza di basile ni kubhilivila, na a txi woneka ti to a nga va a di ni tshekela,

⁴⁴eyo m'thu a tetwe ngu tshekela, kha basa; se mphaxeli a na m'gela ti to kha basa, ngu mhaka ya wulwali wu a ku nawo ha msungo mwendo hambanza.

⁴⁵Awule a ku ni mtungu wa tshekela, a fanete e tsimbila a di ambate simaha so sakala kumweko ni misisi yo mbi khwaywa ni kufenengeta txisofu kala ha txiletuni, na a txi huwelela a txi khene: Kha na basa! Kha na basa!

⁴⁶Ngako dithanzi di txi simama ha nyamani ka mmidi wakwe, a na va a txi ziwa ti to kha basa, se a na hanya ekha, hahanze ka wugovelo.

⁴⁷Ngako di txi woneka dithanzi da tshekela ahawa ka txihi ni txihi tximaha txa kwambala txa matoya a nvuta mwendo txa linyu,

⁴⁸mwendo ka yihi ni yihi nguwo mwendo disokiso do mahwa ngu linyu mwendo matoya a nvuta, hambi ni ka txhi tximaha txo mahwa ngu didhowo;

⁴⁹ngako txibawetxo i di txa mkuxe mwendo txo bhilivila, aha ka nguwo, ka didhowo, ka ngoti, ka dijoke, hambi ni ka txihi tximaha txo mahwa ngu didhowo, edo dithanzi nda tshekela, di fanete kukombiswa ka mphaxeli.

⁵⁰Se mphaxeli a na xolisisa dithanzi da tximaha, e ruma ku txi vekwa tximahetxo txi di phutetwe, txi heta mtxhanu wa masiku ni mambidi.

⁵¹Sekoko ngu msana ka masikuyo a mtxhanu ni mambidi, a na xolisisa mtungu ewo, se ngako wu di endelekete aha ka nguwo, ka ngoti, ka dijoke, ka didhowo, hambi ni ka txihi tximaha txi nga mahwa ngu didhowo, txibawa etxo, i tshekela yo khurumbelisa, tximaha txonetxo txa yila.

⁵²Txi fanete txi hiswa, hambi i di txyambalo, nguwo, mwendo disokiso do mahwa ngu matoya, hambi ni txihi tximaha txa didhowo, atxile txibawa txi nga woneka ka txona, i tshekela yo sotela.

⁵³Mbimo yi a txi xolisisako mphaxeli, e wona ti to txibawa kha txa endeleka, aha ka txyambalo, mwendo ka disokiso, mwendo ka ni txihi tximaha txa didhowo;

⁵⁴sekoko mphaxeli a na ruma ti to txi txi kuwulwa, ni kuvekwa txi di phutetwe, mtxhanu wa masiku ni mambidi.

⁵⁵Se ngu msana ka kuva txi di kuwutwe, mphaxeli a na wona ti to txibawa kha txa txitxeka ka hanyelo ya txona, hambi txi sa endeleka kambe, tximaha txonetxo txa yila; txi khurumbelisilwe masoni ni msana ka txona.

⁵⁶Se, ngu msana ka kuva txi di kuwutwe, mphaxeli a na wonisisa aha ka txibawa, ngako txi txi komba ti to txi pfhutekile ka kudotho, a na wila aha ka txyambalo, ka didhowo, ka ngoti mwendo ka dijoke.

⁵⁷Se, ngu msana ka toneto, ngako txibawa txi txi tshumela txi woneka aha ka txyambalo, ka nguwo, ka ngoti, ka dijoke, hambi ni txihi tximaha txi nga mahwa ngu didhowo, txi khurumbete, a na txi hisa ha mndiloni txi txi nga telwa ngu txibawa.

⁵⁸Aniko nguwo, ngoti, dijoke, hambi ni txihi tximaha txi nga mahwa ngu didhowo, atxi txi nga ti kuwutwe, atxi kambe txibawa txi nga pfhiteka, txi na kuwulwa ka wumbidi txi maneka txi di basile.

⁵⁹Asiya nzileleto so tsimbilelana ni sibawa sa tshekela, nguwo, ngoti, ni dijoke, mwendo tximwani txo lukwa, hambi ni txihi tximaha, atxi txi nga mahwa ngu didhowo, kasi ku si ziwa ti to si basile, mwendo kha sa basa.