Read chopi Levhi 14 Bible Online

Levhi 14 - chopi bible

Levhi 14

²Mlayo wa m'thu wa tshekela, ka ditshiku da kubasiswa kwakwe ngu wuwa: A na yiswa ka mphaxeli,

³se mphaxeli a na huma nayo hahanze ka wugovelo kasiku eya mxolisisa. Ngako a txi wona tshekela yi di hote,

⁴mphaxeli a na ruma ti to awu a no basiswa, a na tiselwe sinyana simbidi so mbi yila, so hanya, ni didhavi da mkedhari, ni nguwo yo bhilivila, ni didhavi da hisope.

⁵Mphaxeli a na ruma kuwilwa thamo ya txinyana tximwetxo txi vekwa amu ka khadi ya mraka, ayi yi ku ni mati amanene.

⁶Ngu msana, a na teka txinyana txi txi hanyako, didhavi da mkedari, nguwo yo bhilivila, ni didhavi da hisope, e si nakanisa ngu mnoha wa txinyana txi nga dawelwa txitimwi ka mati o basa.

⁷Se a na xwayela mtxhanu wa sikhati ni simbidi ngu sona ka wule a basiswako ka mtungu wa tshekela, e m'gela ti to a basile, ngu msana e leka txinyana txo hanya txi puruma txiya txitingani.

⁸Se awule a basiswako, a na kuwula syambalo sakwe, e kuyulwa yotshe misisi yakwe, e samba ngu mati; a na va a di basile, ngu msana, a na wulela wugoveloni, aniko a na zumba hahanze ka ditenda dakwe, mtxhanu wa masiku ni mambidi.

⁹Ku di pindile mtxhanu wa masiku ni mambidi, a na kuyulwa kambe misisi ni txiletu; a na kuwula syambalo sakwe e samba mmidi ngu mati, se e va a di basile.

¹⁰Ka ditshiku da wutxhanu ni mararu, a na teka sinvutana simbidi so mbi na txibawa, ni txinvutana txa dilembe dimwedo, txo mbi na txibawa, ni mipimo yiraru ka digumi da yona ya mpupu wo vhuvwa ni mtona, ku txi va i di mningelo wa sakudya, ni hafu ya mfarasa ya mtona.

¹¹Se Mphaxeli wule a thangelako mhamba yiya yo basisa, a na teka m'thu wule a basiswako, ni sotshe silo sa kona, eya si kombisa masoni ka MKOMA, ha txikeni ka ditenda da msengeletano.

¹²Sekoko, mphaxeli a na teka txinvhutana tximwetxo e maha mhamba yo dihela minandu, kumweko ni mtona, e si ningela ngu ku si ndiwitela, masoni ka MKOMA.

¹³Ngu msana, a na wila thamo ya txinvhutana ha wukhaloni hale kudayelwako kona sihari sa mningelo wa mhamba yo kuwula sionho, ni mningelo wa mhamba yo hiswa, ha wukhaloni ko sawuleka; nguko mningelo wa mhamba ya minandu, ni mningelo wa mhamba ya txionho, simaha sa kona si lumba mphaxeli, si sawulekile ngutu.

¹⁴Aniko mphaxeli a na teka mnoha wa mningelo wa mhamba ya kudivalelwa ka minandu, e tota ngu wona tshokani ka nzeve ya txinene ya wule a sawulekiswako, ka litiho la nyagotwe la dianza da txinene, ni ka litiho la nyagotwe la mkondo wakwe wa txinene.

¹⁵Sekoko, mphaxeli a na teka mtona wa hafu ya mfarasa e wu thela manzani kwakwe ka txibhabha,

¹⁶se e beta litiho lakwe la dianza da txinene, amu ka mtona wu wu ku ka dianza da txibhabha, a txi xwayela ngu lona litiho liya li ku ni mtona, amu ka mtxhanu wa sikhati ni simbidi, masoni ka MKOMA.

¹⁷Ngu mtona wu wu nga sala amu ka dianza dakwe, mphaxeli a na tota ngu wona aha ka tshoka ya nzeve ya txinene, ya ene wule a basiswako, ni ka litiho la nyagotwe la dianza da txinene, ni litiho la nyagotwe la mkondo wa kona wa txinene, kona mule a nga gwesa kukhatani ngu mnoha wa txihari txa mningelo wa mhamba.

