Read chopi Levhi 18 Bible Online

Levhi 18 - chopi bible

Levhi 18

¹MKOMA a to womba kambe ka Mosi, a txi khene:

²Gela msengeletano wa ka Israyeli sileleto siya: Ani ngani MKOMA, Txizimu txanu!

³Mi nga maheni ati va mahako Vaegipta, vale mi nga hanya navo ka masiku ale ma nga pinda, hambi tile va mahako Vakanana, vathu va ditiko dile ni lavako ku mi yisa ka dona, hambi kulondeta mikhuwo yawe.

⁴Mi fanete kuxayisa mithetho yangu ni milayo yangu: Ani ngani MKOMA, Txizimu txanu.

⁵ Mi fanete kuxayisa milayo yangu ni mithetho yangu, nguko yona ya tsanisa wutomi, ka wule a yi londetako! Ani ngani MKOMA!

⁶Ni wammweyo wamwamna a nga thuke e otela ni wamsikati wu i ku mnoha wumwewo nayo, a txi tumbula wumbwiri wakwe. Ani ngani MKOMA!

⁷U nga thuke u vhunungula wumbwiri wa tate wako ni wa mane wako! I mame wako, u nga vhunungule wumbwiri wakwe!

⁸U nga thuke u otela ni msikati wa tate wako.

⁹U nga thuke u otela ni ndiyako i ku mwanana wa tate wako mwendo wa mame wako, awu a nga velekwa ha m'tini mwendo awule a nga velekelwa hahanze! U nga vhunungule wumbwiri wakwe.

¹⁰U nga otele ni mtukulu wako wa muhorana, wo velekwa ngu mwanana wako wa mfana mwendo wa muhorana; nguko wumbwiri wakwe, mbwako.

¹¹U nga thuke u otela ni mwanana wamsikati wa tate wako, awu a nga velekwa ngu tate wako, nguko i ndiyako. U nga vhunungule wumbwiri wakwe.

¹²U nga thuke u otela ni ndiya ya tate wako, nguko i hahani wako.

¹³U nga thuke o otela ni mkoma mwendo mnanda wa mame wako. Nguko mbamame vako.

¹⁴U nga thuke u otela ni msikati wa tatanyani wako, nguko nene i mame wako.

¹⁵U nga thuke u otela ni mamanyani wako, nguko msikati wa mwanana wako. U nga vhunungule wumbwiri wakwe.

¹⁶U nga otele ni msikati wa mwananu; nguko mbumbwiri wa mwananu.

¹⁷U nga vhunungule wumbwiri wa wamsikati wokari, ni wa mwanana wakwe; hambi mwanana wa dihorana wa mwanana wakwe wa mfana, mwendo mwanana wa dihorana wa mwanana wakwe wa dihorana, nguko maxaka a ditshuri; ndingana ta hombe.

¹⁸U nga tekane ni wamsikati ni mwanawe, u vangisa wukhuxu, u txi vhunungula wumbwiri wako ni wakwe, a txi ngadi a txi hanya.

¹⁹U nga thuke u otela ni wamsikati wokari, ngako a di ni mitxima, nguko ngu mnyenyezisa!

²⁰ U nga thuke u otela ni msikati wa mwakelani wako, nguko u nga ti totela manyala kumweko nayo.

²¹U nga ningele ni mmweyo wa vanana vako, va txi mahwa mphaxo ka Moloke; nguko ngu nyenyezisa ditina da Txizimu txako! Ani ngani MKOMA!

²²Ni wuhi wamwamna a nga thuke a txi otela ni mwamna kulowe, a txi mmha wamsikati, i mhaka yo yila!

²³ U nga thuke u txi otela ni txihari; nguko ngu ti nyenyezisa; wamsikati nene a nga ti ningele ka txihari, kasi ku e otela natxo, nguko ti bihile.

²⁴Mi nga ti bihiseni ngu kumahetela tona timhaketo, nguko va ti bihisile toneto vathu vale ni va tovelako masoni kwanu.

²⁵Ditiko di nyenyezile, se ani ni tsayisa wubihi wa dona, aniko ditiko di na kosa vaaki va dona.

²⁶Kambe mi fanete kulondeta milayo yangu ni mithetho yangu, mi si maheteli timhaka to thisa hagari kwanu, anu vanyamne va ditiko, kumweko ni valuveli.

²⁷Nguko vaaki vale va nga hanya kukhatani, anu mi sinzi kumaneka ka dona ditiko diya, va ti ti mahetela timhaka to thisa to nga toneto, va txi di nyeta ngu kubiha kwawe.

²⁸Kasi ku ditiko diya di si mi kosi nanu, ngu kumaneka mi txi di nyenyezisa ngu kubiha kwanu, nga kule di nga kosa vaaki vale va nga hanya ka dona, na anu mi sinzi ku va ho.

²⁹Kkambe wule a no va a txi mahetela timhaka to nyenyeza, a na tovelwa hagari ka vathu va ka kwawe.

³⁰Ngu toneto, xoniphani sileleto si ni nga mi mahela, mi si londeteli mikhuwo yo biha, ayile va nga yi mahetela vale va nga thanga vona, na mi sinzi kumaneka anu, nguko mikhuwo yoneyo yi nga mi nyenyezisa. Ani ngani MKOMA, Txizimu txanu.