Read chopi Levhi 22 Bible Online

Levhi 22 - chopi bible

Levhi 22

¹Msana keto, MKOMA a to womba-womba ka Mosi, a txi khene:

²Gela Aroni ni vanana vakwe, ti to ve tsule kule ni simaha so sawuleka sa vanana va ka Israyeli, ava va ni sawulekisako, kasiku va si nyenyezisi ditina dangu do sawuleka: Ani ngani MKOMA!

³Va gele u txi khawe: Kukhukhela ka kuwa, m'thu wule i ku wa lihunzu lanu ni wa liveleko lanu, awu a tshuketako hafuhi ka simaha so sawuleka, asi va ka Israyeli va nga si lulamisa, va txi si tisa kwangu, na a sa basa eyo m'thu a na fuviswa hagari kwanu. Ani ngani MKOMA!

⁴Ni wammweyo wa lihunzu la Aroni, a nga tshapelwa ngu tshekela mwendo a nga mana txikanzameti, kha na kudya simaha so sawuleka na a sanzi ku ti basisa. Ngu toneto, kambe ti mahekako ka wule a gwesako txirumbi, mwendo awule mnoha wa liveleko wu nga huma,

⁵ka wule a gwesako txihari txo tsimbila ngu dibindi e maneka a di nyenyezisilwe, ka wule a gwesako m'thu wo mbi basa, e maneka a di totetwe nzambwa, hambi i di wuhi ni wuhi.

⁶Awule a nga gwesa simaha siya, a fanete e zumba a txi yila kala ni minova, asi dyi sile so katekiswa, kala kuza e samba mmidi ngu mati.

⁷Ngu msana ka kuswa ka ditambo ngu kona a no va ni fanelo ya kudya so sawuleka, nguko nzakudya sakwe.

⁸A nga thuke a txi dya nyama ya txihari txo ti fela txokha, hambi txo dawa ngu sihari sa txitinga, nguko a nga nyenyeziswa nene: Ani ngani MKOMA!

⁹Vaphaxeli va na vekisa sirumo sangu, va si maheteli sionho, ve maneka va txi nyenyezisa sakudya sangu, se va txi dawa ngu kuva va di ndakile milayo. Ani ngani MKOMA, awu a va sawulekisako.

¹⁰Awule i singako wa m'tini ka mphaxeli, a nga thuke a txidya so katekiswa; mwendo mpfhumba wakwe, hambi txithumi txakwe txi a txi holelako, va nga silo so katekiswa.

¹¹Aniko ngako mphaxeli a di xavile m'thu ngu male yakwe; mwendo wu a nga velekwa mu nyumbani kwakwe ngu txithumi txakwe; va sikota kuva txi dya sakudya sakwe.

¹²Se ngako mwanana wa dihorana wa mphaxeli, a txi tekana ni wamwamna wa mamwani matiko, a ngadye si si nga mahelwa kuva i di sa mningelo wa mhamba.

¹³Aniko mwanana wa dihorana wa mphaxeli, awule i ku noni mwendo a nga ya tutumiswa wukati, asi nga ni mwanana, a txi wuyela nyumbani ka tate wakwe eya zumba kona, kufana ni mbimo ya wuphyani kwakwe, a na dya sakudya sa tate wakwe; aniko ni wammweyo wa matiko kha na mbi dya.

¹⁴Ngako m'thu wokari, a txi thuka a txi dya so katekiswa ngu kulunduma, a na si tshumetela ka mphaxeli, ngu mtengo wa sona, aniko a na si engetela ngu simwani sa wutxhanu.

¹⁵Vaphaxeli va nga thuke va txi leka vathu, va txi bihisa so katekiswa, asile vanana va ka Israyeli va si mahako mningelo wa mhamba ka MKOMA.

¹⁶Ngako vaphaxeli va txi tumetisa vamwani vathu va txidya sa mningelo wa mhamba, vona vathuvo va na rwala txionho txi txi ku ni fanelo yo dihelwa: Ani ngani MKOMA, ni sawulekisako.