¹⁸Se mtona wu wu nga sala mu ka dianza, mphaxeli a na wu tota ha msungo ka wule a basiswako, se a na mmahela mhamba ya kudihela txionho, masoni ka MKOMA.

¹⁹Sekoko, mphaxeli a na maha mningelo wa txionho, e maha mhamba ya kudivalelwa ngu wule a basiswako ka nzambwa yi a ku nayo. Ngu msana a na wila thamo ya txihari txa mningelo wa mhamba yo hiswa,

²⁰a na hisa mningelo wo hiswa, kumweko ni sotshe sakudya, ha txiluveloni; e mahela m'thu wule mhamba ya divalela, a na va a di basile.

²¹Kambe m'thu wu i ku txisiwana, a si nga ni mitamo ya kona, a nga sikota kuteka txinvutana tximwetxo, kasi kuya maha mhamba ya m'diho ngu txona, ni mhamba yo ndiwitela, kasi e divalelwa, ni mpimo wa wugumi wa mpupu wa wunene, wo vhuvwa, kumweko ni mtona, ka mhamba, ni hafu ya mfarasa wa mtona,

²²ni matuva mambidi mwendo mavhondo mambidi a situvani, nga ti a sikotisako tona, dimwedo nda mhamba ya txionho, dimwani nda mningelo wo hiswa.

²³Ka ditshiku da wutxhanu ni mararu, a na tisa miningelo yiya ka mphaxeli, ha txikeni ka ditimba da msengeletano, masoni ka MKOMA, miningelo yiya yi na va i di ya mhamba ya kubasiswa kwakwe.

²⁴Mphaxeli a na teka txinvhutana txa mhamba ya minandu, ni hafu ya mfarasa ya mtona, se e si ningela, na a txi si ndiwitela masoni ka MKOMA.

²⁵Sekoko a na wila thamo ya txinvhutana txa mhamba ya minandu, ni mnoha wa txona, e gwesa ngu wona tshokani ka nzeve ya txinene ya wule a sawulekiswako, ni ka litiho la nyagotwe la dianza da txinene, ni nyagotwe wa mkondo wakwe wa txinene.

²⁶A na thela mtona wa wudotho amu ka dianza da txibhabha kwakwe apune.

²⁷A na xwayela mtona, mtxhanu wa sikhati ni simbidi, ngu litiho la dianza da txinene, lo nakaniswa amu ka mtona, masoni ka MKOMA.

²⁸Ngu wonewo mtona a na gwesa tshokani ka nzeve ya txinene ya wule a sawulekiswako, ni ka litiho la nyagotwe la dianza da txinene, ni litiho la nyagotwe la mkondo wa txinene, kona hale a nga gwesa kukhatani ngu mnoha wa mhamba ya minandu.

²⁹Ngu mtona wu wu nga sala dianzani kwakwe, mphaxeli a na wu thela ha msungo ka wule a sawulekiswako, kasiku e mana kudivalelwa ngu MKOMA.

³⁰Se a na maha mningelo ngu dituva, mwendo divhondo dimwedo da txituvani, nga ti a ti kotisako tona awule a basiswako.

³¹Tximwetxo txa sona sinyaneso, txi a no txi mana, txi maha mphaxo wo thavisa txionho, ni tximwani nja mningelo wo hiswa, wa sakudya; se mphaxeli a na mmahela mhamba ya divalelo, masoni ka MKOMA.

³²Asiya nzileleto so basisa awule a nga ti ni tshekela, ngako a si nga ni mtamo wo mana asi si si dingana.

³³MKOMA a wombile kambe ka Mosi ni Aroni, a txi khene:

³⁴Anu mi na wulela ka ditiko da Kanana, adi ani ni lavako ku mi ninga, di txi maha thomba yanu. Ngako mi di koneyo, se ni txi thuka ni humelelisa mtungu wa tshekela ka dimwedo da maseta a nyumba yanu,

³⁵nyamne wa nyumba yoneyo, a fanete a txi ya gela mphaxeli a txi khene: Ngu bha ku humelete mtungu nyumbani kwangu.

