Read chopi Levhi 17 Bible Online

Levhi 17 - chopi bible

Levhi 17

¹MKOMA a to womba kambe ka Mosi, a txi khene:

²Womba ka Aroni ni ka vanana vakwe, ni votshe vanana va ka Israyeli, u txi khawe:

³Ngako m'thu wokari wa ka Israyeli a txi daya didhuna, mwendo txinvutana hambi phongo, amu wugoveloni mwendo hahanze ka wugovelo,

⁴hambi i txo va ha txikeni ka ditenda da msengeletano, a si mahi mningelo ka MKOMA, masoni ka wukhalo wo sawuleka wa MKOMA, a na va ni mnandu, ngu kuva a di theketile mnoha; ngu toneto a na va a txi tovelwa hagari ka vathu va ka kwakwe.

⁵Kasi ku vanana va ka Israyeli ve wuyisa ka MKOMA sihari si va nga daya hahanze ka wugovelo, va txi si neha kasi ku si maha mhamba ya mpatano.

⁶Mphaxeli a na xwayela ngu mnoha aha ka txiluvelo txa MKOMA, ha txikeni ka ditenda da msengeletano, e hisa mafura a mningelo, kasi kubhumula ku txi tsakisa MKOMA.

⁷Va nga engete kambe va txi maha mningelo wa mhamba ka madhimoni, va nga ti ti patile nawo, va txi maneka va si thembeki. Awuwa mlayo wa kala kupinduka, ka lotshe liveleko lakwe.

⁸U na va gela ku khawe: Ngako m'thu wa ka Israyeli, mwendo mluveli wu a nga aka navo, a txi lava kumaha mningelo wo hiswa mwendo yimwani mhamba,

⁹na asi wu yisi ha txikeni ka ditenda da msengeletano, kasiku eya maha mningelo ka MKOMA, a na va a txi tutumiswa ka vathu va ka kwawe.

¹⁰Se ni wuhi m'thu wa lixaka la ka Israyeli, mwendo wa mluveli wu a nga aka hagari kwawe, a txi dya mnoha wa ni lihi lixaka, ani ni na mpeka, ni mtutumisa hagari ka vathu va ka kwawe.

¹¹ Nguko[9] wutomi wa mmidi wu maneka mu ka mnoha; ngu toneto ni nga mi ninga txiluvelo, kasi kumaha mhamba yo divalela txionho, nguko ngu mnoha ta koteka hulukisa wutomi.

¹²Ngu toneto, ni nga za ni ruma ka va ka Israyeli ti to ku ngave ni wammweyo wanu a dyako mnoha, mwendo mluveli wu a nga aka hagari kwanu a ngadye mnoha.

¹³Ni wuhi m'thu wa ka Israyeli mwendo mluveli wu a nga aka hagari kwanu, e thuka a txi daya txihari mwendo txinyana kuxotani kwakwe ka sile si dyiwako, a fanete e theketa mnoha wa txona hahatshi, a txi wu kuletela.

¹⁴ Nguko[10] wutomi wa mmidi ngu mnoha wu txihari txi ku nawo; se ngu toneto, ani ni tsimbile va ka Israyeli, ti to va si dyi mnoha wa txihi ni txihi txihari. Wutomi wa sihari wu mu ka mnoha; awule a wu dyako a na tutumiswa hagari ka vathu va ka kwawe.

¹⁵Ngako mmwani m'thu wa ka Israyeli mwendo mluveli wu a nga aka kwawe, a txi dya nyama ya txihari txo fa, hambi txo dawa ngu tximwani txihari txa txitinga, a na va a txi kuwula syambalo sakwe, e samba ngu mati, se a txi zumba a sa basa kala minova; ngu msana a na va a di basile.

¹⁶Ngako asi kuwuli syambalo sakwe hambi kwa mbi samba mmidi wakwe ngu mati, a na va a txi rwala mnandu wakwe.