Read chopi Levhi 15 Bible Online

Levhi 15 - chopi bible

Levhi 15

¹MKOMA a gete Mosi ni Aroni a txi khene:

²Zivisani vanana va ka Israyeli sileleto siya: Ngako wamwamna wokari a txi lwala ngu txiputu mmidini kwakwe, kha basa, wa yila.

³Mlayo wu wu nga vekelwa m'thu wu a lwalako ngu txiputu, ngu wuwa: Ngako txiputu txi txi huma mmidini kwakwe, mwendo ngako mmidi wakwe wu txi tsiveka, eyo m'thu kha basa, wa yila.

⁴M'bhedhu wu a otelako ka wona ene, wa yila, ni ka wuhi wukhalo a khalahatshako ka wona, ni wona wu na va wu txi yila.

⁵Awule a gwesako ahale ene a nga otela kona, a na kuwula syambalo sakwe, e samba mmidi wakwe, se e zumba a txi yila ka dotshe ditshiku donedo.

⁶Awule a otelako ahale ene a nga ti otete kona, a na va a txi kuwula syambalo sakwe, e samba mmidi wakwe e maneka a txi yila ka dotshe ditshiku dile.

⁷Awule a gwesako m'thu wule a lwalako a na kuwula syambalo sakwe, e samba mmidi wakwe ni kumaneka a txi yila ka dotshe ditshiku dile.

⁸Ngako m'thu wule a lwalako a txi thurela wu a nga basa, awule a nga thurelwa a na kuwula syambalo sakwe, e samba mmidi wakwe ngu mati, ni kuva a txi yila ka dotshe ditshiku dile, kala ni minova ya kona.

⁹Txigabhata txi m'thu wo lwala ngu txiputu, a nga gadha txihari ngu ka txona, txi na va txi txi yila.

¹⁰M'thu wuhi ni wuhi a gwesako tximaha txi txi nga khalahatshelwa ngu ngene, a na va a sa basa kala kuswa ka ditambo; ni wuhi a tekako tximahetxo, a fanela kukuwula syambalo sakwe, e samba mmidi, hambi keto, a na va a sa basa, kala kuswa ka ditambo.

¹¹Awule a gweswako ngu m'thu wo lwala ngu txiputu, a sa samba manza, a fanete kukuwula syambalo sakwe e samba mmidi ni kumaneka a txi yila ka dotshe ditshiku dile.

¹²Tikhadi ta mraka ati ene a nga ti gwesa, ti na faywe, ani simaha sa mapulango si na guvwe si kuwulwa ngu mati.

¹³Ngako m'thu wule a nga ti ni mtungu wu wu nga mu yilisa, wu txi maneka wu di hote, a fanete e bala mtxhanu wa masiku ni mambidi msana ka kubasiswa kwakwe. Se a na va a txi kuwula syambalo sakwe, e samba mmidi wakwe ngu mati o basa, se a na va a di basile.

¹⁴Ka ditshiku da wutxhanu ni mararu, a na teka matuva mambidi, mwendo mavhondo mambidi a situvani, eya tikomba masoni ka MKOMA, ha txikeni ka ditenda da msengeletano, e si ningela ka mphaxeli.

¹⁵Mphaxeli a na maha mningelo wa mhamba ngu txionho, ngu txinyana tximwetxo, e maha mningelo wo hiswa ngu tximwani txinyana, se mphaxeli a na maha mhamba yo kuwula txionho masoni ka MKOMA, ya mtungu wu a ngadi nawo.

¹⁶Ngako m'thu wokari wa wamwamna a txi thuka a txi huma mnoha wa mbewu yakwe ya liveleko, a na va a txi samba mmidi wakwe wotshe ngu mati, e yila dotshe ditshiku kala kuswa ka ditambo.

¹⁷Sotshe syambalo ni sotshe simaha sa didhowo si nga va si di dotetwe ngu mbewu ya liveleko, si fanete kukuwulwa ngu mati, si maneka si txi yila kala ni minova ya kona.