¹⁷MKOMA a wombile ka Mosi, a txi khene:

¹⁸Gela Aroni ni vanana vakwe ni votshe vanana va ka Israyeli, ku khawe: Wuhi ni wuhi m'thu wa ka Israyeli, mwendo ngu wule i ku mluveli, a nga aka ditikoni ka va Israyeli, awule a lavako kumaha mningelo wakwe wa mhamba, kasiku e tatisa txixambanyo txakwe, mwendo mningelo wa kumaha ngu kuranda kwakwe, ngako a txi maha mningelo wa mhamba yo hiswa ka MKOMA,

¹⁹kasiku mhamba yi txi amukelwa, a fanete kuningela txifuyo txa matune, txo mbi limala, txa mu ka mtxhambi wa tihomu, mwendo wa tinvuta, mwendo wa tiphongo.

²⁰Mi nga thuke mi txi ningela txihari txi txi ku ni wulima, nguko MKOMA kha na mbi wu amukela mningelowo.

²¹Awule a lavako kumaha mningelo ka MKOMA, wa mhamba ya kuthutha, ngu txifuyo txa hombe mwendo txa txidotho, kasi kutatisa txithembiso txakwe, mwendo mhamba ya kuranda kwakwe, a fanete kuningela txifuyo txo hetiseka, txo mbi na wulima.

²²Mi nga maheni mningelo ka MKOMA ngu txihari txi i ku dibhofu, txo limala, txo wilwa txihango, txa magwagwarimba, txa txigwere, mwendo txibawa, kambe mi nga maheni mningelo wo hiswa ka MKOMA, ha txiluveloni.

²³Kambe homu mwendo txifuyo txatxidotho, txo lapha mwendo txo koma, wa sikota ku txi maha mningelo ngu kuranda kwako, aniko ngu kuxambanya kha wu na mbi tumeleka.

²⁴Mi nga maheni mningelo ka MKOMA, ngu txihari txo thenwa ngu kuphwaraselwa, mwendo kusukwa, mwendo kuthaviswa, mwendo kuwilwa; ditikoni kwanu, mi nga maheni mhaka yo nga eyo.

²⁵Kambe mi nga tumeleni kuningela so dyiwa sokari ngu manzani ka valuveli vanu, ka MKOMA, nguko sihono siyo so maha kubiha, se ene kha na ku mi tumelela, hi nga sa sinene.

²⁶MKOMA a wombile kambe ka Mosi, a txi khene:

²⁷Ngako ku txi velekwa dirole, mwendo txinvutana, mwendo txihongwana, txi fanete kuzumba ni mame wa txona amu ka mtxhanu wa masiku ni mambidi. Kukhukhela ka ditshiku da wutxhanu ni mararu, ta koteka kumaha mningelo wa mhamba ngu sona ka MKOMA.

²⁸Aniko mi nga sikoteni kudaya ka ditshiku dimwedo txifuyo, mwendo ni mwanana wa txona, hambi i di homu mwendo nvuta.

²⁹Ngako mi txi lava kumaha mningelo wa mhamba yo bonga ka MKOMA, mahani ngu nzila yo lulama, kasiku yi txi amukeleka.

³⁰Mi fanete kudya nyama ya kona, ka donedo ditshiku, mi si siyeti txilo, kala mangwanani ka kona: Ani ngani MKOMA!

³¹Vekisani sirumo sangu mi si xayisa: Ani ngani MKOMA!

³²Mi nga nyenyeziseni ditina dangu do sawuleka; kasiku ani ni txi dhumiswa hagari ka vanana va ka Israyeli: Ani ngani MKOMA, ni mahako ti to anu mi va vathu vo sawuleka.

³³Nguko ani ni mi humisile ditikoni ka Egipta, kasiku ni va ni di Txizimu txanu. Ani ngani MKOMA!