Read chopi Levhi 23 Bible Online

Levhi 23 - chopi bible

Levhi 23

¹Msana keto, MKOMA a wombile ka Mosi, a txi khene:

²Gela vanana va ka Israyeli u txi khawe: Mibuso yo dhumisa MKOMA, ayi mi fanelako ku yi ramba, yi na va i di mibuso yo sawuleka; mibuso yangu ngu yiya:

³Mi na maha mithumo mu ka mtxhanu wa masiku ni dimwedo, aniko ditshiku da wutxhanu ni mambidi, i Sabbata yo humula, msengeletano wo sawuleka; kha mi na mbi maha mthumo ni wawumwewo; i Sabbata ya MKOMA kotshe mu mi zumbako kona.

⁴Ayiya ngu yona mibuso ya MKOMA, i ku mibuso yo sawuleka, mi no yi ramba ngu mbimo ya kona yi nga emiselwa:

⁵Ka mtxima wo khata, ka ditshiku da digumi ni mune ka mtxima, ni minova, i Pasika ya MKOMA;

⁶ se ka ditshiku da digumi ni mtxhanu ka wonewo mtxima, m'buso wa mapawu o mbi tshumbelwa, wu mahelwako MKOMA;

⁷ka ditshiku do khata, mi na va ni m'buso wo sawuleka; kha mi na mbi maha mthumo ni wawumwewo;

⁸aniko amu ka mtxhanu wa masiku ni mambidi, mi na ningela miningelo yanu yo hiswa ka MKOMA; ka ditshiku da wutxhanu ni mambidi, ku nava ni m'buso wo sawuleka; kha mi na mbi maha mthumo ni wawumwewo.

⁹Se MKOMA a to womba ka Mosi, a txi khene:

¹⁰Gela vanana va ka Israyeli u txi khawe: Ngako mi di wulete ka ditiko di ni no mi ninga, na ku di hokile mbimo yo elula, mi fanete kuya ningela ka mphaxeli nyanda yo khata ya si mi no elula;

¹¹se mphaxeli a na ningela nyanda ka MKOMA, ka ditshiku di di londetako Sabbata, e maha masoni ka MKOMA mhamba yo ndiwitela ya mningelo, kasiku e mi katekisa.

¹²Ka ditshiku di nyanda yi no ndiwitelwa, mi fanete kumaha mningelo wo hiswa ka MKOMA, ngu txinvutana txa dilembe dimwedo, txo mbi na wulima.

¹³Se mningelo wa mhamba yo hiswa, kulaveka kumaha mningelo wa mtxhanu wa makilu ni mararu a mpupu wa wunene, wo vhuwa ni mtona, ti to wu txi hiswa ngu kudhumisa MKOMA, mhamba yiya njo bhumula, yi tsakisa mbilu yakwe; mhamba ya sa kusela, yi na va ya mmbamba wa vhinya.

¹⁴Mi nga dyeni mapawu, hambi fulaho yo katingwa, mwendo miburu, kala donedo ditshiku mi no va mi txi tisa mningelo, wa nyanda yo ndiwitela, ka MKOMA, Txizimu txanu; awuwa mthetho mbwa yotshe mbimo kala kupinduka, ka liveleko ni liveleko la ka kwanu, kotshe mu mi no maneka mi di akile kona.

¹⁵Ngu msana, anu motshenu mi na bala mtxhanu wa mavhiki ni mambidi o tala, kukhukhela ka ditshiku da Sabbata, i ku ditshiku da m'buso, dile mi nga maha mningelo wa nyanda yo ndiwitela.

¹⁶Mi na bala mtxhanu wa magumi a masiku, kala ditshiku di di gametako Sabbata ya wutxhanu ni timbidi, se mi na maha mningelo wa wuphya wa sakudya ka MKOMA.

¹⁷Mi na tisa ngu mitini kwanu, mapawu mambidi, o mahwa ngu mipimo yimbidi ya wugumi, a mpupu wa wunene, o bhikwa ni mtshumbelo, aale ma nga mahelwa kuve mandiwitelwa; ngu yona mihando yo khata yo mahelwa MKOMA.

¹⁸Mi na ningela kumweko ni mapawu, mtxhanu wa sinvutana ni simbidi, sa tanga ya dilembe dimwedo, so mbi na wulima, ni dirole dimwedo, ni tihamba timbidi, ti to sifuyo siya si txi va i di mningelo wa mhamba yo hiswa, kumweko ni mningelo wa mhamba ya sakudya ni so sela, asi kubhumula ka sona ku tsakisako MKOMA.

¹⁹Kambe mi na ningela mabhongwe, kasi kuva mhamba yo basisa txionho, ni sinvutana simbidi sa tanga ya dilembe dimwedo, si va i di mhamba ya mpatano.

²⁰Mphaxeli a na maha mningelo wo ndiwitela ngu sotsheso, kumweko ni mapawu a mihando yo khata, masoni ka MKOMA, ni sinvutana simbidi; si si lumba ene MKOMA, kasi kuvhuna mphaxeli ngu sona.

²¹Mi fanete mi ramba msengeletano wo sawuleka, mi si mahi ni wawumwewo mthumo wo nemela. Ewo mthetho wa lisima yotshe mbimo, ka sotshe situkulwana sanu, hani ni hani mi no maneka mi txi aka kona.