¹⁸Ngako wansikati a txi otela ni wamwana, a wu kwakwe yi nga huma mbewu ya liveleko, vona ngu wumbidi wawe va fanete kusamba mimidi hambi keto, va na va va sa basa, kala kuswa ditambo.

¹⁹Wamsikati wokari ngako a di ka mbimo ya mitxhima, a na va a txi yila amu ka mtxhanu wa masiku ni mambidi. Awule a manekako a txi m'gwesa, a na va a txi yila, kala minova.

²⁰Ni ka wuhi wukhalo a manekako a txi otela ka wona, ni ka wuhi wukhalo a manekako a txi khalahatsha ka wona, wu na va wu txi yila.

²¹Awule a gwesako ditaho dile ene a nga ti otete ka dona, a na kuwula syambalo sakwe ni kusamba mmidi wakwe e maneka a txi yila, ka dotshe ditshiku dile.

²²Awule a no gwesa ni ka txihi tximaha txi ene a nga ti khalahatshile ka txona, a na kuwula syambalo sakwe ni kusamba mmidi wakwe ngu mati, a na maneka kambe a txi yila ka dotshe ditshiku dile.

²³Ni ku ngako ku di vekilwe tximaha ha m'bhedhuni mwendo aha ka txikhalo txi a nga ti khalahatshile ka txona, m'thu e thuka e txi gwesa, m'thu wuwa a na va a sa basa, kala kuswa ka ditambo.

²⁴Ni kungako wamwamna a txi otela nayo, wulwati wakwe wu txi mnamarela, a na va a sa basa mndani ka mtxhanu wa masiku ni mambidi; se otshe mataho awa a otelako ka ona, ma nava ma sa basa.

²⁵Wamsikati wokari, awule a ku ni kuhuma ngutu mnoha wakwe, amu ka masiku okari, i si nga mbimo yakwe ya mitxima, mwendo kuhuma ka mnoha wakwe, ku txi ya masoni kupinda mbimo yakwe ya mitxima, a na va a sa basa ka yotshe mbimoyo ya kuhumela ka mnoha, ku nga mbimo yakwe ya mitxima.

²⁶Mataho otshe awa a otelako ka ona, ka txikhati txa wulwati wakwe, ma nava ma sa basa, kufana ni txikhati txa mitxima yakwe; ngu toneto, ni sotshe simaha si asi khalahatshelako si na va si sa basa, kufana ni masiku akwe a mitxima.

²⁷Awule asi gwesako simaha soneso, a na va a sa basa; a na kuwula syambalo sakwe e samba mmidi; hambi keto a na va a sa basa, kala kuswa ka ditambo.

²⁸Kambe ngako a di kalamukile ka wulwati wo humela mnoha, a na bala mtxhanu wa masiku ni mambidi, se ngu kona a no va a di basile.

²⁹Ka ditshiku da wutxhanu ni mararu, a na teka matuva mambidi mwendo mavhondo mambidi a situvani, e ma yisa ka mphaxeli, ha txikeni ka ditenda da msengeletano.

³⁰Sekoko mphaxeli a na maha mningelo ngu dituva dimwedo, e maha mhamba yo divalela, ngu dimwani, a na maha mhamba yo hiswa, e mmahela mhamba yo divalela, masoni ka MKOMA, ngu wulwati wo humela mnoha wule, wu nga ti ti mnyenyezisa.

³¹Ka toneto, anu mi na hambanisa vanana va ka Israyeli ka wubihi wawe, kasi vona va si wuleli phangoni ka kudawa, nguko va ti ya nyenyezisa ngu wubihi wawe nyumba yangu yo sawuleka, ayi yi ku hagari kwawe.

³²Asiya nzileleto si si vekelwako wu a humelako mnoha, ni wule mnoha wa mbewu yakwe wu nga thekela, a nga va a di nyenyezisilwe;

³³ni wamsikati wule a ku ka mbimo yakwe ya mitxima, ni wule a humelako wubovhu, mwendo mbwamwamna mwendo mbwamsikati, hambi wamwamna wule a nga otela ni wamsikati wo mbi basa.