³⁶Se mphaxeli a na ruma ti to ku humiselwa sotshe simaha si si ku mu nyumbani, na a sinzi kuya yi xolisisa, kasiku ti si maheki ti to sotshe si si ku nyumbanimo, si si nyenyeziswi; se ngu msana, nyumba a na yi xolisisa.

³⁷Ngako a txi wona ti to txibawa ha disetani txa di dokovelisa di txi maha mkungu mwendo kubhilivila, na di txi woneka kumaha diphala kupinda dotshe diseta,

³⁸mphaxeli a na huma a txi ya ka didhawa da hahanze ngu ha txikeni ka nyumba, e ruma yi txi sekwa amu ka mtxhanu wa masiku ni mambidi.

³⁹Ngako ku di pindile oneyo masiku a mtxhanu ni mabidi, mphaxeli a na ya kambe a txi ya xolisisa nyumba. Ngako txibawa txi di endelekile ha disetani,

⁴⁰sekoko mphaxeli a na ruma kuthaviswa marigwi a hale ku nga humela kona txibawa, se ma fanete me tshotshwa ka wukhalo wo mbi vhuna, hahanze ka didhoropa.

⁴¹A na ruma kambe ti to nyumba yotshe yi txi rwembwa mndani ka yona, ni nzambwa yi yi no maneka ka yona, yi fanete yi tshotshwa ditalani, hahanze ka didhoropa.

⁴²Ngu toneto, va na veketela mamwani marigwi o hambana kona hale ma nga ti ti kona mamwani, se va txi kopola nyumba kambe.

⁴³Ngako msana ka kuva va di thavisile marigwi, ni kuva va di rwembile va txi kopola kambe nyumbeyo, mtungu wa engeta wu txi humelela,

⁴⁴ni mphaxeli, ngako a txi yi xolisisa, e wona ti to txibawa txiya masoni ngu kuendeleka, njikombiso txo nyumba yi na ni tshekela yo karatisa, ya yila.

⁴⁵Se yotshe nyumba yi na khundumuswa; marigwi, mapulango ni mafu o kopola ngu ona si txi tshotshwa ha ditalani, hahanze ka didhoropa.

⁴⁶Se awule a wulelako ka nyumba yi yi nga sekwa mndani ka masiku a kona, a na va a txi yila dotshe ditshiku dile, kala ni minova.

⁴⁷Kambe awule a otelako ka yona, mwendo wule a dyako sakudya a di mndani ka yona, a na va a txi kuwula syambalo sakwe.

⁴⁸Ngako mphaxeli, a txi engeta e yi xolisisa, e wona tito, ngu msana ka kuva yi di kopotwe, kuwoneka ti to mtungu kha wa endeleka, a na womba ku yi basile; nguko mtungu wu gumile.

⁴⁹Ngu mhamba yo basisa nyumba, kulaveka sinyana simbidi, didhavi da mkedari, nguwo yo bhilivila ni didhavi da hisope;

⁵⁰mphaxeli a na daya txinyana tximwetxo aha ka khadi ya mraka yi ku ni mati o basa,

⁵¹Sekoko a na beta didhavi da mkedhari, ni didhavi da hisope, nguwo yo bhilivila, ni txinyana txi txi hanyako, amu ka mnoha wa txinyana txi txi nga dawa, ni ka mati o basa, e xwayela nyumba amu ka mtxhanu wa sikhati ni simbidi.

⁵²Ngu mnoha wa txinyana txi txi nga dawa ni mati o basa, ngu txinyana txo hanya, ni didhavi da mkedari, ni didhavi da hisope, ni nguwo yo bhilivila, a na maha mhamba yo basisa nyumba yile.

⁵³Se ngu msana a na leka txinyana txo hanya txi puruma ngu kutxhatxheka txi txi ya hahanze ka didhoropa, a txi maha mhamba yo sawulekisa nyumba, aha yona yi no maneka yi txi basa.

⁵⁴Awuwa mlayo wa yitshe mitungu ya tshekela, ni theti,

⁵⁵ni mtungu wa tshekela ya tinyumba ni ya syambalo,

⁵⁶ka mtungu wa sithunye, wuhalala, ni mikura

⁵⁷kasi kugondisa ti to ditshiku muni di txomaha txi nga mbi basa, ni ditshiku di txi nga basa. Awuwa mlayo wa tshekela.