²² Ngako mi txi elula tithembweni kwanu, mi nga funyeleni kala magwito ka thembwe, kambe mi nga yeni mi txi ya roletela asi si nga saletela, msana ka kuelul; mi na siyela sisiwana ni vapfhumba va va nga mi wuyela. Ani ngani MKOMA, Txizimu txanu!

²³MKOMA a wombile kambe ka Mosi, a txi khene:

²⁴Gela vanana va ka Israyeli u txi khawe: Ditshiku do khata da mtxima wa wutxhanu ni yimbidi, ku nava i di ditshiku do humula: Mi fanete kuramba msengeletano wo sawuleka, mi maha txialakanyiso txo huwelela, ngu kuveta mpundu.

²⁵Ka ditshiku donedo, mi nga maheni mthumo ni wuhi wo nemela, kambe mi na maha mningelo wa mhamba yo hiswa ka MKOMA.

²⁶MKOMA a wombile kambe ka Mosi, a txi khene:

²⁷Ka ditshiku da wugumi, da mtxima wa wutxhanu ni yimbidi, ditshiku da hombe do divalela sionho: Mi fanete kuramba msengeletano wo sawuleka, mi txi maha mithumo ya kukomba kupandiseka ngu sionho ni kumaha mningelo wa mhamba ya MKOMA.

²⁸Ka donedo ditshiku, mi nga maheni mthumo ni wawumwewo, nguko ditshiku do divalela, di nga emiselwa ti to anu, mi mana kudivalelwa masoni ka MKOMA, Txizimu txanu.

²⁹Awule, ka ditshiku donedo, a no va asi xaniseki ngu sionho sakwe, a na fuviswa hagari ka va ka kwawe,

³⁰ni wule a no maha mthumo hambi wa lihi lixaka, ka donedo ditshiku, ani nipune ni na maha ti to e fuva hagari ka vathu va ka kwawe.

³¹Mi nga maheni mthumo ni wawumwewo, awuwa mthetho wa yotshe mbimo, ka totshe tiveleko tanu, hani ni hani mi no maneka mi di kona.

³²Ka ditshiku donedo, kwanu motshe, di na va i di do humula, kasiku mi maha mithumo ya kukomba kupandiseka ngu sionho sanu. Kukhukhela ka ditshiku da wutxhanu ni mune, ni minova, kala kuswani ka ditshiku da wugumi, mi fanete kuzumba mi txi humula.

³³ MKOMA a to womba ka Mosi a txi khene:

³⁴Gela vanana va ka Israyeli u txi khawe: Ka ditshiku da digumi ni mtxhanu ka wona mtximewo wa wutxhanu ni yimbidi, ku na mahwa m'buso wa mabharakawu, amu ka mtxhanu wa masiku ni mambidi, m'buso wo dhumisa MKOMA.

³⁵Ka ditshiku do khata, ku nava ni msengeletano wa wukhongeli, mi nga maheni ni wawumwewo mthumo wo nemela.

³⁶Anu, ka ona masikuyo a mtxhanu ni mambidi, mi na maha miningelo yo hiswa ka MKOMA. Ka ditshiku da wutxhanu ni mararu, mi na ramba msengeletano wo sawuleka, mi maha mningelo wa mhamba ka MKOMA. Msengeletano wa m'buso wo gwitisa, mi nga maheni mthumo ni wawumwewo.

³⁷Ayiya mibuso yo lumba MKOMA, ka yona, mi fanete kuramba misengeletano yo sawuleka, kasi ku ta ningela ka MKOMA miningelo yo hiswa, miningelo ya mpatano, ni miningelo ya sakudya, miphaxo ni timhamba, mmweyo ni mmweyo ka ditshiku dakwe;

³⁸hahanze ka Masabbata a MKOMA, ni siningo sanu, ni sotshe sikatekiso sanu, ni miningelo ya kuranda kwanu, mi no ningela ka MKOMA.

³⁹Aniko kukhukhela ka ditshiku da wugumi ni mtxhanu, ka mtxima wa wutxhanu ni yimbidi, ngu msana ka kuva mi di gwitile kuelula mihando ya ha mafuni, mi na maha m'buso wo tsakela MKOMA, mndani ka mtxhanu wa masiku ni mambidi; ditshiku do khata ni ditshiku da wutxhanu ni mararu, ma nava i di masiku o humula.

⁴⁰Ka ditshiku do khata, mi na hapha mihando yo tshamba, madhavi a mindonga yo tshura, madhavi a mitxhese, madhavi a mindonga yo txhuma, ni mipfhuwu ya mnamboni; kambe mi na tsaka, mi giya masoni ka MKOMA, Txizimu txanu, amu ka mtxhanu wa masiku ni mambidi.

⁴¹Mi na mahela MKOMA m'buso, amu ka mtxhanu wa masiku ni mambidi, dilembe ni dilembe; wu txi maha mlayo wa yotshe mbimo ka tiveleko tanu totshe. Mi na maha m'buso wuwa ngu mtxima wa wutxhanu ni yimbidi.

⁴²Amu ka masikuyo a mtxhanu ni mambidi, mi na zumba matendani, votshe vanana va ka Israyeli, va fanete kuzumba amu matendani.

⁴³Kasi totshe tiveleko tanu ti txi ziva tito, mbimo yi ni nga humisa vanana va ka Israyeli ditikoni ka Egipta, ni va vekile amu ka matenda ve zumba. Ani ngani MKOMA, Txizimu txanu!

⁴⁴Mosi a txhamusete ka vanana va ka Israyeli, mibuso yi va ku ni fanelo ku yi maha, va txi dhumisa MKOMA.